Pagkat-on alang sa Tibuok Kalag

Ni Elder Kim B. Clark

Sa Seventy

Commissioner sa Church Educational System

Ang Ginoo naglihok uban sa gahum diha sa Iyang Simbahan aron makaangkon kamo sa edukasyon nga gusto Niya nga inyong maangkon.

Kini nga mensahe alang sa kabatan-onan ug mga young adult sa Simbahan sa Ginoo. Daghang tuig na ang milabay adunay kusog nga impresyon nga miabut kanako mahitungod kaninyo ug niini nga panahon. Ingon og nakita nako ang mga bata sa Primary sa tibuok kalibutan. Nasayud ko nga mohimo sila ug motuman og mga pakigsaad sa Ginoo. Ug nasayud ko nga ang Ginoo mopanalangin kanila og mga oportunidad alang sa lawom nga pagkat-on, sa espiritwal ug temporal nga paagi, ug mopadako kanila isip usa ka gamhanang kasundalohan aron sa pagtukod sa Iyang gingharian ug pag-andam sa kalibutan alang sa Iyang pagbalik.

Kamo kadto nga mga bata, ug kini karon ang inyong panahon.

Mahinungdanon karon nga panahon sa gingharian sa Dios, panahon nga puno sa mga oportunidad aron kamo makakat-on ug molambo ug makasinati sa kamaya ug kalipay. Sigurado nga adunay mahinungdanong mga hagit. Apan pinaagi sa matubsanon ug makalig-on nga gahum sa Pag-ula ni Jesukristo, pinaagi sa Iyang mahimayaon nga ebanghelyo ug sa Iyang tinuod ug buhi nga Simbahan, ang Ginoo nagpadayon sa pag-abli sa mga pultahan ug pag-andam sa agianan aron kamo maghinulsol, magkat-on og maayo, motubo sa espirituhanong paagi, ug mas makabig ngadto Kaniya. Ang Ginoo nag-andam sa Iyang gingharian ug sa Iyang katawhan alang sa Iyang pagbalik, ug kamo sa nagtubo nga henerasyon adunay importanting tahas nianang mahinungdanon nga buhat.

Kini ang panahon sa mga milagro. Ang bag-ong mga teknolohiya naghimong posible nga ang pagkat-on ug edukasyon molambo. Tinuod kana alang sa kalibutanon ingon man usab sa espirituhanon nga kahibalo. Ang Ginoo naglihok uban sa gahum diha sa Iyang Simbahan aron makaangkon kamo sa edukasyon nga gusto Niya nga inyong maangkon.

Kabahin kining tanan sa sugo nga gihatag sa Ginoo ngadto ni Propeta Joseph Smith (1805–44) sa sinugdanan sa Pagpahiuli: “Kini ang akong pagbuot nga kamo kinahanglan … makaangkon og usa ka kahibalo sa kasaysayan, ug sa mga nasud, ug sa mga gingharian, sa mga balaod sa Dios ug sa tawo, ug kining tanan alang sa kaluwasan sa Zion” (D&P 93:53).

Kini nga sugo importante kaayo sa atong panahon samtang gipadali sa Ginoo ang Iyang buhat. Karon ang panahon nga pahimuslan ninyo ang mga oportunidad sa edukasyon nga anaa sa inyong atubangan, ug ang potensyal sa pagkat-on ug paglambo nga anaa kaninyo.

Kinahanglang hunahunaon ninyo sa matag adlaw kini nga mga pulong ni Presidente Thomas S. Monson:

“Moawhag ako ninyo sa pagpadayon sa inyong edukasyon.”¹

“Ang inyong mga talento modako samtang kamo magtuon ug magkat-on.”²

“Ang matag usa kaninyo … adunay oportunidad sa pagkat-on ug paglambo. Palamboa ang inyong kahibalo, ang intelektwal ug espiritwal, sa hingpit ninyong balaang potensyal.”³

