Pagtudlo Diha sa Pamaagi sa Manluluwas
Usa ka Magtutudlo Kinsa Motabang sa Pagluwas og mga Kalag
Ngano man nga naghatag og kahulugan ang Manluluwas kon giunsa Niya sa pagtudlo. Ang atong katuyoan may kalainan ba?
Moangkon ko nga kon maghunahuna ko bahin sa pagtudlo sa pamaagi sa Manluluwas, mas akong tutokan kon giunsa Niya sa pagtudlo. Unsay Iyang gihimo? Sa unsang paagi nga Siya makig-istorya sa mga katawhan? Sa tanan, Siya man ang gamhanang magtutudlo! Apan kon gusto natong magtudlo nga sama Kaniya, importante nga masabtan kon nganong Siya nagtudlo. Sa kinatibuk-an, kanang “ngano” ang makahimo sa tanang kalainan alang kanato ug niadtong atong tudloan.
Kon magtudlo ang Manluluwas, ang Iyang katuyoan dili ang pagpukos sa oras o paglingaw o paghatag og daghang impormasyon. Ang tanan Niyang gibuhat—lakip sa pagtudlo—gituyo aron sa paggiya sa uban ngadto sa Iyang Amahan. Ang tibuok tinguha ug misyon sa Manluluwas mao ang pagluwas sa mga anak sa Langitnong Amahan (tan-awa sa 2 Nephi 26:24). Sa atong pagpaningkamot sa pagtudlo sama sa Iyang nahimo, makat-on kita nga madasig sa samang katuyoan nga nakadasig Kaniya.
Sa laing pagkasulti, sa pagtudlo sa pamaagi sa Manluluwas mao ang pagkahimong magtutudlo kansang katuyoan mao ang pagluwas sa kalag.
Ang Tinguha sa Pagluwas sa Uban
Usa sa akong paborito kaayo nga istorya diha sa Basahon ni Mormon nagsaysay bahin sa mga anak ni Haring Mosiah sa pagbiya sa gingharian sa mga Nephite aron sila maka-establisar sa gingharian sa Dios taliwala sa mga Lamanite. Ilang gibiyaan ang yutan-ong gingharian alang sa gingharian sa langit. Ilang gibiyaan ang kaharuhay sa kasigurohan taliwala sa mga Nephite aron sa pag-adto sa ilang mga kaaway, ang mga Lamanite, nga sila “unta makaluwas sa pipila sa ilang mga kalag” (Alma 26:26).
Unsa man ang nakapadasig niining mga sulugoon sa Ginoo? “Sila dili makatugot nga bisan usa ka kalag sa tawo nga malaglag, oo, gani sa hunahuna nga bisan usa ka kalag mag-antus sa walay katapusan nga kahasol nga makahimo kanila sa pag-uyog ug pagkurog” (Mosiah 28:3). Kana nga pagdasig nakapalahutay kanila sa “daghan nga mga kasakit” (Alma 17:5, 14).
Kini nga istorya kanunayng nakapadasig kanako sa paghunahuna, Gibuhat ba nako kutob sa mahimo aron madala ang uban ngadto ni Kristo? Igo naba ang akong pagtutok diha sa pagluwas sa mga kalag?
Ang pagkahimong usa ka Magtutudlo Kinsa Motabang sa Pagluwas og mga Kalag
Kon kita magtinguha sa pagtudlo tungod sa samang rason sa Manluluwas, ang mga baruganan sa giunsa Niya sa pagtudlo adunay makuha nga mas dako og kahulugan. Labaw pa kaysa mga teknik, nagsilbi kini nga mga sumbanan aron mahisama Kaniya. Kon kita makanunayon sa paggamit sa mosunod nga mga ideya, ingon man ang uban nga makaplagan sa Pagtudlo diha sa Pamaagi sa Manluluwas, dili lamang kita makatudlo nga mas sama Kaniya apan mahimong mas mahisama pa Kaniya.
Tinguhaa og Sayo ang Pagpadayag
Aron makatabang sa buhat sa pagluwas og mga kalag, nagkinahanglan kita og pagpadayag. Moabut ang pagpadayag “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto” (2 Nephi 28:30)—ug kana nagkinahanglan og panahon. Busa sugdan nato pag-andam og sayo ug atong tinguhaon ang pagpadayag sa kanunay.
Higugmaa ang mga Tawo
Ang gugma mahimong ang labing gamhanang paagi sa magtutudlo nga makatabang sa pagluwas og mga kalag. Mahimong ingon lang kini ka simple sama sa pagkahibalo sa ngalan sa sakop sa klase, kumustahon sila bahin sa ilang semana, sultihan sila kon unsa ka nindot ang pakigpulong nga ilang nahatag, o i-congratulate ang ilang dakong kalamboan o nakab-ot. Ang pagpakita og kainteresado ug gugma makapabukas sa mga pagbati ug makatabang niadtong atong gitudloan nga mobati sa Espiritu Santo.
