Hingpit nga Kalipay isip usa ka Disipulo ni Jesukristo.

Nakasulay ka ba og dili maayong adlaw? Unsa ang imong gibuhat aron magmadasigon? Nakahibalo si Presidente Uchtdorf nga “kita adunay atong mga kasakit sa pagbati, atong mga kasagmuyo, kasub-anan. Tingali mobati kita nga nawad-an sa kadasig ug nabug-atan.”

Ang iyang solusyon mao ang pagpuyo sa gitawag niya og “kinabuhi sa usa ka disipulo”: “magpabiling matinud-anon ug magpadayon sa hugot nga pagtuo.” Kon kita magpadayon sa hugot nga pagtuo, makasalig kita sa Dios, makatuman sa Iyang mga sugo, ug makaserbisyo sa uban—ug mobati sa hingpit nga kalipay atol niining tanan! Sama sa gisulti ni Presidente Uchtdorf, “Kadtong kinsa nagsunod og kinabuhi sa usa ka disipulo … mao kadtong kansang gagmayng mga buhat makahimo og dakong kalainan.”

Ikonsiderar ang paglista og mga paagi nga kamo makapuyo sa kinabuhi sa usa ka disipulo. Sama pananglit, mahimo kamong mosulat og usa ka ideya sa pagserbisyo sama sa “Pagtabang sa usa ka ginikanan nga mag-andam sa panihapon” o mga ideya alang sa pagsunod sa mga sugo sama sa “Pag-ampo alang sa dugang nga pailub sa akong mga igsoon.” Sa sunod higayon nga kamo mobati nga nasagmuyo o nabug-atan, kuhaa ang inyong lista, pagpili og usa ka ideya, ug sulayi kini!