Ang Institute Maoy alang Kanato
Sa unsang paagi ang institute of religion sa Simbahan nakapanalangin sa inyong kinabuhi?
Kami adunay daghang angayng buhaton. Ang uban kanamo mga estudyante. Ang uban adunay mga trabaho. Ang uban kanamo layo sa ilang mga higala ug pamilya, o dunay mga responsibilidad nga makapabalaka kanamo. Ang uban kanamo naglisud sa pag-adjust human mabalik gikan sa misyon, o bag-o lang migradwar sa high school ug dili sigurado unsay buhaton.
Mora kini og sukwahi sa gilauman ang pagdugang sa institute nga ipatigbabaw sa tanang butang. Kadaghanan namo naghunahuna sa matag karon ug unya, kon ang institute makatabang ba gyud kanamo?
Ang tubag mao ang oo.
Liboan ka mga young adult sa tibuok kalibutan, daghan kanila nga dunay mga sitwasyon nga susama sa inyoha, nangita og kalig-on, abag, paghigalaay, ug espirituhanon nga paglambo sa institute. Aniay duha lamang ka mga ehemplo sa talagsaong mga young adult kinsa, bisan pa sa ilang tanan nga mga hagit, nasayud nga ang institute alang kanila.
Ang Institute Maayo alang sa Kasingkasing
Istorya ni Aric, Toronto, Ontario
Si Aric (ang litrato naa sa ibabaw sa tuo) usa ka estudyante sa PhD sa Unibersidad sa Toronto, nagtrabaho bahin sa heart tissue ug regenerative nga medisina.
Sa paghulagway sa iyang panukiduki [research], siya mipasabut, “Pipila sa mga matang sa mga stem cell mahimong bisan unsa sa inyong lawas. Makabutang kita sa mga stem cells sa petri dish ug palamboon kini ngadto sa usa ka cell sa kasingkasing. Human sa duha ka semana, magsugod na kini sa pagpitik. Amo dayon kining gamiton sa paghimo og modelo sa nagkalain-laing mga sakit ug sa pagsulay sa lain-laing mga tambal. Ang akong tumong nga usa ka adlaw mapalambo ang usa ka kasingkasing sa usa ka laboratoryo sama niini.”
Si Aric adunay iyang kaugalingon nga kausaban sa kasingkasing atol sa iyang misyon sa Belo Horizonte, Brazil. “Sa dihang nagserbisyo ko sa misyon, nakat-on ko sa pagpaminaw ug pagsunod sa Espiritu. Nakatabang kini nako kon unsaon sa pagtuon, sa pagkat-on unsaon paggamit niini sa akong kaugalingon.” Dako kaayo ang iyang kausaban nga nabalaka siya kabahin sa pagpauli. “Wala gayud ko kahibalo unsay buhaton,” miangkon siya. “Kinahanglan nakong kat-unon pag-usab unsaon sa paglihok sa piho nga mga sitwasyon. Ang pag-adto sa institute nakatabang kanako.”
Ang mga kaila didto sa institute importante ngadto ni Aric. “Akong nahigala ang mga tawo kinsa nagkinahanglan og mga higala. Nakapahupay ko sa mga tawo kon sila nagkinahanglan og kahupayan. Importante kana nako, ang pagtabang sa ubang mga tawo, apan importante usab kini alang nako nga mabati kana gikan usab sa ubang mga tawo.”
Mopasiaw siya kon unsa na siya kadugay nga nag-institute, apan nagpadayon siya sa pag-adto. “Matag higayon nga moadto ko, mabati nako ang Espiritu nga anaa didto. Ug kini nagtabang kanako nga mahimong mas maayong tawo, mohimo og maayong pagpili kon asa moadto ug unsay buhaton, ug magbuhat og maayo diha sa akong trabaho.”
Gitandi ni Aric ang tali sa iyang trabaho ug ang institute. “Kon magbutang kita og cell sa usa ka maayo nga kahimtang, adunay mga kausaban nga mahitabo sa sulod sa cell nga makapahimo niining mas daling modawat sa positibong mga kausaban o positibong mga timailhan nga gusto natong mahatag niini. Paglabay sa panahon, ang cell mausab—mausab kini ngadto sa mas maayo, mas dako sa kaugalingong gidak-on. Alang kanako, usa kana ka espesyal kaayong butang. Kon akong ibutang ang akong kaugalingon sa husto nga kahimtang, nan ako mahimong mas daling modawat niining espirituhanong mga aspeto sa kinabuhi ug minus nga modawat niining mga negatibong mga impluwensya nga nahitabo sa kalibutan.”
