Inyong Pioneer nga Pagpanaw—sa Tinuoray, Dili Pakaaron-Ingnon
Ang Pagkahimong usa ka Santos sa Ulahing mga Adlaw Mao ang Pagkahimong Pioneer.
Mga paghulagway pinaagi ni Brooke Smart
Litrato sa Trek sa maayong kabubut-on ni Aaron West
Sa bata pa ko, usahay magpakaaron-ingon ko nga usa ka sikat sa sport. Nagpakaaron-ingnon ko nga makalupad ko. Nagpakaaron-ingnon ko nga usa ako ka higante. Malipayon kaayo ko sa akong kinabuhi, bisan tuod mubo ra ko, dili makalupad ug gamay lang ang kasarang sa pagka-atleta. Apan ang pagpakaaron-ingnon makalingaw. Malingaw ko nga makasinati og butang nga lahi, bisan kon kini imahinasyon lang. Tingali mao na ang hinungdan nga daghang tawo ang ganahan magpakaaron-ingnon.
Kabahin sa pagpakaaron-ingnon, kitang mga Santos sa Ulahing mga Adlaw ganahan moadto sa mga pioneer trek. Atong isul-ob ang sinina sa pioneer (kunohay). Atong guyoron ang mga kariton (maura-ura lang). Atong kaunon ang pagkaon sa pioneer (dili gyud, insakto). Dako kaayo ang atong paningkamot nga maparehas gyud sa mga pioneer. Ang nindot kaayong butang mao nga dili na kita kinahanglang magpakaaron-ingnon. Kita mga pioneer na.
Ang pagkahimong Santos sa Ulahing mga Adlaw mao ang pagkahimong usa ka pioneer, tungod kay ang ipasabut sa usa ka pioneer mao ang ‘tawo nga nag-una aron sa pag-andam o pagbukas og agianan aron mosunod ang uban.”1 Si Presidente Monson mitudlo kanato, pinaagi sa iyang mga pulong ug mga lihok, kon unsaon nga mahimong tinuod nga mga pioneer:
“Kita nagsunod sa mga lakang sa bantugang Pioneer—bisan ang Manluluwas—kinsa nag-una, nagpakita nato sa agianan nga sundon.
“‘Umanhi ka ug sumunod kanako,’ midapit Siya.”2
Umanhi ka … sumunod … kanako. Kining yano nga mga pulong makatabang kanato nga mahimong tinuod nga mga pioneer.
Atong susihon kini nga mga pulong gikan sa panglantaw sa pipila ka mga pioneer sa modernong panahon nga bag-uhay lang nakaadto sa pioneer trek sa stake.
“Umanhi ka, Sumunod kanako”
Ang pulong umanhi usa ka pagdapit. Nagsugyot kini og kalihokan gikan sa usa ka dapit ngadto sa lain. Si Taylor A. nasayud kaayo sa kahulugan niini nga pulong.
Si Taylor usa ka masanagon, malipayon, ug puno sa Espiritu, apan dali siya nga makasulti nimo nga kana nga mga pulong wala naghulagway niya duha na ka tuig ang milabay. Mibalhin na siya sa laing dapit karon, sa espirituwal ug sa pisikal nga paagi. Usa siya ka pioneer.
“Ako usa ka pioneer sa akong kinabuhi,” siya miingon, “tungod kay usa ako ka bag-ong kinabig. Ug ang akong panaw nindot kaayo. Akong gibati nga mora kini og usa ka bag-ong kinabuhi. Ug sa higayon nga masugdan na nato ang proseso sa atong panaw, ang mga milagro mahitabo.”
Dili lamang nasabtan ni Taylor ang pagdapit sa pagduol—nasayud pa gyud siya sa tinubdan sa imbitasyon. Naka-oberbar siya nga “Sa atong kalibutan, wala kaayo nato hatagi og pagtagad kon sa unsang paagi nga naa kita dinhi, dili ba? Nag-focus kita og maayo sa atong mga trabaho ug sa teknolohiya, ug ang mensahe nga ingon og importante gayud kaayo nako mao ang pag-una ni Kristo. Kon ato lang gayud sundon ang gibuhat sa mga pioneer—[sila] nakasentro diha kang Kristo.”
