Desideria Yáñez: Usa ka Pioneer taliwala sa mga Kababayen-an
Human sa usa ka damgo nga migiya kaniya ngadto sa gipahiuli nga ebanghelyo, kining unang Santos sa Ulahing mga adlaw nga gikan sa Mexico nahimong usa ka lig-on nga pioneer sa Simbahan.
Mga paghulagway pinaagi ni Kathleen Peterson
Usa ka gabii sa sayo nga bahin niadtong 1880, si Desideria Yáñez komportabling nahikatulog sa pueblo didto sa kabungturan nga gitamnan og mga cactus sa Nopala, Mexico. Sa iyang pagdamgo, nakakita siya og usa ka pamphlet nga giulohan og Voz de Amonestación (Tingog sa Pasidaan) nga nakapausab sa iyang kinabuhi ug nagiyahan siya sa espirituhanong paagi. Sa pagmata, nakahibalo siya nga ang mga tawo nga nagmantala sa pamphlet anaa sa Siyudad sa Mexico.1 Nakahibalo usab siya nga imposible nga makabiyahe siya og 75 ka milya (120 km) ngadto sa siyudad, apan determinado siya sa pagsunod sa impresyon kabahin sa damgo ug makakaplag og solusyon.
Ang Hugot nga Pagtuo sa Pamilya
Gihisgutan ni Desideria ang iyang damgo sa iyang anak nga si José. Mituo siya kaniya ug mibiyahe padulong sa Siyudad sa Mexico sa iyang dapit. Matinguhaon siya nga nakig-istorya sa mga tawo ug sa katapusan nahimamat ang miyembro sa Simbahan nga si Plotino Rhodakanaty, kinsa mitudlo niya ngadto sa Hotel sa San Carlos.2
Didto sa hotel, nahimamat ni José si Elder James Z. Stewart nga nagkoriher sa gi-proof para sa pagprinta sa Voz de Amonestación, ni Parley P. Pratt, ang samang pamphlet nga nakita ni Desideria sa iyang damgo. Human nga nahisgutan ni José ngadto ni Elder Stewart ang damgo ni Desideria, ang misyonaryo mihatag ni José og pipila ka mga pamphlet sa Simbahan, gumikan kay ang Voz de Amonestación wala pa nahuman, ug si Elder Stewart misulat sa nindot nga panag-istoryahanay sa iyang journal.3
Paglabay sa daghang layo nga pagbiyahe sa abugon nga dalan, si José nahiusa uban sa iyang inahan. Sa pagkahibalo sa katinuod sa pamphlet, si Desideria nasayud nga ang damgo tinuod. Gitun-an niya og maayo ang mga pamphlet nga gidala ni José, ug ang naglangkob niini nga sukaranang pagtulun-an sa ebanghelyo nakapatandog sa iyang kalag. Nagtinguha siya nga mabunyagan.
Nakaplagan sa usa ka Misyonaryo
Tungod kay si Elder Stewart nagkompleto pa gihapon sa Voz de Amonestación, si Elder Melitón Trejo, usa ka misyonaryo sa Spain, ang gipadala ngadto sa Nopala aron sa pagpangita ni Desideria ug ni José. Niadtong Abril 22, 1880, si Elder Trejo mibunyag ni Desideria Quintanar de Yáñez, José Maria Yáñez ug anak nga babaye ni José si Carmen. Si Desideria ang ika-22 nga tawo nga nabunyagan sa Mexican Mission ug ang una nga babaye sa central Mexico.4
Sa wala madugay niana nga bulan, si José mibisita pag-usab sa Siyudad sa Mexico ug miuli sa balay nga dala ang 10 ka kopya sa Voz de Amonestación. Sa katapusan nakita ni Desideria ang pamphlet gikan sa iyang damgo. Alang kaniya ang pamphlet usa ka pisikal nga pahinumdom kon unsang paagi nga ang Ginoo personal nga mitabang kaniya ug nakadani niya sa gipahiuli nga ebanghelyo.
Ang Unang Spanish nga Basahon ni Mormon
Sa edad nga 72, nakamatngon si Desideria nga ang iyang panglawas nagkagrabe na. Pagka 1886 gipapuyo siya sa iyang gamay nga balay didto sa San Lorenzo duol sa Nopala. Usa ka makalilisang nga gabii, ang mga kawatan milungkab sa iyang balay, midagmal kaniya, ug miiskapo dala ang $3,000.5 Si Desideria naluwas. Imbis magmagul-anon, si Desideria mihulat uban sa hugot nga pagtuo alang sa tabang sa Ginoo. Nasayud na siya gikan sa iyang damgo nga ang Ginoo nakahibalo sa iyang sitwasyon.
