iSaunitaro Mai vei Ira na iLiuliu ni Lotu
Na Sala me iUsutu Kina ni Noda Bula na Karisito
Mai vei Elder D. Todd Christofferson
Ena Kuoramu ni iApositolo Le Tinikarua
Mai na lotu ena Brigham Young University–e Idaho ena ika 27 ni Janueri, 2009.
A rawata o Jisu na taucoko ni duavata kei Tamana ena Nona soli Koya, na yagona kei na yalona, ki na lewa nei Tamana. Ni tukuni Tamana, a kaya kina o Jisu, “Niu sa kitaka tikoga na ka sa vinakata ko koya” (Joni 8:29). Ena vuku ni lewa nei Tamana, a soli koya o Jisu me laki mate, ka sa “talairawarawa me mate ni sa duavata ga na loma i Tamana kei na Luvena” (Mosaia 15:7). Na Nona raica matua na Tamana sa dua na vuna cecere e savasava ka kaukauwa kina na cakacaka vakalotu i Jisu A sega Vua na lomalomarua veivakacalai.
Ena sala vata oqori, sa rawa vei iko kei au me daru biuti Karisito me iusutu ni nodaru bula ka yaco me daubau kei Koya ni sa duavata o Koya kei Tamana (raica na Joni 17:20-23). Sa rawa me daru tekivu e na kena kautani na veika kece mai na nodaru bula ka biuta lesu tale na kena me vakaliuci me iusutu kina na iVakabula. Taumada me da biuta na veika vakadodonu me rawa ni da nanumi Koya tiko—ena masumasu, vulica ka vakasamataka vakatitobu na ivolanikalou, vulica vakabibi na ivakavuvuli vakaiapositolo, vakavakarau ena veimacawa ki na tauri ena kilikili na sakaramede, sokalou ena Sigatabu, vola ka vakananuma tiko na veika e vakavulica vei keda na Yalotabu kei na veika eda sotava baleta na bula vakatisaipeli. Ena rawa beka ni so na ka o na vakasamataka e yaga sara ena gauna oqo ena nomu bula. Ni sa biu donu na gauna donu kei na sala ni veika oqo, me iusutu kina ni noda bula na Karisito, sa qai rawa meda tekivu kuria ki na ilesilesi tale eso kei na veika yaga ni sa yaco mai na kena gauna kei na ivurevure, me vakataka na ilesilesi ni vuli itavi ni matavuvale kei na nomu cakacaka yadua. Ena sala vakaoqo ena sega kina ni vakawaleni na veika yaga mai na noda bula ena ka vinaka walega, ka yaco na veikacacawale me sega ni kauwaitaki se yali yani vakadua.
E dina ni na sega ni ka rawarawa, ia sa rawa me da gumatuataka na toso ki liu ena vakabauta na Turaga. Sa rawa meu vakadeitaka eke ni na yaco me tubu na gagadre kei na gugumatua me da daunanuma ka muria na iVakabula. Sa dodonu me da cakacaka ena vosota ki na kena icavacava ka masu tikoga me baleta na kila na yalo kei na veivuke vakalou eda gadreva (raica na 2 Nifai 32:9).