Domodra na Yalododonu Edaidai
Rau na Agilosi Veiwatini na Dunn
Droini mai vei Wilson Ong
Au a sara TV tiko sa qiri sara mai o tinaqu ni o ganena, o Momo Floyd e yabaki 92, kei watina, o Nei Millie, e rau tauvimate-taka ka sa sega tu na kedrau e vale. Sa sega ni dua vei rau e bula vinaka tiko me laki volivoli mai na sitoa. E sega tale ni dua na wekadrau o Momo Floyd kei Nei Millie e tiko volekati rau, ka sega tale e dua me vukei rau.
A kerea o tinaqu deu na rawa ni veivuke. O au duadua ga au lewe ni Lotu ena tiki ni noqu matavuvale o ya, kau sa dau qiriti vakalevu ena veika vakaoqo. Na leqa e tiko o ya niu tiko sara mai Utah, Amerika, ka rau tiko o momo kei nei mai Hemet, California, Amerika.
Au a qai kaya vei tinaqu meu na vakasamataka mada ena vica na miniti na ka meu cakava. E tiko e dua na noqu itokani e tiko volekati Hemet, kau a qiriti koya ke kila e dua e Hemet. A kaya mai ni tiko e dua na marama e veiqaravi vata kei koya ena Valetabu e Redlands California na yacana o Sister Dunn ka peresitedi ni iSoqosoqo ni Veivukei e kea.
Ni sa sauma mai na talevoni o Sister Dunn, au a kaya,“Ni bula, Sister Dunn. O ni sega beka ni kilai au, oi au o Nancy Little, au vakaitikotiko e Utah. Au lewe ni Lotu, ia o noqu nei kei noqu momo e rau vakaitikotiko e Hemet e rau sega ni lewenilotu. E rau tauvimate tiko ka sa sega tu na kedrau.” Au a tukuna vua na vanua e rau tiko kina, ka yawa toka mai na nona vale, kau vakamacalataka niu gadreva ga meu kila e dua na vale ni kana e volekati rau me kauta na kedrau.
Ia, a qai kaya mai o Sister Dunn ni rau na kauta vakaveiwatini na kedrau o nei kei momo. Rau sa vakabuta supu oti tu kei na madrai, ka sa vavia oti tu o tinana eso na keke. Au a tukuna me kua ia a gutaka ga mai.
Ni oti e vica na auwa, a qiri tale mai o Sister Dunn ka kaya ni sa daumaka na veika kece. E muri sa qai qiritaka mai o tinaqu na ka a kaya o Momo Floyd baleta na veisiko o ya. A kaya o Momo, “Rau a yaco yani e vale e rua na agilosi veiwatini na Dunn. Rau a kauta mai e dua na kakana levu: na vuata, kakana draudrau, supu vakabutari e vale, madrai, kei na keke. Sa qai dua na keke kana vinaka duadua vei au.” Rau a veisiko na Dunn vei noqu momo, vukea na nodrau leqa, a qai kauti Nei Millie o Brother Dunn, ni tauvi koya tiko na Alzheimer, mai na nona loga ki na idabedabe e valenikuro me rawa ni vakani koya o Sister Dunn.
A tagi o Momo Floyd ni sa qiritaka vei tinaqu na veisiko o ya. A kaya ni se bera mada vakadua ni sotava eso na mataqali tamata dauloloma ka veikauwataki vakaoqo. A kaya vei tinaqu niu kalougata niu tiko e Utah ena kedra maliwa “na Momani.”
Ni oti e va na siga mai na veisiko o ya, a taubale yani o Momo Floyd ki na nona kato ni meli a qai tidara ka lutu. A mavoa na uluna ka mate ni oti e va na siga. E dua ga na nasi veiqaravi, vata kei Baraca kei Sisita Dunn e ratou a iotioti ni tamata me raici noqu momo ni bera ni mate.
Au vakavinavinaka ki na nona ivakaraitaki va-Karisito e dua na taciqu lewe ni iSoqosoqo ni Veivukei e tiko ena vica na drau na maile, e dua au se bera mada ni sotava, a vukei noqu nei kei noqu momo.