Lawom nga Pagkat-on

Ang pagkat-on nga magtugot kaninyo nga makab-ot “ang pinakataas ninyong balaang potensyal” mao ang akong tawgon og lawom nga pagkat-on: pagkat-on sa tibuok kalag—sa hunahuna, sa kasingkasing, sa lawas, ug sa imortal nga espiritu. Ang lawom nga pagkat-on magamit sa tanang matang sa kahibalo, espirituhanon man o kalibutanon. Ang pagkat-on lawom kon makadugang kini sa inyong gahum sa pagbuhat og tulo ka mga butang: (1) mahibalo ug makasabut; (2) mohimo og epektibo, matarung nga buhat; ug (3) mas mahisama sa atong Langitnong Amahan.⁴

Sama sa gitudlo sa Ginoo kang Propeta Joseph, ang lawom nga pagkat-on kinahanglan buhaton sa pamaagi sa Ginoo, pinaagi sa pagpadayag ug inspirasyon diha sa Kahayag ni Kristo ug sa gahum sa Espiritu Santo ug pinaagi sa aktibo, makugihon nga pagtuon ug pagtudlo sa usag usa, inubanan sa grasya ni Jesukristo. Mao usab kana sa bisan unsa nga matang sa kahibalo. Ania ang mga sugo sa Ginoo mahitungod sa lawom nga pagkat-on:

“Pangitaa ninyo nga makugihon ug magtudlo sa usag usa sa mga pulong sa kaalam; oo, pangitaa ninyo gikan sa labing maayo nga mga basahon ang mga pulong sa kaalam; pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo” (D&P 88:118).

“Pagtudlo kamo nga makugihon ug ang akong grasya mouban kaninyo, aron kamo matudloan nga labaw sa hingpit … diha sa tanan nga mga butang mahitungod ngadto sa gingharian sa Dios, nga angay alang kaninyo sa pagsabut” (D&P 88:78).

Ang Espiritwal nga Kahibalo Maoy Prayoridad

Ang lawom nga pagkat-on, sa bisan unsa nga natad sa pagtuon, sa tiunay usa ka espirituhanong kasinatian, nga gibase diha sa pundasyon sa hugot nga pagtuo kang Jesukristo, paghinulsol, ug pagkamasulundon sa Iyang mga sugo aron ang Espiritu Santo makatudlo kaninyo. Ang lawom nga pagkat-on dili sayon, apan angay lang kining paningkamutan! Kon tinud-anay kamong magtinguha nga makat-on og maayo, kon ang inyong kasingkasing ug hunahuna andam modawat sa pagkat-on, ug kon lihukon ninyo kana nga tinguha, ang Ginoo mopanalangin kaninyo. Kon buhaton ninyo ang inyong bahin—mag-ampo diha sa hugot nga pagtuo, mangandam, magtuon, aktibong moapil, ug mobuhat sa inyong labing maayo—ang Espiritu Santo motudlo kaninyo, mopalambo sa inyong kapasidad sa pagbuhat sa unsay inyong nakat-unan, ug motabang kaninyo nga mamahimo kon unsay gusto sa Ginoo nga kamo mamahimo. “Ang kaluwasan mismo,” mitudlo si Presidente Joseph F. Smith (1838–1918), “ubos sa pag-ula ni Kristo, usa ka proseso sa edukasyon. … Ang kahibalo maoy usa ka pamaagi sa mahangturong kalamboan.”⁵

Kini nga proseso magamit sa bisan unsang kahimtang nga maanaa ka ug sa bisan unsang matang sa kahibalo. Hinoon, ang labing importanting kahibalo nga kinahanglan nimong maangkon mao ang kahibalo sa mga butang sa Dios. Busa, ang espirituhanong kahibalo kinahanglang mag-una sa inyong kasingkasing ug sa inyong mga prayoridad. Si Propeta Joseph Smith mipasabut og maayo sa kaimportante sa espirituhanong kahibalo niini nga mga pulong: “Ang usa ka tawo dili ingon kadali maluwas gawas kon siya may kahibalo, kay kon siya wala makabaton og kahibalo, siya mahimong madala ngadto sa pagkabihag sa ubang dautan nga gahum sa lain nga kalibutan, kay ang dautan nga mga espiritu makabaton og labaw nga kahibalo, ug sa ngato-ngadto may labaw nga gahum kay sa uban nga tawo nga ania sa yuta. Busa gikinahanglan ang padayag aron pagtabang kanato, ug makahatag kanato og kahibalo sa mga butang sa Dios.”⁶

