Hangtud sa Sunod Natong Panagkita
Sila nga Katapusang Nagkarwahe
Gikan sa usa ka pakigpulong sa kinatibuk-ang komperensya sa Oktubre 1947, “Ngadto Kanila sa Katapusan nga Nagkarwahe.”
Nianang katapusang nagkarwahe anaa ang debosyon ug pagkamaunungon ug integridad ug, labaw sa tanan, hugot nga pagtuo diha sa Kaigsoonan ug sa gahum sa Dios.
Litrato gikan sa © Getty Images
Gusto kong mosulti og usa ka butang bahin sa katapusang nagkarwahe sa matag tag-as nga kutay sa mga karwahe nga hinayng nagbiyahe diha sa kapatagan. …
… Balik sa katapusan nga nagkarwahe, dili sa kanunay nga ilang makita ang Kaigsoonan nga nangulo, ug ang asul nga kalangitan kanunayng dili nila makit-an kay natabunan sa ka baga sa nagpanganud nga abug sa dalan. Apan sa matag adlaw, sila nga katapusang nagkarwahe mipadayon sa unahan, luya ug gikapoy, naghapdos ang mga tiil, usahay hapit mawad-an na sa kadasig, inabagan sa ilang hugot nga pagtuo nga ang Dios nahigugma kanila, nga ang gipahiuli nga ebanghelyo tinuod, ug nga ang Ginoo migiya ug midirekta sa Kaigsoonan didto sa unahan. Usahay, sila nga naa sa katapusang karwahe daklit nakakita, sa dihang ang hugot nga pagtuo miabut sa labing lig-on, ang himaya sa celestial nga kalibutan, apan mora kini og layo ra kaayo, ug ang panan-awon daling nahanaw tungod sa panginahanglan sa lawas ug kaluya ug kawalay kadasig ug usahay ang kasagmuyo padayon nilang giantus.
Sa dihang nagkahanap ang panan-awon, ang ilang mga kasingkasing naguol. Apan nag-ampo sila pag-usab ug mipadayon, uban sa ginagmayng pagdayeg, walay daghang pagdasig, ug wala gayuy pasidungog. … Apan kanang katapusang nagkarwahe anaa ang debosyon ug pagkamaunungon ug integridad ug, labaw sa tanan, hugot nga pagtuo diha sa Kaigsoonan ug sa gahum ug kaayo sa Dios. …
Busa latas sa abug ug yuta, … sila miaginud hangtud, nakalabay sa mga ganghaan, ang walog miabi-abi kanila ug mihatag kanila ug panimalay nga kapahulayan. …
Apan gatusan niining maligdong nga mga kalag sa hugot nga pagtuo nga walay pagduha-duha ug talagsaong kahanas nga wala pa miabut sa katapusan sa ilang panaw.
Si Brother Brigham [Young] usab mitawag kanila sa pagdala sa bandila sa gingharian sa Dios ug mipadala kanila aron sa pagpahimutang diha sa mga walog, sa duol ug layo, [ang] dakong kabukiran nga kapasilongan. Mao nga sila mitaud pag-usab sa mga yugo sa ilang mga baka ug gipaguyod na usab ang ilang mga karwahe, ug … miaginud ngadto sa bag-ong mga walog, usab misalig sa hingpit nga hugot nga pagtuo diha sa kaalam ug sa balaang paggiya sa ilang Moises. …
Ug kining napulo ka liboan, gikan sa nag-una hangtud karon, ang tanang pinili sa Dios, nakatuman sa ilang calling ug kapalaran sa mapainubsanong paagi sama ni Brother Brigham ug sa uban, ug ang Dios mohatag kanila sa ganti. Sila mga pioneer sa pulong ug sa hunahuna ug sa buhat ug sa hugot nga pagtuo, gani ingon nga sama sila niadtong gitawag sa mas taas nga tawag. Sa pagbuhat niining mga pamuyo wala gihimo nga patago pinaagi sa pipila ka pinili nga mga tawo apan pinaagi kini sa daghan kaayong mga Mormon pioneer gikan sa mga kanasuran, kinsa miabut ug naghago, sa matinud-anong pagsunod sa ilang balaanong gitawag nga mga lider. …
Kini nga mapaubsanon apan bantugan nga mga kalag, … Mapainubsanon ako nga mopahinungod sa akong gugma, akong pagtahud, sa akong balaang pagtahud.