Mga Tingog sa mga Santos sa Ulahing mga Adlaw
Mipasakay ug Mipaambit sa Ebanghelyo
Paghulagway pinaagi ni Alan Baker
Ang pag-drive latas sa English countryside hilum ug malinawon padulong sa simbahan usa ka Dominggo sa buntag. Sa akong giagian nakakita ko og gulangon nga babaye sa daplin sa karsada. Kinahanglan dayon kong modesider kon mohunong ba ko ug susihon kon nagkinahanglan ba siya’g kasakyan.
Akong gibati nga kinahanglan kong mohunong. Iya kong gisultihan nga ang iyang ngalan si Mary ug bag-o lang siyang miabut didtong dapita. Nakabantay ko nga kon milapas pa og pipila ka segundo o nag-una ba ko og pipila ka segundo dili unta kami mag-abut. Perpekto nga tayming!
Gisultihan ko niya kon asa siya moadto, ug duol ra diay sa chapel. Nakahisgot ko nga padulong ko sa simbahan ug gipangutana kon nakadungog na ba siya bahin sa Simbahan. Miingon siya nga duna siyay pagtuo sa Manluluwas apan gamay ra og nahibaloan mahitungod sa mga Santos sa Ulahing mga Adlaw. Sa among biyahe akong gipaambit ang ebanghelyo kaniya.
Dihang nanaog na si Mary, miingon ko niya nga makasakay siya og balik inig kahuman sa pagsimba. Miuyon siya, ug among giplanohan nga magkita mi sa chapel. Dihang misulod ko sa simbahan, nakit-an nako ang mga misyonaryo ug nangayo ko og kopya sa Basahon ni Mormon aron ihatag sa akong bag-ong higala. Wala madugay, sa pag-abut niya sa chapel, ang mga miyembro mahigalaon ug mipaambit sa ilang pagpamatuod ngadto kaniya.
Sa among pagbalik giingnan nako si Mary nga makakat-on pa siya og daghan mahitungod ni Jesukristo pinaagi sa pagbasa sa Basahon ni Mormon. Gisultihan usab nako siya asa niya makit-an ang istorya mahitungod sa pagpakita sa Manluluwas ngadto sa mga Nephite. Bisan og ang iyang kasinatian sa mga Santos sa Ulahing mga Adlaw mubo ra, nasayud ko nga may nakat-unan siya. Mikanaog siya kon diin kami nagkita. Wala ko maghunahuna nga magkita pa mi pag-usab.
Dihang nag-drive ko pauli gikan sa trabaho pagkasunod nga adlaw, usa ka pag-detour naghatud nako sa pag-agi sa agianan nga dili nako sagad nga agian. Sa akong katingala nakita nako og usab si Mary! Dihang iya kong nakita, mipahiyom siya. Nalipay ko nga nakapasakay na sab ko niya.
Sukad niadto wala na ko makakita ni Mary, apan sa akong paghinumdom niini nga kasinatian, mapasalamaton ko nga gihatagan ko sa Ginoo og oportunidad nga akong ikapaambit ang ebanghelyo. Nahibalo ko nga ang Ginoo mopanalangin kanato sa perpekto Niya nga tayming.