Pagpuasa alang sa usa ka Propeta
Ang tagsulat nagpuyo sa Hawaii, USA.
Gihigugma ni Silioti si Presidente Kimball. Gusto niya nga siya mamaayo.
“Amumaha among kalag ug pagbati, panalangining puasa, O nag-ampo mi” (Himno, nu. 138).
Si Silioti mipauli gikan sa eskwelahan og miagi sa mga punoan sa hinog nga mga kapayas ug mga mangga. Dihang nakita niya ang mga bunga, nahinumdom siya nga gigutom kaayo siya. Nahinumdom usab siya nga karon mao ang usa ka espesyal nga adlaw. Karon ang tanan sa iyang stake sa Tonga nagpuasa alang sa propeta, si Presidente Spencer W. Kimball. Ang propeta nasakit ug nagkinahanglan og operasyon. Karong gabii ang tanan sa stake magkita aron sa pag-ampo ug magdungan sa pagtapos sa ilang pagpuasa.
Pag-abut ni Silioti sa iyang balay, napanimahoan niya ang giluto sa ‘umu, ang pugon. Midaguok ang iyang tiyan. Nalipay si Silioti nga karon igo na ang iyang pangidaron aron sa pagpuasa, apan ang pagpuasa panahon sa tingklase mas lisud kay sa pagpuasa sa Dominggo.
Naningkamot si Silioti nga kalimtan kon unsa siya ka gutom. Nakakita siya og igsusugnod nga kahoy ug nanglimpyo sa mga dahon nga nahulog gikan sa tag-as nga punoan sa kulo nga milandong sa iyang tugkaran.
“Mosabut ang Langitnong Amahan kon moinom lang ko og gamayng tubig,” naghunahuna si Silioti samtang nanghugas siya sa iyang mga kamot human sa mga buluhaton. Dayon nakahunahuna siya kon unsa niya ka pinangga si Presidente Kimball. Gusto niya nga maayo na siya pag-usab. Mihukom siya nga magpaabut nalang.
Milingkod si Silioti sa balkon ug midat-ol sa iyang ulo sa paa sa iyang mama. Gikapoy siya kaayo.
“Mahimo nimong tapuson ang imong pagpuasa kon gikinahanglan nimo,” miingon si Mama.
“Apan gusto kong magpuasa,” matud ni Silioti. “Makaya ra nako ni.”
Sa dihang mipauli na si Papa gikan sa trabaho, ang tanan sa pamilya mitabang sa paghaon sa ‘umu. Ilang gikuha ang karning baboy nga giputos sa dahon, ang isda, ug ang kulo nga gitunoan. Dayon giputos nila ang pagkaon og panapton ug gidala kini didto sa hulatanan sa bus.
Nahimamat nila ang ubang mga pamilya diha sa karsada, ang tanan dunay ilang kaugalingong pagkaon. Nagpahiyum silang tanan ug nag-istorya samtang nanakay sa bus. Nakakita si Silioti og gamayng luna tupad sa iyang Mama. Napanimahoan niya ang lamian nga pagkaon samtang nagbiyahe ang bus.
Ngitngit na pag-abut sa bus didto sa chapel. Sa sulod, miuban sa pagluhod si Silioti sa iyang mga ginikanan, iyang mga igsoon, ug gatusan pa ka mga miyembro sa Ang Simbahan ni Jesukristo sa mga Santos sa Ulahing mga Adlaw.
Atol sa pag-ampo, kinasingkasing nga nag-ampo si Siliote, “Palihug himoa nga mamaayo pag-usab si Presidente Kimball.” Nasayud siya nga ang matag tawo diha sa lawak nag-ampo alang sa samang butang. Usa ka kalma nga pagbati nga nag-ingon kaniya nga OK ra si Presidente Kimball.
Pagbuka niya sa iyang mga mata iyang nakita ang mga luha diha sa mga nawong sa mga tawo nga naglibut kaniya. Kining tanang mga tawo nagpuasa, ug siya mipuasa uban kanila. Mahimong lisud kini, apan nahimo niya kini!