Mga Tingog sa mga Santos sa Ulahing mga Adlaw
Walay Kwarta apan Puno sa Pagtuo
Paghulagway pinaagi ni Carolyn Vibbert
Human makaserbisyo sa Philippines Cagayan de Oro Mission, determinado ko nga mosunod sa tambag sa propeta ug mga apostoles nga magminyo sa templo. Kadaghanan sa akong dili miyembrong mga paryente ug mga higala, ug gani pipila ka mga miyembro, miingon nga kinahanglan una kong makaangkon og degree sa kolehiyo o makatrabaho og nindot sa dili pa maghunahuna og minyo. Wala ko niining duha dihang na-engage ko.
Gikulbaan ko, apan akong nahinumduman ang istorya mahitungod ni Presidente Gordon B. Hinckley (1910–2008) sa dihang nakadawat siya og mission call sa England. Nangandam siya sa pagbiya taliwala sa ekonomikanhong kalisud ug mga kabalaka nga mihasol kaniya. Sa dayon na niyang paglakaw, gihatagan siya og kard sa iyang papa nga may lima ka pulong nga gisulat: “Ayaw kahadlok, sumalig ka lamang” (Marcos 5:36). Usab akong nahinumduman ang mga pulong sa akong bishop: “Batuni ang hugot nga pagtuo. Mohatag ra ang Dios.” Kining mga pulonga naghatag kanako og kaisug ug kalig-on nga mopadayon.
Bisan og wala koy kwarta, nakigminyo ko sa mapinanggaon nakong pangasaw-unon sa Manila Philippines Temple. Wala madugay nakasugod ko og trabaho sa usa ka kompaniya nga gikinahanglan nga motrabaho ko og Dominggo. Gusto kong mobalaan sa Adlawng Igpapahulay, mao nga wala ko magdugay niini nga trabaho. Daghan ang nahibulong nganong mihunong ko sa trabaho, apan nagpadayon ko, gibalik-balik sa akong kaugalingon ang mga pulong nga “Batuni ang hugot nga pagtuo. Mohatag ra ang Dios.”
Nagsugod ko nga mag-drive og jeep ug nagtrabaho nga sales agent para sa nag-una namong mga panginahanglan ug sa pagpangandam para sa una namong umaabut nga anak. Nabantayan sa akong asawa nga naluya kaayo ko sa pagpaningkamot nga makasangkap sa among pamilya. Miingon siya nga kinahanglan kong moeskwela og balik, apan naghunahuna ko nga lisud magtrabaho, magserbisyo sa Simbahan, ug mahimong usa ka estudyante.
Husto gyud ko; nga kini lisud. Apan gihimo namo ang tanan nga pagtuman sa mga sugo. Sa kasagaran kulang ang among kwarta, apan sa tabang sa Perpetual Education Fund sa Simbahan, nakahuman ko sa akong edukasyon sa wala pa matawo ang ikaduha namong anak. Nakatrabaho ko isip high school teacher ug sa kadugayan nahimong seminary and institute coordinator.
Sa pagsunod sa tambag sa propeta ug ubang mga lider sa Simbahan natabangan ko nga makahibalo nga ang kaminyoon maghatag og talagsaong mga oportunidad para sa espiritwal nga kalamboan ug kahingkod. Napanalanginan ko tungod sa akong kaminyoon ug sa ebanghelyo.
Dili kita angayang mahadlok, bisan anaa sa mga kahimtang nga pinakalisud. Kinahanglan lang nga buhaton nato ang atong pinakamaayo ug hinumduman kining mga pulonga: “Batuni ang hugot nga pagtuo. Mohatag ra ang Dios.”