Kampyon sa Pag-ampo sa Pamilya

Ni Charlotte Larcabal

Mga Magasin sa Simbahan

Mga napulo ka tip gikan sa kabatan-onan sa pagtabang sa imong pamilya nga makakab-ot og mas taas nga espiritwalidad pinaagi sa pag-ampo.

Nakahibalo ba kamo nga ang pag-ampo sa pamilya usa ka sugo? Si Jesukristo misugo sa mga Nephite sa “pag-ampo sa inyong mga banay ngadto sa Amahan” (3 Nephi 18:21). Sukad niadto, gibalik balik sa mga propeta ug apostoles kini nga pagtulun-an. Sama pananglit, si Elder Richard G. Scott (1928–2015) sa Korum sa Napulog Duha ka mga Apostoles mitudlo nga kini kinahanglan nga “mag-unang prayoridad sa inyong inadlaw nga kinabuhi.”¹

Importante ang pag-ampo sa pamilya! Mao usab kini ang yawe aron magkasuod ang usag usa ug sa Langitnong Amahan. Ug dili lamang kini sumala ra ni Mama ug Papa. Mahimong makaimpluwensa ka og dako sa imong pamilya! Mahimo kamong kampyon sa pag-ampo sa pamilya.

Magmahimong usa ka Kampyon

Unsa man ang usa ka kampyon sa pag-ampo sa pamilya? Kon maghunahuna kamo og mga kampyon, tingali maghunahuna kamo sa mga tawo nga hilabihan ka maayo sa usa ka butang. Mao kana ang usa ka matang sa kampyon: usa ka mananaog sa unang ganti o unang dapit sa usa ka kompetisyon. Ang laing matang sa kampyon mao ang usa ka tawo nga makig-away alang sa usa ka butang, usa ka manlalaban o tigpanalipod. Mao nga ang usa ka kampyon sa pag-ampo sa pamilya mahimong usa ka tawo nga makig-away, mobarug, ug manalipod alang sa pag-ampo sa pamilya.

Makahimo kaha kamo niana?

Ania ang pipila ka mga kasayuran kon unsaon nga mahimong kampyon sa pag-ampo:

1. Sulayi nga dili balik-balikon ang isulti sa pag-ampo kon imo nang turno nga mag-ampo. Jeanel S., edad 14, Idaho, USA

2. Paglista sa mga butang nga kinahanglan nimong iampo mahitungod sa pamilya. Samantha B., edad 17, Alabama, USA

3. Sa akong pamilya kanunay namong paningkamotan nga mas daghan ang pasalamat kay sa among pangayoon nga butang. Paningkamotan namo kanunay nga makabaton sa diwa sa pagpasalamat ngadto sa Langitnong Amahan, mao nga ako naningkamot sa pagtabang sa akong mga igsoon niana. Karla S., edad 17, Tijuana, Mexico

4. Pahinumdumi ang tanan. Kon ang imong pamilya dili kaayo maayo sa pag-ampo, maayong sugdanan sa usa ka personal nga mga pag-ampo. Camille G., edad 18, Alabama, USA

5. Bangon og sayo mga pipila ka minutos aron masiguro nga ang pag-ampo sa pamilya mahitabo. Mahimo nimong i-set ang alarm sa pagpahibalo nimo kon oras na alang sa pag-ampo sa pamilya. Tess Z., eda 16, Texas, USA

6. Paminaw sa mga pulong nga gilitok sa tawo nga nag-ampo, ug sublia kini sa imong hunahuna. Pagkahuman, tan-awa kon unsa ang imong mahinumduman sa ilang pag-ampo. Ang Pagsulti og “Amen” nagpasabut nga “sumala sa gikaingon,” o nga kamo mouyon. Gusto gayud ko makahibalo ug makasabut unsay akong giuyunan. Grace M., edad 14, California, USA

7. Pagbaton og maayo nga kinaiya mahitungod sa pag-ampo sa pamilya. Ayaw kini isipa nga usa ka tulumanon sa dili pa ka matulog. Hinumdumi nga ang pag-ampo sa pamilya makatabang nga magkasuod ang imong pamilya. Ranoah H., edad 17, Alabama, USA

8. Paningkamuti nga makatabang ka sa imong mga igsoon. Bisan lamang sa pagbaton og maayong kinaiya ug pagkamaayong ehemplo makahimo na og dakong kalainan. Will W., edad 14, California, USA

9. Hunahunaa kon unsay gusto ninyong iampo sa dili pa mag-ampo. Lyric A., edad 13, Arkansas, USA

10. Hinumdumi nga walay nay butang nga mas importante pa niana. Ang paggahin og panahon uban sa inyong pamilya ug sa pagsiguro nga inyong makuha ang kalidad nga panahon sa pagbasa sa mga kasulatan ug sa pag-ampo importante kaayo. Isaac S., edad 14, California, USA

Mubo nga Sulat

1. Richard G. Scott, “Himoa ang Paggamit sa Inyong Pagtuo nga Inyong Unang Prayoridad,” Liahona, Nob. 2014, 93.

Walay laing mas matahum nga tan-awon niining tibuok kalibutan kay sa makakita og usa ka pamilya nga naghiusa sa pag-ampo.

Si Presidente Thomas S. Monson, “Duol ngadto Kaniya sa Pag-ampo ug Hugot nga Pagtuo,” Liahona, Mar. 2009, 3.