Tinuod nga ang ebanghelyo naglangkob sa tanang kamatuoran,⁷ apan ang kahibalo ug pagsabut sa yano ug simpling mga kamatuoran sa ebanghelyo ni Jesukristo kinahanglan nga maoy inyong pundasyon sa tanang lawom nga pagkat-on. Ang pagbutang og una sa espirituhanong kahibalo diha sa inyong hunahuna ug kasingkasing mosiguro nga mosalig kamo sa Ginoo ug sa Balaang Espiritu sa inyong pagkat-on, nga inyong makita ang tanang butang nga inyong tun-an diha sa kahayag sa Iyang ebanghelyo, ug nga magpadayon kamo sa pagkat-on og maayo sa tibuok ninyong kinabuhi.

Lawom nga Pagkat-on alang sa Tibuok Kinabuhi

Ang lawom nga pagkat-on sa espirituhanon ug kalibutanon usa ka sugo sa Ginoo. Hunahunaa kon unsay mahitabo kon mohunong kamo sa pagkat-on. Unsa kaha kon mihunong ko sa pagkat-on sa diha nga migradwar ko sa kolehiyo niadtong tunga-tunga sa mga 1970? Wala unta koy bag-ong mga panabut o pagpadayag gikan sa buhing mga propeta, sa mga kasulatan, o sa Espiritu Santo; wala unta koy mahibaloan sa padayon nga mga kalamboan sa teknolohiya, panglawas nga pag-atiman, mga kalihokan sa kalibutan, mga regulasyon sa gobyerno, o edukasyon. Wala untay personal nga pag-uswag o espirituhanong paglambo pinaagi sa paghinulsol ug sa pagkat-on gikan sa kasinatian.

Sa dihang nagserbisyo ko isip presidente sa Brigham Young University–Idaho, si Sister Clark kanunay nga pangutan-on, “Giunsa ninyo pagkaila ni Presidente Clark?” Ang iyang tubag kasagarang sugdan sa, “Dili pa siya Presidente Clark sa dihang nahimamat nako siya.” Kon wala pa ko mopadayon sa pagkat-on, matigulang ko, apan ako mao gihapon ang 25 anyos nga nakaila ni Sister Clark sa dihang migradwar ko sa kolehiyo—walay maayong mapaabut si Sister Clark o ang among pamilya!

Kon mohunong kamo sa pagkat-on, dili kamo mahimong mas maalamon, mas epektibo, mas mapuslanon, mas matinud-anon, o mas mahisama sa inyong Amahan sa Langit.

Ang inyong kasinatian sa pagkat-on sa mga katuigan sa inyong kabatan-onan ug young adult nagpahimutang sa pundasyon alang sa tibuok kinabuhi nga pagkat-on. Kon makaugmad kamo sa abilidad nga magkat-on og maayo sumala sa pamaagi sa Ginoo—pinaagi sa Espiritu ug sa makugihon, aktibo nga pagtuon—mahimo kining dako nga panalangin nganha kaninyo.

Usa ka yawe sa pag-angkon niana nga panalangin mao ang paghimo sa inyong kasingkasing ug hunahuna nga bukas sa pagkat-on. Ania ang tulo ka butang nga inyong mahimo aron kanunay nga andam sa pagkat-on:

1. Hangyoa ang Ginoo sa pagpanalangin kaninyo og tinguha nga magkat-on og maayo.

   Kon duna na kamoy tinguha sa pagkat-on og maayo, maayo kana. Kon wala pa, pangayo sa Ginoo niana nga gasa. Ang Ginoo moedukar sa inyong mga tinguha aron gusto ninyong makat-on kon unsa ug sa unsang paagi Niya gusto nga kamo magkat-on sa tibuok ninyong kinabuhi. Sa plano sa Ginoo, sa unsang paagi gusto Niya nga kamo magkat-on—pinaagi sa Espiritu, uban sa makugihong pagtuon—sama ra ka importante sa unsa ang gusto Niya nga inyong makat-unan.

