Pagserbisyo diha sa Simbahan
Ang Pagpakabana sa Manluluwas Kanato
Ang tagsulat nagpuyo sa Utah, USA.
Nakahinumdom ko sa dihang ang akong pamilya maoy gitutukan sa mga ward council, nakaamgo ko nga dili lamang ang ward ang nagpakabana—ang Ginoo nagpakabana kanato.
Sa dihang ang bishop nangutana nako kon dawaton ba nako ang calling isip presidente sa Young Women, gusto kong moingon og dili. Gibati nako nga dili sarang nga modumala sa batan-ong mga babaye. Apan tulo ka bulan human gidawat nako kini, nasagmuyo ko nga nakahibalo nga ang mga utlanan sa among ward usbon ug ako i-release.
Nag-ampo ko aron makahibalo ngano nga ang Ginoo motugot nako nga mahigugma sa batan-ong mga babaye dayon igo lang manamilit sa dili madugay. Ang akong tubag miabut sa wala damha atol sa miting sa ward council.
Ang mga sakop sa council gihangyo nga mopakigbahin og mga istorya didto sa komperensya sa stake mahitungod sa pagtabang sa mga miyembro sa among ward, apan nabalaka ko nga ang pipila ka mga tawo tingali mobati nga sama sa mga proyekto sa ward. Human nako masulti ang akong kabalaka, bisan pa niana, ang Espiritu misulti nako nga ang Langitnong Amahan nagpakabana sa tanan Niyang mga anak.
Pipila ka tuig ang milabay ang akong bana ug ako mao ang gitutukan sa ward council, ug nakahibalo kami niini. Mibalik ko sa pagkaaktibo human matawo ang among unang anak, apan ang akong bana wala mobalik. Sulod sa katuigan, ang mga kapangulohan sa stake, bishopric, ug mga home teacher naningkamot sa pagtabang kanamo.
Dayon mibalhin kami sa usa ka bag-o nga ward. Ang mapailubon ug mahigugmaon nga bishop ug usa ka home teacher nahimong mga higala sa akong bana. Niining higayuna ang akong bana naminaw na sa Espiritu. Nadasig siya sa pagbasa sa Basahon ni Mormon, ug nagsugod siya sa pagsimba. Hinay-hinay nakaangkon siya pagbalik og pagpamatuod. Dili nako malimtan ang maanindot nga adlaw sa among pamilya nga na-sealed didto sa templo.
Wala kadto mahitabo hangtud nga gitawag ko isip presidente sa Young Women ug dunay oportunidad sa pagserbisyo sa ward council nga akong mga mata nabuksan unsay gipasabut nga mao ang gitutukan sa usa ka ward council. Nakat-unan nako nga ang mga ward council motutok sa piho nga mga tawo dili tungod kay sila naghunahuna sa mga numero apan tungod kay sila, ug ang Ginoo, nag-amuma sa tagsa-tagsa. Kon kita moserbisyo sa atong mga calling, ang Ginoo mopuno kanato uban sa Iyang gugma niadtong atong giserbisyuhan.
Naghunahuna sa dihang ang akong pamilya mao ang gitutukan sa mga ward council, nakaamgo ko nga dili lamang ang ward ang nagpakabana—nagpakabana ang Ginoo kanato. Sila naghunahuna kanato tungod kay Siya nag-amuma kanato.
Ang tinuod mao, nagpakabana ang Ginoo natong tanan. Tungod sa gugma, naghimo Siya og plano sa paglig-on kanato ug, kon gikinahanglan, mopaaktibo kanato—usa ka plano nga kanunay gipatuman sa bishop ug home teacher kinsa mitabang sa akong bana.