iOtioti ni Vakayakavi nei Melva

Mai vei Cheryl Harward Wilcox

E vakaitikotiko mai Utah, Amerika, o koya e vola.

“O na vinakata li ni tovolea mo taura na sakaramede?” Au a taroga na tinaqu sa voleka tu ni mate.

A bula voli na tinaqu me 92 na yabaki ka sa mai leqa wale toka ga oqo. A tiko o koya e valenibula ena gauna era sa navuca kina na vuniwai ni sa sega tale na ka e rawa ni caka ia me qarauni vakavinaka toka ga me yacova na nona tokitaki.

Ni vakavakarautaki voli na nona kau ki vale, a gole mai ki na rumu e rua na turaga mai na dua na tabanilotu voleka ka tarogi au ke na vinakata o tinaqu na sakaramede. E liu au a tukuna vei rau, “Sega, vinaka.” A dredre me tiloma e dua na ka o tinaqu. Au sa qai kaya, “Niu vakasamataka tale, meu tarogi koya mada.” Au a cuva voleka ki na daligana ka kaya, “E tiko oqo e rua na matabete. O na vinakata li ni tovolea mo taura na sakaramede?” Ena dua na domo rogo lailai ka matata a sauma o koya, “Io.”

Ni oti na kena vakalougatataki, au a tomika e dua na tiki ni madrai mai na terei, dovia e dua na tikina lailai, ka biuta vakamalua ki na gusuna. A saga voli me mama o koya, kau kere veivosoti lo vei rau na turaga ena kena taura toka e dua na gauna. Rau vakadeitaka vei au ni sa donu. Ni oti nai karua ni masu, au a taura e dua na bilo palasitika lailai ni wai ka biuta ki na gusuna. A gunuva ga vakalailai o koya, ia au a kurabui ena nona tiloma vakavinaka.

Au a vakavinavinakataki rau na turaga, ka rau curu yani ki na rumu ka tarava. A leqa ena vakacegu o tinaqu ni oti e rauta ni dua na aua.

Ena veisiga ka salamuria, au a vakasamataka rawa e dua na gauna vakatabui ka vakatarai vei au meu wasea vata kei na tinaqu. Na iotioti ni ka a cakava o koya ena bula oqo oya me vakayagataka na sakaramede. Na iotioti ni vosa a tukuna o koya na “Io”—io ena ciqomi ni sakaramede, io ena nona cabora voli e “dua na yalo e raramusumusu ka bibivoro” (3 Nifai 9:20), io ena nona taura matua na yaca i Jisu Karisito ka yalataka voli ni na dau nanumi Koya, io ki na ciqomi ni Yalona. Na iotioti ni ka era lako mai na gusuna oya na ivakatakilakila ni sakaramede.

Sa na wacava na kamikamica ni iotioti ni vakayakavi oya kivua! Dina ga ni malumalumu voli me yavala se vosa, sa na wacava na nona vakila tu na bula vata kei Karisito! Ena vakavinavinakataka o koya na vakilai ni Nona kaukauwa veivakacegui ka veitokoni, ka sa tuberi koya voli ena icavacava ni gauna oya ni nona ilakolako vakayago ka dulaka kivua na inuinui ni bula tawamudu.

Ena veimacawa ni da vakayagataka na sakaramede, me da sa vakavinavinakataka na madigi e noda me da vakavouia na noda veiyalayalati ka vakila na veivosoti kei na loloma soliwale ni da sasagataka meda vakataka cake na Tamada mai Lomalagi kei na Luvena, o Jisu Karisito. Sa na qai yaco kina na madrai kei na wai kivei keda, me vaka e a yaco kivua na tinaqu me “kamikamica sara mai na veika kamikamica kecega, … ka savasava sara mai na veika savasava kecega” (Alama 32:42).