Vosa vaka-Parofita ena dua na Vanua Tawalokuci
E vakaitikotiko e Argentina na dauvolaivola ni veiqaravi voli vaka peresitedi ni kaulotu o watina.
E dua na mekasini sa biu laivi tu sa na veisautaka vakadua na bula nei Oscar Castro.
A papitaiso ka vakadeitaki o Oscar Castro ni oti na kunei ni dua na ivola ni koniferedi raraba na Liaona ena vale a toki kina.
Droini mai vei Dan Burr; itaba e vakarautaka na dauvolaivola
Na siga a biuti Oscar kina kei na rua na luvena lalai o watina sa bau ka mosimosi dina ki na nona bula. E vuqa na vakatulewa sa gadrevi me na caka. E a sa vaqaqara cakacaka voli o koya, ka sa na gadreva oqo e dua na vanua vou me vakaitikotiko kina. E sa vaka vua me mai vorolaki tu na nona bula. A nanuma o koya me sa soro saraga, ka sa rawa vua kevaka a sega na luvena totoka e rua.
E San Juan, Argentina, e sega ni levu na vale e tiko me redetaki ena isau e rawata o Oscar. Ia e dua na vale lailai ena dua na vanua vakaitikotiko vinaka e se qai vakalalai ga mai na dua na ilawalawa cauravou, ka sa redetaka o Oscar ka vakavakarau yani ena itekitekivu vou vata kei rau na luvena.
Ena nodratou itikotiko vou, era a kabuwacara tu ena fuloa e so na mekasini kei na ivola, ka ni oti na kena samaki na vale ena siga taucoko, a dabe sobu o Oscar ka raica voli e dua vei ira na mekasini. A vakidroataki koya vakaidina na waqana. Ena ruku ni ulutaga, Liaona, a tiko kina na iyaloyalo ni dua na qase ka duri tu ena dua na tawa ka vosa tiko vei ira na tamata. Na turaga oya a vakananumi koya ena kedra iyaloyalo na parofita vakaivolatabu.
A dolava na mekasini o Oscar ka tekivu wiliwili, “Eda sa kila oti tu ni dodonu me da tukuna tiko vei ira na noda daulomani ni da lomani ira. Ia na veika eda kila tu ena dau sega ni laki vakayacori sara.”1 A vakasamataka o Oscar na veivosa torosobu rau a dau kaya vakavuqa tu vakaveiwatini. A vinakata o koya me vakatavulici rau na luvena me rau na vinaka cake mai na ka oya. A tomana o Oscar me wilika na mekasini, ka sa tekivu vakila na tubucake ni inuinui e lomana. Ni bera ni cava na macawa, sa wilika oti o koya na veivosa kece ka sa via kila tale e so.
Ni oti e dua na vula rau a taubale voli na daukaulotu ena vanua vakaitikotiko nei Oscar. A torovi rau o Oscar ka taroga ke rau sa daukaulotu ni Yalododonu Edaidai ka na vica na kena isau vakailavo me rawati kina e so tale na mekasini ni Lotu vakaoya. Rau tukuna vua na kaulotu ni na kena isau vua me solia walega e 20 na miniti ni nona gauna.
Ena siga ka tarava rau a sikovi Oscar ena nona itikotiko na daukaulotu. A tukuna vei rau o Oscar me baleta na nodratou toki mai kei na kunei ni ivola, mekasini, kei na ivola lobi makawa e so ka vakavuna vua me kila kina na Lotu. A vakamacalataka o koya ni matai ni vosa e wilika a semati vakadodonu saraga ki na nona bula ena gauna oya. Sa kila rawa tu o koya na bibi ni matavuvale ka via kila tale e so me baleta na lotu vakamatavuvale kei na masumasu vakamatavuvale. A tukuna vei rau na kaulotu na veika tale e sa vulica me baleta na Lotu, oka kina baleti Josefa Simici kei na Vakalesuimai ni kosipeli.
A rai vakadodonu o koya ki na matadrau na kaulotu ka kaya na malanivosa era dau gadreva tu na daukaulotu mera rogoca: “Au vakadinata ni a parofita ni Kalou o Josefa Simici.” Rau a sureti koya na kaulotu me papitaiso, ka vakadonuya o Oscar, ni tonawanawa tu na wai ni matana. Ena vica na macawa emuri, a papitaiso kina o Oscar Castro ka vakadeitaki me dua na lewe ni Lotu.
Na Turaga e sa vakarautaki Oscar, ka sa bibivoro na yalona ka tu vakarau voli me vuli ka tubu. Ena siga veivakananumi, veiyavalati oya, a tara na uto i Oscar na yalo ni itukutuku e so ena ivola ni koniferedi raraba na Liaona. O ira na taukena eliu na vale era sega ni kila na revurevu ni kena veirawai na biu tu mai ni so na mekasini ni Lotu, ia sa yaco na veitukutuku ni kosipeli ena mekasini e so oya me dua na iyaya ni cakacaka bibi ni kaulotu. Ena kena muataki koya ki na veidina e a vakasaqara voli, era a veisautaka vakadua na bula nei Oscar.