Mensahe sa Visiting Teaching
Aron nga Sila Mausa
Tun-i sa mainampuong paagi kining materyal ug pagtinguha sa inspirasyon aron masayud unsay angay nga ipakigbahin. Sa unsang paagi ang pagsabut sa katuyoan sa Relief Society nag-andam sa anak nga mga babaye sa Dios alang sa mga panalangin sa kinabuhing dayon?
“Si Jesus nakakab-ot sa hingpit nga panaghiusa ngadto sa Amahan pinaagi sa pagtugyan sa Iyang Kaugalingon, sa unod ug espiritu, ngadto sa kabubut-on sa Amahan,” mitudlo si Elder D. Todd Christofferson sa Korum sa Napulog Duha ka mga Apostoles.
“… Sa pagkatinuod dili kita mahiusa sa Dios ug ni Kristo hangtud nga atong himoon ang Ilang kabubut-on ug kagustohan nga maoy atong pinakadakong tinguha. Ang ingon ka pagkamanunuton dili mahitabo sa usa ka adlaw, apan pinaagi sa Balaang Espiritu, ang Ginoo maoy motudlo kanato kon kita mouyon hangtud, sa pagdagan sa panahon, mamahimong tukma ang pag-ingon nga Siya anaa kanato ingon nga ang Amahan anaa Kaniya.”1
Si Linda K. Burton, Kinatibuk-ang Presidente sa Relief Society, mitudlo kon unsaon sa pagbuhat niini nga panaghiusa: “Ang paghimo ug pagtuman sa atong mga pakigsaad usa ka pagpahayag sa atong pasalig nga mahisama sa Manluluwas. Ang importante nga maningkamot alang sa mga kinaiya nga gipahayag diha sa pipila ka mga pulong sa paboritong himno: ‘Moadto ko kon asa ko nimo paadtoon. … Mosulti ko kon unsay imong ipasulti. … Ako mamahimo kon unsay imong gusto nga ako mamahimo.’”2
Si Elder Christofferson mipahinumdom usab kanato nga “samtang maningkamot kita sa matag adlaw ug sa matag semana sa pagsunod sa ehemplo ni Kristo, ang atong espiritu magpatigbabaw sa iyang kahalangdon, ang pakigbisog diha sa atong kaugalingon mismo magkahinay, ug ang mga pagtintal mohunong sa paghasol.”3
Si Neill F. Marriott, Ikaduhang Magtatambag sa Kinatibuk-ang Kapangulohan sa Young Women, naghatag og pagpamatuod sa mga panalangin sa pagpaninguha sa pagpahiangay sa atong kabubut-on sa kabubut-on sa Dios: “Naningkamot kong mawala ang mortal nga tinguha sa pagbaton og mga butang sa akong pamaagi, sa katapusan nakaamgo nga ang akong pamaagi kulang ra, limitado, ug ubos ra kaayo kay sa pamaagi ni Jesukristo. ‘Ang paagi sa [atong Langitnong Amahan] mao ang dalan paingon sa kalipay dinhi niini nga kinabuhi ug sa kinabuhing dayon sa kalibutan nga moabut.’”4 Mapainubsanon kitang maningkamot nga mahimong usa uban sa atong Langitnong Amahan ug sa Iyang Anak, nga si Jesukristo.
Dugang nga mga Kasulatan ug Impormasyon
Juan 17:20–21; Mga Taga-Efeso 4:13; Doktrina ug mga Pakigsaad 38:27; reliefsociety.lds.org
Hugot nga Pagtuo Kahupayan Pamilya