Kama kei na Lesoni ni Talairawarawa E So

A tukuna o Peresitedi Monson me baleta e dua na gauna a vulica kina o koya na bibi ni talairawarawa. Ni a yabaki walu voli o koya, a sikova na nona matavuvale na nodratou vale kau lailai ena ulunivanua. A via samaka o koya kei na nona itokani e dua na tiki ni veico me waqa kina na buka. Rau a saga ni samaka na veikarasi ena liga, ena nodrau guguraki ni cavu co, ia rau a rawata ga e so na iwase ni co lailai. A vakamacalataka o Peresitedi Monson, “Au sa qai nanuma mai ena noqu vakasama ni yabaki walu na iwali ni neirau sasaga. Au kaya sara vei Danny, ‘Na ka ga me daru cakava sa ikoya me vakamai na karasi oqo. Daru na vakama e dua na wirini ena veico!’”

Dina ga ni kila tu o koya ni sega ni vakatarai me vakayagataka na masese, a cici lesu ki na vale kau lailai me kauta mai e so, ka rau mani vakama kei Danny na tiki ni veikarasi lailai o ya. Rau a namaka me boko ga vakaikoya, ia a mani tete ki na dua na kama levu ka rerevaki. A cici o koya kei Danny ena kere veivuke, ka ra vakusakusa mai na qase mera bokoca na kama ni bera ni yacova na veikau.

A tomana o Peresitedi Monson, “Keirau vulica kei Danny e vica na lesoni dredre ka yaga sara ena siga o ya—ka kena usutu sara ga na talairawarawa.” (Raica na “Talairawarawa ena Kauta Mai na Kalougata,” Liaona Me 2013, 89–90.)

Me vakataki Peresitedi Monson, o sa bau vulica mada e dua na lesoni ni talairawarawa ena sala kaukauwa? Na takete cava soti o rawa ni cakava mo taqomaki iko voli kina mai na talairawarawa ena veisiga mai liu?