Ang Bugtong Butang Nga Nakaluwas Kanako
Ang tagsulat nagpuyo sa Tokyo, Japan.
Ang wala damhang panaghigalaay nakatabang kanako nga mausab ang akong kinabuhi gikan sa kangitngit ngadto sa kahayag.
Mga paghulagway pinaagi ni Pat Kinsella
Ang golf usa ka sikat nga sport sa Japan, mao nga nagsugod ko og dula niini sa 14 anyos pa ko isip paagi sa paggahin og panahon kauban sa akong papa. Makalingaw kadto sa sinugdanan, ug sa kadugayan nagsugod kong magpraktis nga ako ra ug midula sa golf team sa akong pag-high school. Nahimo kong higala sa akong mga ka-team ug coach, kinsa miawhag nako sa pagpadayon sa akong pangandoy nga mahimong propesyunal nga golfer.
Naningkamot ko og maayo, dili lang sa akong dula apan sa akong mga pagtuon, migradwar nga hapit sa kinatas-ang pwesto sa akong high school class.
Sa una nakong pagsulod og college, suod kaayo ko sa akong coach ug mga ka-team sa golf. Mas maayo sila kay kanako, mao nga naningkamot ko og maayo aron maparehas nila. Pipila sa mga miyembro sa team mikomentaryo sa lahi nakong ngalan, Shuho. Giingnan nako sila nga ang Koreana nakong lola mihatag niini kanako ug sa Korea nagpasabut kini nga “matahum nga bungtod.” Sukad niadto akong gibati nga ang kinaiya nila ngari kanako nausab, tungod sa milungtad og dugay nga tensyon sa mga henerasyon sa ubang taga-Japan ug Korea.
Nagsugod sila sa pagtawag kanako og “ang batang Koreano” ug miingon nga madaut nako ang maayong ngalan sa unibersidad. Kay sa makigdula sila nako og golf, ila na kong palimpyuhon sa mga kasilyas.
Mas makaluya na ang pagpakig-uban sa team. Kay layo ko sa panimalay, akong gibati nga nag-inusara lang ko. Naningkamot ko nga magpadayon sa akong pangandoy ug ibalik ang maayong pabor sa akong coach ug sa team, apan paglabay sa duha ka tuig, dili na nako madawat ang ngil-ad nilang pagtratar kanako, mao nga mipauli ko.
Pait kadto nga panahon para nako. Ang akong kaluya nakamugna og mga epekto sa hunahuna ug sa pisikal. Mikunhod ang akong pagsalig sa kaugalingon. Ang akong pangandoy nga mahimong propesyunal nga golfer naghinapos na. Wala na ko mahibalo unsay buhaton sa akong kinabuhi. Ug napungot ko. Napungot ko sa tanan: sa coach, sa akong mga ka-team, ug sa akong ma ginikanan. Napungot kaayo ko, ang akong mga hunahuna mihadlok kanako. Wala na koy mga higala, ug mibati nga wala ko makahimo sa pagsalig o pagpakig-uban sa ubang mga tawo. Sulod sa unom ka bulan, mibiya ko sa balay para lang mag-work out sa gym.
Atol niining pait nga bahin sa akong kinabuhi, akong nahigala si Justin Christy nga akong nahimamat sa gym. Sa una nakong pagkakita kaniya, nagtuo ko nga usa siya ka foreign-exchange student. Nagpanuko ko nga makig-istorya kaniya hangtud nga nakita nako siyang may kaistorya sa gym ug nakalitan ko nga nakadungog niya nga mosulti og Japanese. Wala gihapon ko mobati nga mosalig sa ubang tawo, apan misugyot siya nga magdungan mi sa training. Dunay lahing bahin kaniya nga nianang higayona wala nako masabti. Malinawon kaayo ko kon siya ang akong kauban. Naghinamhinam ko nga moabut ang dungan namo nga oras sa training. Nakakita ko og tawo nga gibati nakong kasaligan isip usa ka higala.
Human sa among training sulod sa pipila ka bulan, giimbitar ko ni Justin og panihapon nga kauban sa grupo nga kanunay niyang gihimo. Nagpanuko ko, apan human sa pipila ka pag-imbitar mihukom kong moadto nga usa diay kadto ka panihapon kauban sa mga young single adult sa balay ni Richard ug Corina Clark. Mainiton ang ilang pagtimbaya kanako dihang misulod ko sa ilang balay, si Brother Clark sa Japanese ug si Sister Clark sa Iningles. Wala ko kasabut kon unsay iyang gisulti, apan gisulayan nako siya sa pagtubag. Bisan tuod og ang kadaghanan nila dili makasulti og Japanese, mahigugmaon sila ug makalingaw nga grupo kinsa mga matimbayaon ug mahigalaon. Dunay daghang mga pagkatawa.