2. Himoa ang paghinulsol nga usa ka mahinungdanong bahin sa inyong kinabuhi.

   Ang paghinulsol usa ka balaan nga proseso. Kana ang paagi nga kita mag-usab, motubo, ug mahimong mas maayo pinaagi sa matubsanon ug makapalig-on nga gahum sa Pag-ula ni Jesukristo. Kon ang paghinulsol mahinungdanon sa inyong kinabuhi, kanunay kamong magluhod, magpaubos sa inyong kaugalingon sa atubangan sa Ginoo, magtinguha sa Iyang tabang kon unsaon sa paggamit ang inyong panahon ug unsaon sa pagserbisyo Kaniya.

3. Simba sa templo kanunay kutob sa mahimo.

   Ang templo mao ang balay sa Ginoo sa pagpadayag ug pagkat-on. Kon kanunay kamong moadto didto, kon dad-on ninyo ang inyong mga pangutana ug inyong mga tinguha sa pagkat-on uban kaninyo, ang Ginoo Mismo motudlo kaninyo.

Pagbuntog sa Oposisyon sa Lawom nga Pagkat-on

Ang lawom nga pagkat-on karon moandam kaninyo alang sa tibuok kinabuhi nga pagkat-on. Hinoon, nasayud ko nga nag-atubang kamo og mga babag ug gani direktang oposisyon sa pagkat-on nga gusto sa Ginoo nga inyong maangkon. Ang kahadlok, kawalay kadasig, katapulan, kalisud sa pagbasa, kakulang sa suporta o oportunidad, mga tradisyon sa kultura o pamilya, kabalaka sa gasto, mga tintasyon sa kalibutan, sayop nga mga ideya kabahin sa edukasyon, ug daghan pang uban tingali makababag kaninyo.⁸

Nasayud ko nga pipila kaninyo nag-atubang og pipila niini nga mga butang, ug daw mabati kini nga dili mabuntog nga mga babag sa pagkat-on.

Ako mopamatuod kaninyo nga bisan asa kamo nagpuyo, bisan unsa pa ang inyong mga kahimtang, ang Ginoong Jesukristo nagsuporta kaninyo batok niini nga mga oposisyon uban sa Iyang matubsanong gugma ug sa Iyang walay kinutuban nga gahum. Pinaagi sa Iyang maulaong sakripisyo, Siya nakasinati ug nakabuntog sa tanan nga mahimong mobabag sa inyong pag-uswag padulong sa kinabuhing dayon. Sa Iyang kusog ug uban sa Iyang gahum, mabuntog ninyo ang bisan unsang nagbarug tali kaninyo ug sa pagkat-on nga gusto sa Ginoo nga inyong maangkon.

Kini mao ang Iyang saad kaninyo, ug ang Iyang mga saad tinuod: “Paduol ngari kanako ug Ako mopaduol nganha kaninyo; pangita kanako nga makugihon ug kamo makakita kanako; pangayo, ug kamo makadawat; tuktok, ug kini pagabuksan nganha kaninyo” (D&P 88:63; tan-awa usab sa Mateo 7:7).

Panapos

Mahinungdanon gayud karon nga panahon sa gingharian sa Dios. Ang Ginoo nagpadali sa Iyang buhat, ug nakakita kita og daghang mga milagro samtang ang Ginoo naglihok uban sa gahum sa pag-abli og talagsaong mga oportunidad aron kamo makat-on og maayo.

Ang Ginoo nagtrabaho sa inyong kinabuhi sa pagpanalangin ug pag-andam kaninyo. Ako nag-ampo nga kamo molihok uban sa hugot nga pagtuo kang Jesukristo sa pagpahimulos sa matag oportunidad nga magkat-on og maayo, motubo sa kahibalo ug panabut, mopahinabo sa Iyang matarung nga mga katuyoan, ug mamahimo kon unsa kamo gipakatawo nga mamahimo.

