Ang Tinuod nga Milagro
Ang tagsulat nagpuyo sa Utah, USA.
Ang impluwensya sa Ginoo dili lamang makita sa pagkaayo ni Paola apan diha usab sa pagkakabig sa iyang amahan sa ebanghelyo.
Paghulagway pinaagi ni Keith Larson
Unsa ang nahitabo kang Paola Yáñez, sumala sa iyang doktor, usa ka medikal nga milagro. Sa Quito, Ecuador, ang kahimtang sa tin-edyer kalit lang milambo, nahatagan siya og kidney sa iyang amahan, ang operasyon sa pag-transplant nagmalampuson, ug siya anaa na sa ikaduhang kahigayunan sa kinabuhi.
Apan miingon si Marco Yáñez, ang iyang amahan, nagsaysay nga ang nahitabo kaniya sama ra gihapon ka talagsaon. Nakaplagan niya ang ebanghelyo, ug ang kausaban nga nahimo niini sa iyang kinabuhi naghatag usab kaniya og ikaduhang kahigayunan.
Usa ka kaso nga nephritis sa pagkabata pa ang miguba sa pantog ni Paola, apan ang medisina nakatabang kaniya nga mabuhi. Sa pag-edad niya og 15, hinoon, ang iyang kondisyon migrabe. Ang usa ka kidney napakyas na, ug ang usa paspas kaayo ang pagkadaut. Bisan pa man sa pagpa-dialysis, si Paola naghingutas na. Mahimo lang siyang moinum og usa ka baso nga tubig sa usa ka adlaw, ug ang iyang mga lihok pinugngan kaayo tungod kay naapektohan ang iyang baga, pancreas, ug kasingkasing.
Imposible na ang pagdala kaniya ngadto sa Estados Unidos o Cuba alang sa transplant—kinahanglang mangita og modonar didto sa Ecuador. Sa mga test nakita nga ang iyang amahan dili mahimong modonar. Ang iyang inahan mahimo, apan nasuta sa doktor nga ang resulta sa dialysis nakapasaka og maayo sa antibodies ni Paola nga ang pagtransplant dili madawat. Nag-ampo si Paola nga sa bisan unsang paagi maluwas ang iyang kinabuhi.
Niining puntoha, niadtong Hunyo 1988, ang mga misyonaryo sa Santos sa Ulahing mga Adlaw nanuktok sa pultahan sa pamilyang Yáñez. Ang inahan ni Paola, si Carmen, nahinumdom nga siya ang nagdapit kanila aron siya makabiay-biay kanila. Sa dihang miingon sila ngadto kaniya nga duna silay mensahe nga makatabang kaniya, nasuko siya nga miingon, “Unsaon gud ninyo pagtabang nako kon ang akong anak padulong nang mamatay? Dili ko motuo nga dunay Dios!”
Bisan pa sa inisyal nga pagdumili ni Carmen, ang mga misyonaryo nagpadayon sa pagbisita sa pamilya. Sa sinugdanan mibati si Marco nga okupado ra kaayo siya sa pag-atiman sa iyang anak para matagad niya ang mga misyonaryo. Apan sa katapusan naminaw siya, tungod sa kakuryuso. Iyang nakita nga natubag nila ang iyang mga pangutana kabahin sa katuyoan sa kinabuhi.
Si Marco wala magtuo sa usa ka personal nga Dios. Alang kaniya, ang Dios tinubdan alang sa tanan nga kusog o usa ka dako, layo nga binuhat nga wala makiglambigit sa katawhan. Apan sa dihang ang kahimtang sa iyang anak anaa na sa labing kritikal, nag-ampo siya, naghangyo sa Dios sa pag-ayo sa iyang nag-antus nga anak o kuhaon siya. Miampo siya, “Kon anaa man Ikaw, palihug ipakita kanako. Palihug ihatag kanako ang kinabuhi sa akong anak.”
Pagkahuman sa iyang pag-ampo, kusog ang pagbati ni Marco nga mausab ang kahimtang ni Paola. Mihangyo siya sa doktor nga sublion ang pagtest niya ug sa iyang anak. Sila misulti kaniya nga ang pag-test mag-usik lang sa panahon, apan miuyon sila nga buhaton kini.
Ilang nasuta nga si Marco sa tinuod lang maka donar—ug nga ang kahimtang ni Paola milambo nga igo gyud nga makadawat sa pag-transplant!
Sa adlaw sa wala pa ang operasyon, si Marco ug Paola midawat sa mga panalangin sa priesthood gikan sa mga misyonaryo.
Si Marco ug Paola gilauman nga maulian na didto sa hospital human sa ilang operasyon. Apan si Marco nakabiya paghuman sa lima ka adlaw, ug si Paola, kinsa gilauman nga maanaa sulod sa duha ka bulan, mibiya human sa 13 lang ka adlaw. Gipahinungod ni Marco ang ilang pagkaayo ngadto sa ilang mga panalangin sa priesthood, ug nasayud siya nga kinahanglan nga iyang seryusohon ang pagpaminaw sa mensahe sa mga misyonaryo.
Si Marco ug Carmen Yáñez nabunyagan niadtong Septyembre 11, 1988. Si Paola, kinsa nakadungog sa mga leksyon sa misyonaryo sa wala pa siya operahe, ug ang iyang manghud nga babaye, si Patricia, nabunyagan niadtong Nobyembre 3. Nianang higayuna ang ilang amahan nakadawat na sa Aaronic Priesthood ug nakahimo sa pagbunyag kanila.
Si Brother Yáñez nagtuo nga ang Ginoo mitubag sa iyang pag-ampo ug mitugot kaniya nga makadonar ni Paola aron mausab ang iyang kasingkasing. “Kon ilaha pang-gipaoperahan ang akong asawa imbis ako, nagtuo ko nga maingon ra niana ang akong kinabuhi,” miingon siya. Dili kadto ang kinabuhi nga iyang ikapasigarbo—pag-inom, panigarilyo ug pagsugal. Iyang gibuntog ang iyang pagkaadik, miingon siya, tungod sa mga tubag nga nadawat niya sa iyang pag-ampo. Apan lisud kaayo kadto; siya miila nga ang Dios lamang ang nakatabang kaniya sa pag-usab.
Si Brother Yáñez miingon nga siya aduna nay usa ka lig-on nga pagpamatuod sa Pulong sa Kaalam ug sa balaod sa ikapulo. Sa dihang gitudloan pa siya sa mga misyonaryo, abli ang iyang patigayon tibuok semana aron makabayad sa $1,000 U.S. kada bulan sa pagpatambal ni Paola. Ang balaod sa ikapulo “lisud kaayo nakong dawaton,” miingon siya, apan mihukom siya sa pagbalaan sa adlawng Igpapahulay ug sulayan ang saad sa Malaquias 3:10 pinaagi sa pagbayad sa ikapulo. Sa dihang gisirad-an niya ang iyang tindahan sa mga Dominggo, miingon siya nga, “kadtong mga naanad mamalit sa Dominggo namalit sa Sabado—ug namalit sila og mas daghan.” Karon mas maayo ang iyang pangwarta kay sa higayon nga naninda siya pito ka adlaw sa semana.
Dihang naglantaw og balik si Marco Yáñez, nasurprisa siya sa mga kausaban sa iyang kaugalingon. Nakaamgo siya nga ang iyang mga pangamuyo alang sa kinabuhi sa iyang anak midala sa iyang pamilya ngadto sa usa ka lebel sa pagka-espirituhanon nga wala niya damha nga mahimo.