Mensahe sa Visiting Teaching
Magpakabuhi og usa ka Gipahinungod nga Kinabuhi
Tun-i sa mainampuong paagi kining materyal ug tinguhaa ang inspirasyon aron masayud unsay angay nga ipakigbahin. Sa unsang paagi nga ang pagsabut sa katuyoan sa Relief Society makaandam sa mga anak nga babaye sa Dios alang sa mga panalangin sa kinabuhing dayon?
“Ang pagpahinungod mao ang paggahin o paghalad og usa ka butang nga ingon kasagrado, gihalad alang sa balaanong mga katuyoan,” miingon si Elder D. Todd Christofferson sa Korum sa Napulog Duha ka mga Apostoles. “Ang tinuod nga kalampusan sa kinabuhi moabut sa pagpahinungod sa atong kinabuhi—kana mao ang, atong panahon ug mga pagpili—ngadto sa mga katuyoan sa Dios.”1
Si Elder Neal A. Maxwell (1926–2004) sa Korum sa Napulog Duha ka mga Apostoles miingon, “Kita may kalagmitan nga maghunahuna sa pagpahinungod lamang nga paghatag, kon gisugo, sa atong materyal nga kabtangan. Apan ang kinatapusan sa pagpahinungod mao ang pagtugyan sa kaugalingon ngadto sa Dios.”2
Samtang ipahinungod nato ang atong kaugalingon sa mga katuyoan sa Dios, ang atong hugot nga pagtuo kang Jesukristo ug sa Iyang Pag-ula molambo. Samtang kita magpuyo og gipahinungod nga kinabuhi, kita mahimo nga balaan pinaagi niadto nga mga binuhatan.
Si Carole M. Stephens, kanhi Unang Magtatambag sa Kapangulohan sa Relief Society, miingon: “Si Elder Robert D. Hales mitudlo, ‘Kon kita mohimo ug motuman sa pakigsaad, mibiya kita sa pagkakalibutanon ug mipaingon ngadto sa gingharian sa Dios.’
“Kita nausab. Lahi na kitang tan-awon, ug ang atong lihok lahi na. Lahi ang mga butang nga atong paminawon ug basahon ug isulti, ug lahi na ang atong sinul-uban tungod kay kita anak nga mga babaye sa Dios, nabugkos ngadto Niya pinaagi sa pakigsaad.”3
Ang pagpahinungod mao ang pakigsaad nga gihimo sa Dios “uban sa balay sa Israel sa tapus niadtong mga adlawa, nagaingon ang Ginoo: Ibutang ko ang akong Kasugoan sa ilang sulod nga mga bahin, ug diha sa ilang kasingkasing kini isulat ko; ug ako mahimong ilang Dios, ug sila mahimong akong katawhan” (Jeremias 31:33). Pagpuyo og usa ka gipahinungod nga kinabuhi nga nahiuyon sa plano sa Dios alang kanato.
Dugang nga mga Kasulatan
Hugot nga Pagtuo Kahupayan Pamilya