Unsaon Nimo Pagtabang sa Buhat sa Templo
Ang tagsulat nagpuyo sa Utah, USA.
Ang buhat sa templo makahatag og kalipay kanimo ug niadtong imong gimahal.
Nakasulay ka na ba nga naghinam-hinam sa usa ka butang nga dili ka makahulat nga masugdan? Tingali naghinam-hinam ka nga mokuyog sa imong igsoong lalaki aron manan-aw sa inyong paboritong sports team nga modula, o tingali ang imong labing suod nga higala midapit kanimo ngadto sa talagsaon nga concert.
Niadtong mga 1840, ang Dios mipahiuli sa kamatuoran sa ebanghelyo nga nakapalipay kaayo ug nakapahinam ni Joseph Smith. Iyang nakat-unan nga pinaagi sa tukmang awtoridad sa priesthood, ang mga tawo mahimong mabunyagan pinaagi sa proxy alang sa ilang mga minahal nga wala pa mabunyagi dinhi nga kinabuhi.
Ang doktrina sa bunyag alang sa mga patay nakapahinam kaayo ni Joseph tungod kay ang iyang magulang nga lalaki nga si Alvin namatay sa edad nga 25 nga wala mabunyagi. Si Joseph nabalaka nga si Alvin gihukman ngadto sa mahangturong pag-antus tungod kay wala siya mabunyagi niini nga kinabuhi.
Apan pinaagi sa mga pagpadayag sa kaluwasan alang sa mga patay, si Joseph nakakat-on nga si Alvin mahimong mabunyagan pinaagi sa proxy ug maluwas sa celestial nga gingharian (tan-awa sa D&P 137).
Pagpakigbahin sa Kamatuoran sa Bunyag alang sa mga Patay ngadto sa Uban
Wala lamang makapahinam kini nga balita ngadto sa pamilyang Smith, apan nakapahinam usab kini ngadto sa ubang mga Santos sa Nauvoo, Illinois. Niadtong Agosto 15, 1840, si Joseph Smith mitudlo mahitungod sa ordinansa sa bunyag alang sa ilang mga katigulangan sa haya ni Seymour Brunson. Miingon si Joseph nga panahon na aron tumanon ug ipahiuli kana nga buhat, nga gibuhat sa mga Santos sa karaang panahon (tan-awa sa 1 Mga Taga-Corinto 15:29).1
Sa pagkadungog sa mga Santos sa Nauvoo nga mahimo silang magpabunyag alang sa ilang namatay nga mga sakop sa pamilya, nangalipay sila. “Sa pagkadungog nako niini ang akong kalag milukso sa kalipay,” miingon si Presidente Wilford Woodruff (1807–98).2
Sa dihang nakaamgo ang mga Santos nga makapahigayon sila og mga bunyag alang sa mga patay, gusto nilang mahimo dayon kutob sa ilang mahimo ang mga buluhaton alang sa ilang mga pamilya. Daghan ang misulat ngadto sa mga sakop sa pamilya aron makolekta nila ang mga pangalan sa namatay na nga kaparyentehan. Tungod kay walay templo nianang panahona, gatusan ka mga tawo ang miadto sa Suba sa Mississippi sa pagpahigayon sa mga ordinansa.
Ang Bunyag alang sa mga Patay ug Ikaw
Ang kahinam bahin sa buhat sa templo ug sa bunyag alang sa mga patay nagpadayon karon. Adunay mga templo sa tibuok kalibutan, ug ang buhat sa templo nag-abli sa pultahan aron ang tanan makaangkon og kaluwasan. Nindot kaayo kana nga gasa!
Sama sa mga Santos sa Nauvoo, mahimo ka nga makigpundok sa imong mga higala ug pamilya ug mobuhat sa proxy nga bunyag alang niadtong namatay na. Mahimo nimong dad-on ang imong pamilya ngadto sa templo. Nagpasabut kini dili lamang sa pagdala sa imong buhi nga pamilya ngadto sa templo apan usab sa imong mga minahal nga namatay na. Kon ang imong pamilya dili makaadto sa templo, makahangyo ka sa mga higala, mga lider, o mga sakop sa korum ug klase nga mokuyog kanimo.
Ang pag-adto sa templo uban sa mga minahal makahatag og kalipay. Mopahiusa kini sa mga pamilya, magdala og kalinaw, ug mopahinumdom kanato nga ang Dios nahigugma kanatong tanan ug nga Siya nagtanyag sa kaluwasan sa tanan Niyang mga anak.
Ug usa kana ka butang nga makapahinam kanatong tanan.