Mga Tingog sa mga Santos sa Ulahing mga Adlaw
Nahupay human Makuhai
Paghulagway pinaagi ni Allen Garns
Dise-otso ka semana sa akong ikaupat nga pagmabdos, nakamata ko nga dihay gamay nga pagdugo. Nabalaka ko sa dihang ang pagdugo wala mohunong, busa nakahukom ko nga moadto sa emergency room.
Atol sa taas nga biyahe padulong sa ospital, naglaum ug nag-ampo ko nga ang tanan OK ra. Ang pinakagrabe, naghunahuna ko nga ang doktor moingon nga mopahulay ko og daghang mga adlaw.
Sa dihang ako na-admit sa ospital, ang kawani mipahigayon og daghang mga test. Ilang nakaplagan nga wala magpitik ang kasingkasing sa bata. Ang dayagnos mao ang “puya namatay.” Ang doktor wala nay mahimo pa nianang puntuha, mao nga gipagawas na lang ko niya sa ospital.
Mipauli ako nga mibati og kaguol ug kahadlok. Wala ko makatulog nianang gabhiona. Sa dihang mibangon ko pagkabuntag, nadasig ko pagtambong og sayo sa buntag nga sesyon sa endowment sa templo.
Sa hapit na mahuman ang sesyon, ang akong mata nagtutok sa mga wedding ug engagement ring nga anaa sa akong tudlo. Iya kini sa apohan sa tuhod nga babaye nga ako gipangalanan. Namatay siya sa dihang singko anyos pa ko, ug bag-ohay lang akong nabasa ang iyang istorya sa kinabuhi. Akong nahinumduman nga siya nakasinati nga nakuhaan og makadaghan sa dihang nag-edad pa siya og 20.
Tibuok buntag akong nakigbisog batok sa luha sa kaguol ug kahadlok, apan nianang higayona, akong gibati ang panahon sa kalinaw. Gibati nako nga nahupay. Si lola namatay nga miagi sa susama nga mga pagsulay sa iyang kinabuhi, ug ang Manluluwas mitabang niya. Akong gibati ang kasiguroan nga Siya motabang usab kanako.
“Siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayud sumala sa unod unsaon pagtabang ang iyang mga katawhan sumala sa ilang mga kahuyang.” (Alma 7:12).
Mapasalamaton kaayo ko sa kalinaw nga miabut tungod sa pagtambong sa templo, alang sa usa ka kabilin sa matinud-anon nga mga katigulangan, ug labaw sa tanan, tungod sa maulaong sakripisyo sa Manluluwas nga si Jesukristo.