Domodra na Yalododonu Edaidai
Kere loloma Veivueti
Droini mai vei Stan Fellows
Au a gole ki na dua na siti volekati Estonia, kau raica kina e dua na tagane ni kere ilavo tiko. Au kurabui, niu kilai koya ena gauna au a kaulotu tiko kina ena siti o ya ena 10 na yabaki yani i liu. A colata tiko e dua na taga levu tawani tu ena tavaya palasitika, me vaka ga e liu, me laki vakayagataki tale baleta na ilavo. Au nanuma sara ni dau kere sede, na gauna o solia kina ena dau kerea tale eso tale ke tiko vei iko.
Au kidacala sara ga niu raici koya. Ni sa oti qo e 10 na yabaki se vaka tu ga o ya––sa sika mai na uluna, ia e vaka sa bula tu ga ena kere ilavo ena veisiga kece. Au vakasamataka sara na 10 na yabaki totoka au sa mai bulataka tiko oqo, ka oka kina na vakamau e valetabu, rawata noqu vuli, kunea e dua na cakacaka vinaka, kau bulabula vinaka.
Au sa kila kasamataka sara ni sa iotioti beka ni gauna oqo meu raici koya kina, kau nanuma meu na solia mada vua e dua na ka. Na leqa e tiko ni tu ga vei au e dua na noti levu ka sa rui levu mai na kena au rawa ni solia. Au vakayavalati ena ka meu cakava––kua ni solia vua e dua na ka se solia vakalevu cake mai na kena au vinakata. Au sa qai nanuma ni sega sara na kena duidui levu ka na marau vakalevu cake kina o koya, au sa qai mani solia vua na ilavo o ya.
Ni oti ga e rua na siga au a sotava talega na ka o ya, ia ena gauna oqo oi au sa mai kere loloma veivueti. Au sa mai guilecava na tikinisiga ni dua na kere sikolasivi bibi sara. Au nanuma ga niu sa solia oti na noqu kerekere, ia au a rere saraga niu sa raica ka dikeva tale ni sa oti tu e dua na siga au sa qai vakauta.
Na isau ni sikolasivi o ya e tautauvata ni vaka-100 na levu ni ilavo au a solia vei daukereilavo o ya, kau sa beitaki au sara ga kina. Au sa qai kere loloma veivueti, ena masumasu vei Tamaqu Vakalomalagi vakakina ena imeli kivei ira na vakailesilesi ena univesiti. Era a qai kaya mai ni sa na ciqomi na ivola kerekere ia ena okati me curu bera.
A saumi na noqu masu kau a vakalougatataki niu a ciqoma na sikolasivi, ka veivuke vakailavo sara vakalevu vei keirau vakaveiwatini. Ia a ka bibi ga niu a vulica kina e dua na lesoni yaga sara: eda sa sega li ni dravudravua kecega? (raica na Mosaia 4:19).