Unsaon nako sa pagbalanse ang dili pagpanghukom sa uban ug dili pagbaliwala sa sala?

Gisugo kita sa pagpasaylo sa uban ug isalig sa Dios ang paghukom (tan-awa sa D&P 64:9–11), apan wala kini magpasabut nga tugutan ang pagpakasala. Kon kauban kita sa uban nga nagbuhat sa masalaypong kinaiya, kinahanglan nga kita mao ang ilang kahayag ug mobarug unsay ensakto. Sa pinakaminus, nagpasabut kini sa pagpakita og maayong ehemplo pinaagi sa dili pagbuhat sa sala ug dili mobutang sa atong kaugalingon sa kwestyunabling mga sitwasyon o pundok. Apan kinahanglan ba nga atong isulti ang ngil-ad nga kinaiya sa mga tawo aron mahibaloan nila ang mga balaod sa Dios ug kon asa ang atong gidapigan? Ug kon mao man gani, kanus-a ug unsaon nato sa paghimo niini?

Ang tubag tingali mag-agad sa sitwasyon, sa matang sa gibatunan natong relasyon sa mga tawo nga nalambigit, ug sa ilang kahibalo sa mga pamalaod sa Dios. Sama pananglit, ang tinagsa-tagsa nga pakig-istorya sa mga sakop sa pamilya ug sa mga higala nga suod mas maayo kay sa sultihan ang daghang kaila sulod sa kwarto sa paghinulsol. Tinguhaon ang inspirasyon sa Espiritu Santo. Makagiya siya sa imong mga pulong ug mga buhat aron imong ikapakita ang hustong balanse sa gugma, kamatugtanon, ug lig-ong pasalig sa mga sumbanan sa Ginoo.