Pangandam sa Pagtudlo uban sa Paghunahuna sa mga Panginahanglan sa Tigkat-on
Ang magtutudlo kinsa motabang pagluwas og kalag nag-focus sa mga tigkat-on. Samtang magribyu kita sa mga materyal sa leksyon, atong tutukan kon unsa ang labing maayo sa pagkab-ot sa ilang panginahanglan ug dili ang atoa. Atong kalimtan ang bahin sa pagpupos sa oras ug tutokan ang pag-impluwensya sa mga kasingkasing ug hunahuna. Atong hunahunaon dili lang kon unsa ang atong isulti ug buhaton, apan unsa ang isulti ug buhaton sa mga tigkat-on. Gusto nato nga sila ang mopakigbahin sa ilang mga ideya tungod kay makapalig-on kini sa panaghiusa, mobukas sa ilang mga kasingkasing, ug makatabang nila sa paggamit sa ilang hugot nga pagtuo.
Padayona ang Pagtutok sa Doktrina
Komon kini sa mga matutudlo ang pagtimbang-timbang sa ilang ka-epektibo pinaagi kon unsa ka dako ang partisipasyon nga ilang nadasig, apan usa lamang kana ka elemento sa kasinatian. Kon atong klase dunay daghang pagpakigbahin apan gamay ra sa mga doktrina, kita nakahatag lang sa unsay gitawag ni Elder Jeffrey R. Holland sa Korum sa Napulog Duha ka mga Apostoles og “theological Twinkie [mubo nga pagtagbaw sa teolohiya].” Gihatag nato ang butang nga mga maayo, apan napakyas kita sa pag-amuma sa mga sakop sa atong mga klase uban sa maabagon nga gahum sa doktrina.
Si Propeta Joseph Smith mitudlo, “Ang usa ka tawo dili ingon kadali maluwas gawas kon siya may kahibalo.”1 Kinahanglang tabangan nato kadtong atong gitudloan nga makabaton sa labing importanting matang sa kahibalo—ang doktrina ni Jesukristo.
Kon kita ug ang sakop sa klase mopakigbahin sa atong mga hunahuna ug pagbati, kanunay gayud nato kining ibalik ngadto sa mga kasulatan ug ngadto sa mga pulong sa mga propeta sa ulahing mga adlaw. Bag-ohay lang, si Brother Tad R. Callister, Presidente sa Kinatibuk-ang Sunday School, mitudlo: “Ang sulundon nga magtutudlo kanunayng naningkamot nga matakdo ang mga komentaryo sa klase ngadto sa doktrina. Sama pananglit, ang magtutudlo mahimong moingon nga, ‘Ang kasinatian nga inyong gipakigbahin nagpahinumdom kanako sa usa ka kasulatan.’ O, ‘Unsa nga mga kamatuoran sa ebanghelyo ang atong makat-unan gikan sa mga komentaryo nga atong nadungog?’ O, ‘Aduna bay ganahang mopamatuod sa gahum niana nga kamatuoran nga ato lang gihisgutan?’”2
Dapita ang Espiritu Santo sa Pagpamatuod
Ang magtutudlo kinsa nagtabang sa pagluwas og kalag nakasabut nga unsay atong gisulti ug gibuhat isip mga magtutudlo gituyo aron sa pagdapit sa impluwensya sa Espiritu Santo ngadto sa mga kinabuhi sa uban. Ang Espiritu Santo mao ang magtutudlo. Usa ka tahas sa Espiritu Santo mao ang pagpamatuod sa kamatuoran, ilabi na mahitungod sa Amahan ug sa Anak. Busa samtang magtudlo kita mahitungod Kanila ug sa Ilang ebanghelyo, kita modapit sa Espiritu Santo aron mopamatuod ngadto sa mga sakop sa klase. Hangtud nga sila motugot niini, ang Iyang gahum naglig-on sa ilang mga pagpamatuod ug mousab sa ilang mga kasingkasing. Ang Iyang pagsaksi mas gamhanan kay sa panan-aw.3
Dapita ang mga Tigkat-on sa Pagkat-on ug Paglihok alang sa ilang Kaugalingon
Ako ang bag-ohay lang nga anaa sa usa ka klase sa Sunday School diin ang magtutudlo misugod pinaagi sa pagpangutana sa mga sakop sa klase sa pagpakigbahin og butang nga makahuluganon ngadto kanila samtang sila nagbasa niana nga assignment sa semana gikan sa mga kasulatan ug sa unsang paagi ila kining nagamit sa ilang mga kinabuhi. Nakagiya kini sa usa ka gamhanang diskusyon bahin sa mga hunahuna ug sa ilang nadiskubrihan sa ilang kaugalingon. Natural lang kaayo sa magtutudlo ang pagdugang ngadto niining paghisgutanay sa mga punto sa doktrina nga iyang giandam sa pagtudlo. Nakadayeg kaayo ko kon giunsa niya pag-focus sa pag-awhag ang iyang mga sakop sa klase nga makasinati sa gahum sa pulong sa Dios sa ilang mga kaugalingon.
Ang atong tumong isip mga magtutudlo dili lamang sa pagbaton og kasinatian sa klase o sa pagpupos sa oras o sa paghatag og nindot nga leksyon. Ang tinuod nga tumong mao ang pag-agak sa uban sa ilang panaw balik sa atong Langitnong Amahan ug ni Jesukristo. Ang atong tumong mao nga mahimong mga magtutudlo kinsa motabang sa pagluwas og mga kalag.