Na Veivakalougatataki ni Talairawarawa

Mai vei Peresitedi Thomas S. Monson

“Na lesoni levu duadua eda rawa ni vulica ena bula oqo,” sa vakatavulica o Peresitedi Thomas S. Monson, “oya ni gauna e vosa kina na Kalou ka da muria, eda na dodonu tikoga.”¹

Eda na vakalougatataki talega. Me vaka a kaya o Peresitedi Monson ena dua na koniferedi raraba wale tikoga oqo: “Ni da sa vakamuria na ivunau, eda na bula marau kina, ena vakaibalebale, ka sega soti na lomaocaoca. Ena rawarawa na iwali ni bolebole, vakakina na sotavi ni noda leqa ka da na ciqoma na veivakalougatataki sa yalataka tu na [Kalou].”²

Ena veivosa cavuti oqo mai na ivakavuvuli nei Peresitedi Monson vaka Peresitedi ni Lotu, e vakananumi keda o koya ni veivakaro e sa idusidusi veivakadeitaki ki na bula marau kei na vakacegu

Veidusimaki ki na iLakolako

“Na ivunau ni Kalou e sega ni soli me vakadaroya se me tarova na noda na bulamarau. Na kena veibasai ga. O Koya, ni buli keda ka kilai keda vakavinaka e kila na ivakarau ni noda na mai bula me rawa ni da na rawata na bulamarau ena kena veta sara e cake. Sa vakarautaka tu o Koya na idusidusi, ni kevaka me da na vakamuria, ena kauti keda yani vakavinaka ena bula oqo. Eda nanuma na qaqa ni sere kilai levu o ya: ‘Karona nai vunau! Na bula vakacegu; bula dei’ [raica na “Karona nai Vunau,” Sere ni Lotu, naba 187].”³

Kaukauwa kei na Kilaka

“Na talairawarawa sa nodra ivakatakilakila na parofita; sa itakataka ni kaukauwa kei na kilaka vei ira ena veitabayabaki. Sa dodonu me da na kila tiko ni o keda, talega, eda na rawa ni rawata na ivurevure ni kaukauwa kei na kilaka oqo. Sa vakarautaki tu oqo vei keda nikua ena noda dau talairawarawa ga ena ivakaro ni Kalou. …

“Na kila ka eda vakasaqara, na kena isau eda sasagataka meda rawata, kei na kaukauwa eda gadreva nikua meda sotava kina na bolebole ni dua na vuravura dredre vakaidina ka vuki veisau tu ga, sa na rawa ni noda kevaka eda sa na talairawarawa ki na ivakaro ni Turaga.”⁴

Digitaka mo Talairawarawa

“Na ivakarau ni noda gauna oqo o ya na bula galala vakai koya. Era vakaraitaki ena mekasini kei na retio yaloyalo o ira na dauvakaraitaki ena iyaloyalo yavala, o ira na dauniqito—o ira era dau vinakata e vuqa na itabagone mera vakataki ira—ka vakanadakuya na lawa ni Kalou ka vakayacora e matanavotu na ivalavala ca, ka sega ni kauwaitaka na cava ena tarava mai. O sega beka ni vakabauta! E tiko na gauna ni isosoqoni—na gauna mada me veidutaitaki kina na ivola ni veivoli. O ira na Sidarela vakayadua e tiko na nodra bogilevu donu namaki—ke sega ena bula oqo, ia ena bula e tarava. Na Siga ni Lewa ena yaco mai ki na tamata yadua kece. … Au sa vakamasuti kemuni mo ni digitaka na talairawarawa.”⁵

Reki kei na Vakacegu

“Ena kena irairai vei iko ni ra mamarau vakalevu cake o ira era tu oqo e vuravura mai vei iko. E so vei kemuni ena rairai nanuma ni da sa vakatabui ena vuku ni yavu ni noda ivakarau ka sa tauyavutaki tu ena Lotu. Kemuni na taciqu kei na ganequ, au vakaraitaka vei kemuni, ni sega ni dua na ka e uasivita na nomu vakila na marau ni yalomu ni o vakila ni sa cakacaka bula vei iko na Yalotabu ena nomu saga mo muria na iVakabula ka talairawarawa ki na ivunau.”⁶

Lako Vakadodonu

“Au vakadinadinataka vei kemuni ni noda veivakalougatataki sa yalataki tu sa sega ni vakarautaki rawa. E dina ni na kumukumuni mai na o ni cava, ka tau mai na uca, na noda kila na kosipeli kei na noda lomana na Tamada Vakalomalagi kei na noda iVakabula ena vakacegui keda ka tokoni keda ka kauta mai na reki ni lomada ni da tudei tu ka muria na ivunau. Ena sega ni dua na ka e vuravura oqo me na valuti keda rawa.”⁷

Muria na iVakabula

“O cei na Tamata sa vakararawataki oqo, ka sa kila na rarawa? “O cei na Tui ni lagilagi, na Turaga ni lewevuqa? O Koya na noda iVakavuvuli. O Koya na noda iVakabula. O Koya na Luve ni Kalou. O Koya e Tekivutaka na noda Vakabulai. O Koya e kaci tiko mai, ‘Dou Muri Au.’ O Koya e vakatavuvulitaka, ‘Dou lako, ka kitaka vakakina.’ O Koya e kaya, ‘Dou talairawarawa ki na noqu ivunau.’

“Me da sa muri Koya. Me da vakatotomuria na Nona ivakaraitaki. Me da talairawarawa ki na Nona vosa. Ni da cakava oya, eda sa solia Vua na isolisoli vakalou ni vakavinavinaka.”⁸