Siya mitapos, “Ang Dios tinuod. Mao kana ang usa ka butang nga akong gibati sa kahiladman. Wala nako mabati sa kanunay ang Iyang gugma sa akong kinabuhi. Nakaamgo na ko nga tungod kana sa nahimo nakong mga desisyon. Nakaamgo ko nga anaa Siya aron sa pagtabang kanako, nga gusto gyud Niya nga mahimo ko nga pinakamaayo.”
Makatabang Kanako Ang Institute sa Paghinumdom ni Kristo
Istorya ni Veronica sa, Madrid, Spain
Sa dihang 17 na si Veronica (hulagway sa ubos), namatay ang iyang kaluha diha sa iyang mga bukton. Tulo ka tuig human sa kamatayon sa iyang igsoon, nag-inusara ug nagkalisud sa kinabuhi, ilakaw ni Veronica ang iyang gibati nga kaguol. Kanunay siyang nagtuo sa Dios, usa ka adlaw samtang siya naglakaw, siya nag-ampo, “Ginoo, nganong gibuhat man nimo kining tanan ngari kanako?”
Nianang higayona, siya mitan-aw sa building sa LDS nga Simbahan nga kanunay niyang maagian. Mao kini ang unang higayon nga nakita niya, nakuryuso siya; misulod siya ug gipaila-ila ang iyang kaugalingon ngadto sa duha ka mga sister nga misyonaryo, kinsa mitudlo kaniya nianang semanaha.
Miingon si Veronica nga human sa unang leksyon, “ako mibarug ug gisultihan sila nga, ‘mga boang mong tanan’, ug mibiya ko.” Dili niya gusto ang bisan unsa niini, apan sa katapusan gikonsiderar niya pag-usab.
“Nagtuo ako nga mao kadto ang unang higayon nga ako nag-ampo og maayo. Nabati nako ang Dios nagsulti nako nga, ‘Ako nagpadala nimo niining oportunidad aron ka mahimong mas makaila kanako. Dili ka ba gusto niini?’”
Nakahukom siya nga gusto niya kini. Bisan nawad-an siya sa iyang panimalay ug trabaho tungod sa ebanghelyo, siya nabunyagan. Bisan tuod ang iyang kinabuhi nagpadayon nga malisud usahay, misalig siya sa Ginoo. “Sa wala pa ko makahibalo bahin sa Simbahan, mohilak ko o masuko kon unsaon nako nga makabayad sa abangan. Apan karon kahibalo ko nga ang Ginoo mosangkap.”
Sa patriyarkal nga panalangin ni Veronica misulti kaniya nga magserbisyo siya og misyon, apan wala siyay mga bistida o bisan unsang paagi nga makapalit niini. Usa ka sakop sa Seventy ug ang iyang asawa milabay sa area ug nakadungog bahin sa iyang mga panginahanglan; ang asawa nadasig sa pag-impake og mga bistida alang sa biyahe, ug mihatag og daghan niini ngadto kang Veronica. Giawhag usab niya si Veronica sa pagtambong sa institute. Sa dihang gisugdan sa bishop ni Veronica ang programa sa institute sa ilang dapit, regular siya nga nagtambong.
Ang institute nakahatag niya og kalinaw ug kalipay. “Sa akong hunahuna ang ganahan kaayo nako sa institute kanang atol sa semana, aduna kami daghang buluhaton. Bag-uhon namo ang among pakigsaad sa Dominggo uban sa Langitnong Amahan. Apan sa Lunes, Martes, Miyerkules, Huwebes, Biyernes, unsa man among naangkon? Mapasalamaton ko nga aduna kami institute nga kausa kada semana tungod kay kini usa ka paagi sa paghinumdom ni Jesukristo. Ang institute mao ang usa ka paagi nga Siya nagtabang nako pag-uswag.”
Ug si Veronica nag-alagad og misyon. Sa Oktubre 2016 mibiya siya sa pagserbisyo sa Chile Osorno Mission.
Siya miingon, “ako nasayud nga ako ania karon tungod Kaniya. Ako nasayud nga Siya miandam og hingpit nga plano alang sa matag usa kanato. Siya mohatag kanato og mga oportunidad sa tibuok natong kinabuhi. Mabati nako ang Iyang gugma sa kada adlaw, bisan og usahay moingon ko nga, ‘Amahan, nganong nahitabo man kini kanako?’ Apan sa dili pa ko matulog, Siya motubag, ‘Kini nahitabo tungod niini. Karon katulog na.’ Ug ako nahigugma usab Kaniya. Tingali kinahanglan nako nga maagian ang tanang butang aron mobati og dakong gugma alang Kaniya.”