Mga Tingog sa mga Santos sa Ulahing mga Adlaw
Gikinahanglan Ba Nako ang Sakrament?
Paghulagway ni Joshua Dennis
Lima pa lang ka minuto sa miting sa sakrament, ug aduna nay gisapot, kaduha na moadto sa c.r, nag-ilis og diaper, ug nanaghilak kay “gigutom ko!”
Isip inahan sa lima ka mga anak nga nag-edad ubos sa otso anyos, ug may bana nga kansang trabaho nagtugot lang niya nga makauli sa katapusan sa semana, kasagaran mobati ko og kaluya inig abut sa Dominggo. Sa pagpanglakaw sa among pamilya ngadto sa chapel sa Dominggo, ako ug ang akong bana mangandam sulod sa usa ka oras sa unsay among gustong tawagon og “pagkamainantuson.”
Sa kinse minutos diha sa usa ka miting, ang among siyam ka bulan nga anak misugod sa pagsinggit. Naningkamot ko sa paghupay ug pagpahilum kaniya. Wala madala, ako siyang gigawas sa chapel aron mapakalma siya. Sa akong paglingkod, ang akong hunahuna misugod sa pag-focus sa akong gibati nga kaluya ug sa kalisdanan sa bag-ong semana. Gibati nako nga nabug-atan.
Sa kalit lang, natingala ko sa usa ka batan-ong lalaki nga naggunit og tray sa sakrament. “Nagkinahanglan ka ba niini?” nangutana siya. Yano lang kato nga pangutana, apan nakatandog kini sa akong kalag. Diha-diha dayon ang Espiritu milukop kanako, ug nakahilak ko. Naghunahuna ko: “Labaw pa kay sa imong nahibaloan.”
Ang inadlaw-adlaw nga kalisdanan ug mga responsibilidad makapaluya kanato sa tibuok simana, apan ang sakrament makatagbaw kanato. Sa akong pag-ambit sa sakrament, akong gibati ang kalinaw ug pag-alim nga mituhop kanako. Nianang higayuna nakaamgo ko nga nagkinahanglan ko sa sakrament kay sa bisan unsang butang tungod kay nagkinahanglan ko sa Espiritu nga maga-uban kanako.
Nagtan-aw ko sa litrato diha sa hawanan nga ang Manluluwas nagtoyhad sa iyang mga kamot aron sa pagtabang. Ang pasalamat mitubo sa akong kasingkasing samtang namalandong kon sa unsang paagi nga Siya kanunayng andam sa pag-alim ug paglig-on kanato. Napahinumduman ko niini sa matag Dominggo kon moambit ko sa sakrament. Mapasalamaton ko nga ang Espiritu nga nagtudlo kanako pinaagi sa yano nga pangutana taliwala sa mga hagit sa kinabuhi, ang Manluluwas mao ang atong tinubdan sa kalig-on ug kalinaw.