Alang sa dugang nga impormasyon sa mga oportunidad sa edukasyon sa Simbahan, bisitaha ang education.lds.org. Aron makat-on pa mahitungod sa seminary alang sa kabatan-onan, tan-awa ang pahina 50 niini nga isyu. Aron makat-on pa mahitungod sa institute alang sa mga young adult, tan-awa ang mga pahina 44 ug 46 niini nga isyu.

Mubo nga mga Sulat

1. Thomas S. Monson, “Kon Kamo Andam Dili Kamo Mahadlok,” Liahona, Nob. 2004, 116.

2. Thomas S. Monson, “Tulo ka mga Tumong nga Mogiya Kaninyo,” Liahona, Nob. 2007, 119.

3. Thomas S. Monson, “The Mighty Strength of the Relief Society,” Ensign, Nob. 1997, 95.

4. Ang sundanan nga “masayud, mobuhat, mamahimo” kasagarang gigamit isip bayanan alang sa pagpalambo sa pagkalider ug sa diskusyon sa plano sa Ginoo alang sa espirituhanong paglambo sa Iyang mga anak. Tan-awa sa Thomas S. Monson, “Sa Pagkat-on, sa Pagbuhat, sa Pagkahimo,” Liahona, Nob. 2008, 60–68; ug Dallin H. Oaks, “The Challenge to Become,” Liahona, Nob. 2000, 32–34. Alang sa detalyadong paghulagway sa matag usa sa mga elemento niini nga sundanan, tan-awa ang tulo ka volume nga serye ni David A. Bednar, Increase in Learning (2011); Act in Doctrine (2012); ug Power to Become (2014).

5. Mga Pagtulun-an sa mga Presidente sa Simbahan: Joseph F. Smith (1998), 382.

6. Mga Pagtulun-an sa mga Presidente sa Simbahan: Joseph Smith (2007), 320.

7. Kini nga kinutlo gikan ni Brigham Young maayong naghulagway sa ideya: “Ang relihiyon ni Jesukristo dili lamang mohimo sa mga tawo nga makasinati sa mga butang sa Dios, ug mopalambo sulod kanila og labing maayo nga pamatasan ug kaputli, apan kini naghatag sa matag pagdasig ug pag-aghat nga mahimo, aron sila motubo sa kahibalo ug sa salabutan, sa matag sanga sa mekanismo, o sa mga arte o mga siyensya, kay alang sa tanang kaalam, ug ang tanan nga mga arte ug mga siyensya sa kalibutan naggikan sa Dios, ug kini gihimo alang sa kaayohan sa iyang mga katawhan” (Mga Pagtulun-an sa mga Presidente sa Simbahan: Brigham Young [1997], 226).

8. Ania ang usa ka ehemplo sa sayop nga ideya nga naggikan sa mga tradisyon sa kultura nga makaapekto sa mga young adult: Usa ka henerasyon ang milabay, ang usa ka tawo nga nagpuyo sa malamboon nga kalibutan makakita og nindot, maayo’g sweldo nga trabaho nga dunay igong kita aron makasuporta sa pamilya bisan aduna lay gamay nga edukasyon sa high school o, mas maayo, nakagradwar sa high school. Kana nga ideya nagpadayon gihapon bisan pa sa kamatuoran nga sa kadaghanan sa mga tawo, sa kadaghanan sa malamboong mga nasud, ug bisan gani sa naglambo pa nga mga nasud, wala na kana nga panahon. Ang edukasyon ug pagkat-on lapas sa high school sa mga natad nga gikinahanglan pag-ayo, pinaagi man sa pag-angkon og sertipikasyon sa teknikal nga mga kahanas o pag-angkon og degree sa kolehiyo, (ug sa pipila ka mga natad adunay advanced degree), nahimong kinahanglanon alang sa pagsuporta og pamilya, sa pagsangkap alang sa mga tuig sa pagretiro ug sa pag-establisar og temporal nga pundasyon alang sa pagserbisyo sa Simbahan.

• BYU–Pathway Worldwide

  Kim B. Clark