Mga Pangutana ug mga Tubag
“Unsaon nako sa pagtabang ang akong mga higala sa pagbuntog sa mga problema sama sa pagpamalikas ug nanubrang video games?”
Ang pagtabang sa imong mga higala sa pagbuntog sa mga problema tingali sensitibo nga hilisgutan, tungod kay dili ka gustong ingnon nga hilig sa pagsangyaw o mahukmanon. Bisan tuod ang matag sitwasyon managlahi, ang importanting punto nga hinumduman mao nga ang imong ehemplo maghatag og kalainan. Pinaagi sa pagsunod sa imong mga sumbanan, ang uban makamatikud—ug mamahimo kang positibo nga impluwensya. Sama pananglit, kon ang imong higala mamalikas, siguroa nga limpyo kanunay ang imong pinulongan—lakip sa limpyong mga komedya ug komentaryo. Nianang paagiha, siya makabaton og talagsaong ehemplo kon sa unsang paagi posibling makalingaw gihapon ug nindot bisan dili mamalikas.
Kanunay nga mabantayan sa imong mga higala ang imong mga pagpili ug motahud sila. Ang maayong mga higala motahud sa imong mga pagpili, bisan og dili sila mohimo og sama niini.
Apan unsa kaha kon ang imong higala dili mohunong sa pagbuhat sa mga butang nga nakahasol kanimo, bisan og maayo ang imong ehemplo? Nan, importante usab ang paghinumdom nga ang imong mga higala dili makabasa sa imong hunahuna. Usahay, dili gani sila makamatikud nga nakahasol kanimo ang usa ka piho nga kinaiya. Kon, sa pagkataud-taud, dili siya mohunong, OK ra gyud kaayo ang mabination ug matinahurong paghangyo nila.
Bisan unsang problema nga giatubang sa imong mga higala, mamahimo kang positibo nga impluwensya sa imong mga higala pinaagi sa pagpili sa matarung. Mahimo kang modapit nila sa paghimo og mga kalihokan nga makalingaw ug makabayaw. Kon nagmalipayon ka sa pagpili sa matarung, makamatikud ra ang mga tawo.
Lig-una ang Imong mga Higala
Mihatag ko og leksyon sa Mutual mahitungod sa pinulongan. Nagtuo ko nga miepekto kini, pinakaminus ngadto sa usa sa akong mga higala. Kinahanglang kita ang unang mopakita og ehemplo. Mahimo kitang mag-ampo para sa atong mga higala ug magbaton og kaisug nga masultihan sila sa hustong panahon, “Palihug ayaw pagsulti og mga pulong nga ngil-ad. Mohagit ko ninyo sa dili pagsulti og ngil-ad karon.”
Dante C., edad 19, Puebla, Mexico
Mag-ampo sa dili pa Makig-istorya Kanila
Una, mag-ampo ko sa dili pa ko makig-istorya nila. Ikaduha, makigsulti ko nila sa mabination ug positibong paagi, maghatag og tambag sama pananglit sa paghunong nga mo-react dayon kon masuko. Ang akong ehemplo makatabang usab nga mogamit sila og mas maayong mga pulong.
Ndansia B., edad 18, Kimbanseke, Democratic Republic sa Congo
Pakit-a Sila sa Mas Maayong mga Butang nga Ilang Mahimo
Imbis kasab-an sila, tabangi silang makamatngon nga duna diay mas maayong mga butang nga ilang mahimo. Dapita sila sa paghimo og makalingaw, maayong mga kalihokan kauban nimo ug awhaga sila sa paghimo og mas mabungahon pang mga buhat sama sa pagkat-on og tukar sa instrumentong pang-musika, pakigdula sa mga igsoon, o pagtabang nila diha sa panimalay.
Elder Cobabe, edad 19, ug Elder Allred, edad 19, Hong Kong China Mission
Ang Pagpraktis Maghimong Hingpit
Sultihan nako sila nga mag-ampo alang sa kalig-on ug praktison ang pagpanulti nga walay pagpamalikas o paggamit og mga pulong nga bastos. Sultihan sab nako sila nga ang paggahin og nanubrang oras sa video games maglimit sa ilang pakig-inter-aksyon sa pamilya ug mga higala ug mahimo ra nila kining hunungon pinaagi sa pag-apil sa makalingaw ug maayong mga kalihokan. Kon makamatngon silang nasayop sila, makaampo ra sila og kalig-on ug magpadayon tungod kay ang pagpraktis maghimong hingpit.
Ozioma O., edad 17, Abia, Nigeria
Impluwensyahon Sila alang sa Kaayohan
Dili kita kakontrolar sa mga lihok sa ubang tawo, apan makatabang kita nga maimpluwensyahan sila alang sa kaayohan. Mahimo kitang magpakabuhi nga positibo, sama kang Kristo nga mga ehemplo ug makatabang sa mga tawo sa atong palibut sa pagduol kang Kristo. Kon naghimo og dili maayong mga desisyon ang atong mga higala, mahimo ra kitang mosugyot og mas maayong mga alternatibo ug isulti unsay atong nahibaloang eksakto ug tinuod pinaagi sa atong mga pulong ug mga buhat.
Mosiah M., edad 17, Utah, USA
Pagbutang og “Garapon sa Pagpamalikas”
Usa sa pihong paagi nga makatabang ko sa akong mga higala nga mohunong sa pagpamalikas mao ang pagbutang og “garapon sa pagpamalikas,” ug sa matag higayon nga may usang mamalikas, magbutang sila og baynte singko sentimos sa garapon. Makatabang ko sa pag-awhag nga hunungon ang nanubrang video games kon dapiton nako ang akong mga higala sa mga youth camp, mga kalihokan sa Simbahan, ug uban pang makalingaw nga kalihokan. Mapaila sab nako sila ngadto sa bag-ong mga tawo kinsa makatabang nga mahimong maabi-abihon ug aktibo ang ilang kinabuhi.
Owyn P., edad 13, Hawaii, USA
Pag-atiman sa Uban
Ang pagkamaayong ehemplo maoy pinakaimportanting butang nga akong mahimo tungod kay ang paningkamot sa pagtabang nga mahunong ang kinaiyang bati sa usa ka tawo walay pulos kon mao pud ang akong kinaiya. Dili nila dawaton sa seryusong paagi ang akong tambag o hunahuna. Makatabang sab ko sa akong mga higala pinaagi sa pagpasabut ngadto nila nganong dili ko komportable sa ilang kinaiya. Kon dili angay ang ilang pinulongan, makatabang ko nga makita nila ang impresyon nga ilang gihimo ngadto sa mga tawo dihang gigamit kana nga matang sa ngil-ad nga pinulongan.
Alejandra T., edad 17, Chihuahua, Mexico
Pag-ampo
Mahimo kang mag-ampo para nila para mahunong ang ilang pagpamalikas o nanubrang pagdula og video. Ang pag-ampo dili gayud makadaut.
Joshua L., edad 14, Oregon, USA