Dayon niadtong Oktubre 1886, ang usa ka Apostol ug duha ka presidente sa misyon wala damhang mibisita sa dapit. Si José Yáñez misulti kanila bahin sa pag-antus sa iyang inahan. Ang mga kaigsoonan miadto dayon sa balay ni Desideria. Nalipay si Desideria sa pakighimamat ni Elder Erastus Snow sa Korum sa Napulog Duha ka mga Apostoles ug siya mibutang sa iyang mga kamot diha sa iyang ulo alang sa mga panalangin sa priesthood.
Atol sa pagbisita sa mga kaigsoonan, ang bag-ong presidente sa misyon, Horace Cummings, misurprisa ni Desideria sa importante nga mga balita. Siya misulti kaniya nga ang unang Basahon ni Mormon nga entirong gihubad sa Spanish hapit na makompleto didto sa Siyudad sa Salt Lake. Mihangyo dayon si Desideria og kopya sa umaabut nga kasulatan.
Usa ka bulan ang milabay, mibalik si Presidente Cummings sa balay ni Desideria nga nagdala sa kopya. Sa nasinati, siya misulat: “Mibisita sa tigulang nga si Sister Yáñez, nga may gihambin nga sakit ug mihatag kaniya og usa ka wala pa matahi nga Basahon ni Mormon diin akong dala gikan sa Utah. Mao kadto ang una sa Spanish nga nadawat didto sa Mexico. … Ingon og nalipay kaayo siya niini.”6 Mao kini ang katapusang pagbisita sa usa ka misyonaryo ni Desideria atol sa iyang tibuok kinabuhi.
Nabulag apan Wala Hikalimti
Pagka-1889, 10 lang ka tuig human ang gipahiuli nga ebanghelyo miabut sa central Mexico, ang mga lider sa Simbahan naaghat sa pagbalhin sa limitado nga mga kapanguhaan sa Simbahan sa pag-establisar sa pundok didto sa amihanang Mexico. Ang mga miyembro duol sa Siyudad sa Mexico, mga 1,000 ka milya (1,600 km) gikan sa mga kolonya, mibati nga sama sa karnero nga walay magbalantay sa pagbiya sa mga misyonaryo ngadto sa amihanan. Bisan og gilibutan gihapon sa iyang pamilya, nasayud si Desideria nga sila kinahanglan nga magpraktis sa ebanghelyo nga mag-inusara. Kini nagpasabut nga siya dili makaangkon og kaayohan sa pag-apil sa Relief Society o sa pagdawat sa mga panalangin sa templo samtang buhi pa.
Apan siya nahibalo nga ang Ginoo nakaila kaniya. Pinaagi sa Iyang mga sulugoon, ang Ginoo mipakita sa Iyang tinguha sa pagpangalagad sa usag usa sa Iyang panon. Tungod sa iyang damgo, mga panalangin sa priesthood, ug sa Basahon ni Mormon, si Desideria makapamatuod sa iyang hingpit nga kasigurohan nga ang Dios nag-atiman sa iyang espiritwal ug temporal nga mga panginahanglan. Bisan tuod kini nga kahibalo wala makapugong sa mga pagsulay ug mga hagit nga nahitabo sa iyang kinabuhi, kini mihatag kaniya sa pagsalig nga ang Ginoo kanunay mipagaan sa iyang mga palas-anon.
Usa ka Malungtaron nga Kabilin
Niadtong 1903, ang mga misyonaryo mibalik ngadto sa habagatang Mexico sa unang higayon sukad niadtong 1886. Nakighimamat sila kang José, kinsa miasoy sa paglahutay ni Desideria hangtud sa katapusan ug panulundon sa hugot nga pagtuo sa pag-ingon nga ang iyang asawa ug ang iyang inahan “namatay sa hingpit nga kamatinud-anon sa pagka-Mormon” ug nga siya adunay “paglaum nga mamatay nga Mormon.”7
Human sa iyang damgo, si Desideria misubay diha sa dalan sa ebanghelyo, nahimo nga usa ka Latina nga pioneer sa Simbahan. Ang mga binhi sa hugot nga pagtuo nga gitanom diha sa damgo niadtong 1880 wala makawang; migitib kini samtang mihimo si Desideria og pakigsaad sa bunyag ug nakalahutay sa iyang mga pagsulay uban sa hugot nga pagtuo. Sayon ra unta nga malayâ ang pagka-espirituhanon ni Desideria samtang gipraktis niya ug sa iyang pamilya ang ebanghelyo sa lugar nga layo sa Simbahan, apan siya mipadayon. Nasayud siya nga ang Dios nag-atiman ug nagbantay kaniya diha sa gamay nga bahin sa kalibutan.
Bisan og dili siya makabiya sa iyang panimalay, nahimo siya nga ehemplo sa hugot nga pagtuo, kakugi, pagkamasulundon, ug kalig-on dili lang sa iyang pamilya apan sa matag usa usab kanato nga nagtinguha sa pagpadayon sa diwa sa pioneer.