Sumunod laing pagdapit. Sa pioneer trek, si Ethan G. nakaangkon og labaw nga panabut niini nga pulong. “Usahay dili kaayo maayo ang akong bation sa trek, o nabati nako nga daw nasagmuyo,” miangkon siya. “Apan nakaamgo ko nga ang mga pioneer usab mibati sa ingon niana nga paagi.”
Naandan ni Ethan nga maghunahuna kon nganong ang mga pioneer andam sa paghimo sa unsay ilang gibuhat. Miingon siya, “akong gibati nga tingali miundang na ko. Apan samtang gihunahuna nako kana, morag nakaamgo ko nga kini tungod kay sila nahigugma sa Manluluwas, ug ilang naangkon ang paglaum nga sila mahimong mas maayo pinaagi Kaniya. Gusto usab nako kanang sulayan.”
Sa wala pa miadto si Ethan sa trek, gibasa niya ang mahitungod sa mga pioneer gikan sa nangagi, nabati ang koneksyon uban kanila, ug nadasig pinaagi sa ilang hugot nga pagtuo sa pagsunod ni Jesukristo. Ug unsa man ang gibuhat ni Ethan karon? Nangandam na siya sa pagdawat sa iyang call sa pagserbisyo isip usa ka full-time nga misyonaryo. Nagmasulundon sa tambag ni Presidente Monson, siya nag-andam sa pagpakita sa agianan aron sundon sa uban.
Asa man kami moduol? Kinsa man ang angay namong sundon? Ang Manluluwas nagsulti kanato: “Umanhi ka, sumunod kanako” (Lucas 18:22; emphasis gidugang). Sa dihang mibiya si Harmony sa balay alang sa trek, iyang nabatyagan ang impluwensya sa Ginoo sa iyang kasinatian. Nasayud siya nga nagsunod siya Kaniya.
Ang dalan ni Harmony ngadto sa iyang trek sa stake lahi gikan sa dalan sa uban. Sa edad nga 15 nakakat-on siya nga duna siyay talagsaon nga matang sa kanser sa panit. Dili siya makahimo sa pag-apil sa iyang trek sa stake. “Naguol ko og maayo,” siya nahinumdom.
Upat ka tuig ang milabay, sa dihang ang iyang stake mipahibalo og laing trek, si Harmony naayo na sa kanser. Apan sa edad nga 19, naghunahuna siya nga dili na siya makaadto. Dayon nakadawat siya og calling nga moapil isip usa ka lider. Miingon siya, “Usa kini ka pagpamatuod ngari nako nga ang Ginoo nakaila kinsa kita, ug nasayud Siya sa tinguha sa atong mga kasingkasing, ug kon kini matarung ug maayo, Siya mopanalangin kanato.”
Mitanyag og usa ka tambag si Harmony aron sa pagtabang kanato kon mag-atubang kita og mga pagsulay: “Ngadto ni bisan kinsa nga nanlimbasug, ako moingon lang salig sa Ginoo. Siya Kanunayng andam nga motabang alang kaninyo. Siya nahigugma kanato, ug Siya dili motugot nga mapakyas kita. Kinahanglan lang kita nga maghangyo alang sa Iyang panabang, ug motabang Siya kanato sa atong pioneer nga panaw.”
Mamahimo Kamong usa ka Pioneer
Kon dili gayud kamo moadto sa usa ka pioneer trek, mahimo gihapon kamo nga pioneer. Dili kinahanglan nga magsul-ob og usa ka bonnet o magguyod og karomata. Kinahanglan lang ninyong sundon si Jesukristo, sama sa gibuhat sa unang mga pioneer. Sa pagbuhat sa ingon, kamo mahimong, sama sa giingon ni Presidente Monson, “usa ka tawo nga nag-una aron sa pag-andam o pag-bukas sa agianan aron mosunod ang uban.”
Kon kamo makahigayon nga makaadto sa pioneer trek, pahimusli kini! Ug kon mahuman na kini ug inyo nang biyaan ang inyong kariton, ayaw ibilin ang inyong pioneer nga pagpamatuod sa sulod niini. Dad-a kana nga pagpamatuod uban kaninyo.
Kamo ang tinuod-buhi, nga pioneer sa modernong panahon. Uban sa pinakabantugan nga Pioneer—ang Manluluwas—isip inyong giya, sigurado ka nga molampus!