Domodra na Yalododonu Edaidai
A Vukei Au o Kavetani Moronai Meu Vakavulica na Koronivuli ni iTabagone
Droini mai vei Allen Garns
Sa mai vakacagau toka e dua na yabaki dredre ni noqu vakavulici ira na yabaki 13 kei na 14. Au se qai lesu ga mai na dua na bose dredre kei ivukevuke ni qasenivuli liu baleta na railesu sa oti. Me vaka niu qasenivuli vou ka gadrevi meu cakava ga e vuqa na noqu lesoni, sa dredre sara meu vakauqeti vagumatuataki ira na gonevuli ka me ra taleitaka. Sa laki yaco na veivosaki meu sa na vakaukauwataki ira na noqu gonevuli me ra sa digitaka e dua na ka—me ra sa cakava na itavi se totogitaki—ka me ra vakamuria na noqu ivakaro.
Au biuta mai na veivosaki o ya ena yalo rarawa kei na luluvu. Au sa mani cakava na veivosaki o ya me dua na taro bibi niu wilika na noqu ivolanikalou ena siga e tarava. E veivakurabuitaki, ni yaco mai na kena isau niu wilika na iVola i Momani.
Au masu meu vuli mai na ivolanikalou ena mataka o ya ena sala meu qasenivuli vinaka cake kina. A vakavulici au na Yalo Tabu niu wilika baleti Kavetani Moronai ena Alama 44. A tukuni ena italanoa, na nodra sa wavoliti ira na Leimani o Kavetani Moronai kei ira na Nifai ena uciwai o Saitoni ka vakataqayataki ira me yacova ni ra sa biuta na nodra yaragi na Leimani. Au sa wiliwili tikoga, niu vakasamataka tiko meu na vakataki Kavetani Moronai ena kalasi, veivakaroti, nuidei, ka gugumatua.
Au wilika yani na itukutuku ka raica ni sa kaya o Moronai vei Saraemana kei ira na Leimani ni ra sa vakaukauwataki me ra digitaka e dua na ka: “Mo solia mai na nomuni iyaragi kecega … raica keimami na vakabulai kemuni, ka laiva mo ni lako; ia mo ni kakua tale ni mai valuti keimami” se “kevaka ko sega ni solia mai na nomuni iyaragi, … au na vakaroti ira na noqu tamata me ra valuti kemuni” (Alama 44:6, 7). Au sa qai kila ni cakava tiko o koya na ka e tukuna vei au o noqu iliuliu meu cakava. “Solia vei ira e rua na digidigi, ka talevi ira tiko,” a kaya o koya. Niu sa taura rawa o ya, au sa qai cakava na itoko nei Moronai, “Sa vinaka, meda sa na vakaotia sara na ivalu oqo” (Alama 44:10).
Niu sa mai ivakayaragi ena ivakavuvuli au a vulica ena dua na italanoa mai na ivolanikalou baleta e dua na noqu tamata qaqa, au sa lesu ki na kalasi ena yalonudei ena noqu ituvatuva ni valu. Sa qai dua toka na noqu ivakatakarakara kei Kavetani Moronai, ka curu toka ena taga ni sote ena vo ni yabaki ni vuli me ivakananumi ni nona a vakavulici au o Kavetani Moronai meu gugumatua ena dua na kalasi ni itabagone. Niu solia e rua na digidigi vei ira na noqu gonevuli, sa vinaka mai na nodra itovo, era cakava na nodra itavi, ka keimami veimaliwai vinaka sara. Sa mai cava na yabaki, ka se dredre toka ga, ia na isau ni masu kei na kaukauwa ni ivolanikalou, sa rawa meu “vakaotia na ivalu.”