Nagsugod ko sa pagtambong og ubang mga kalihokan sa young single adult ug wala pa gyud ko malingaw og sama niini kauban sa ubang mga tawo sa akong kinabuhi sukad. Naghunahuna ko kon unsay anaa niining mga tawhana nga naghimo nilang maanindot ug mahigalaon.
Niining panahona si Justin nangutana nako kon unsay akong gusto sa akong kinabuhi. Nasurprisa ko sa pagkakaplag nga nagsugod sa pagkausab ang mga tumong sa akong kinabuhi. Giingnan nako siya nga gusto kong makakat-on og Iningles ug gusto kong mahimong higala sa tanan sama kaniya. Gisultihan ko niya sa libre nga klase sa Ingles sa iyang simbahan. Miadto ko sa English class ug nahimamat ang mga misyonaryo. Bisan tuod og wala pa gyud ko maghunahuna mahitungod sa Dios, akong gibati nga kinahanglan kong maminaw sa mga misyonaryo. Gitudloan ko nila sa mga mahinungdanong mga butang sa ebanghelyo ug gitawagan ko nila hapit matag adlaw. Nahimo nako silang maayong mga higala, nga naghimo nakong tinuoray nga malipayon tungod kay wala pa koy daghan kaayong higala.
Nagsugod kong makahimamat og daghang miyembro sa Simbahan nga miadto sa mga leksyon sa misyonaryo uban nako ug nahimo nakong maayong mga higala. Gitudloan ko nila sa ebanghelyo ug mipakita og ehemplo kanako. Gisultihan ko ni Justin mahitungod sa Basahon ni Mormon ug gisuginlan ko niya og mga istorya gikan niini nga gusto na hinoon kong mobasa niini sa akong kaugalingon. Laing higala, si Shingo, kinsa sinati na kaayo, mihisgot kanako sa mga doktrina sa paagi nga sayon ra nakong masabtan. Kanunay siyang mopaambit sa iyang pagpamatuod sa katapusan sa among pag-istoryahanay.
Nakakaplag ko og butang nga akong katuohan ug usa ka dapit nga akong gibati nga ako nahisakop. Human ko gibunyagan ug gikumpirmahan, nagsugod ko sa paghunahuna mahitungod sa pagserbisyo og misyon, apan nabalaka ko sa pagpahinungod og duha ka tuig niini. Nakigsulti ko og daghang tawo mahitungod sa pagserbisyo og misyon, ilabi na sa akong mga higalang returned missionary. Kanunay kong naghunahuna niini, ug akong naamguhan nga ang ebanghelyo mao ra ang butang nga makaluwas kanako.
Nahibalo ko nga gihatagan ko sa Dios sa tanan: akong mga pangandoy, paglaum, mga higala, ug ilabi na sa gugma. Ang ebanghelyo nakatabang kanako nga makagawas sa kangitngit ngadto sa kahayag.
Giunsa Nako sa Pagpaambit ang Ebanghelyo kang Shuho
Ni Justin Christy
Sa dihang akong nahimamat si Shuho sa gym, miingon siya nga gusto siyang makakat-on og Iningles ug moadto sa golf exchange program. Gisultihan nako siya mahitungod sa mga klase sa Ingles sa simbahan, apan mikabat og pipila ka semana una kami nakatambong. Mintras tanto, samtang nag-work out mi sa gym, naghisgot mi og daghan bahin sa ebanghelyo, sa Basahon ni Mormon, ug mahitungod sa kinabuhi sa kinatibuk-an.
Ang panaghigala ug mga ehemplo sa mga miyembro sa Simbahan nga iyang nahimamat nakakuha sa iyang pagtagad ug nakatabang sa iyang pagkat-on sa ebanghelyo. Ang Espiritu mao ang migiya sa panagsultihay; ang tanan namong gihimo mao ang paghatud sa mensahe ug pagsuporta sa mga tawo samtang sila mismo ang mopili alang sa ilang kaugalingon.
Sagad nga makaluya gayud para nako ang paghunahuna mahitungod sa pagpaambit sa ebanghelyo. Apan akong nakita nga kon kita moabli lang sa atong ba-ba sa ensaktong panahon, makaangkon kita og misyonaryong mga oportunidad. Ang kinahanglan lamang natong buhaton mao ang pag-imbitar og mga tawo sa mga kalihokan sa simbahan o sa miting. Kon abli ang atong hunahuna, kanunay nga dunay mga oportunidad nga mapaambit ang ebanghelyo.