Mga Tingog sa mga Santos sa Ulahing mga Adlaw
Daghan nga mga Milagro ni Cristina
Ang among pamilya nakasaksi og daghang mga milagro tungod sa akong igsoong babaye, nga si Cristina. Siya natawo uban sa seryoso nga depekto sa kasingkasing. Sa dihang gisusi siya sa mga doktor, gisultihan nila ang akong mga ginikanan nga dili siya makalahutay. Ang akong mga ginikanan, hinoon, mikugos sa ilang talandugon nga masuso sa ilang mga bukton ug misalig sa Ginoo. Ang pagkaluwas ni Cristina usa ka milagro.
Milabay ang katuigan, ug si Cristina nahimong lig-on, maalamon, madasigon, ug matahum nga batang babaye. Sa dihang 12 anyos na siya, kinahanglan siyang operahan aron butangan og artificial valve ang iyang kasingkasing. Nabalaka kami kon makalahutay ba siya sa operasyon, apan uban sa dakong kalig-on ug kaisug, nanamilit siya namo ug misulod sa operating room.
Naluwas si Cristina sa operasyon ug mipauli uban namo. Makita siya nga kanunay nga malipayon ug mapasalamaton sa Langitnong Amahan nga buhi ug adunay oportunidad sa pagkat-on ug pagtubo. Ang mga higala wala magtuo nga duna siyay depekto sa kasingkasing, tungod kay siya aktibo kaayo.
Human maayo gikan sa ataki sa dihang nag-edad siya og 16, gihangyo si Cristina sa pagtabang sa pagtudlo sa seminary. Giawhag niya ang daghang mga estudyante samtang sila nagsag-ulo sa mga kasulatan ug nagkat-on sa Basahon ni Mormon. Motukar usab si Cristina og piano ug ganahan mokanta. Wala siya magduhaduha sa dihang giimbitar siya sa pagdumala og choir nga dunay 60 ka mga tingog alang sa komperensya sa ward.
Sa dihang nag-edad siya og 22, naminyo si Cristina sa usa ka batan-ong lalaki sa templo sa kahangturan. Human maminyo, gitawag siya nga presidente sa Young Women sa iyang ward.
Sa dihang nag-edad siya og 26, ang panglawas ni Cristina dali kaayong migrabe. Miadto siya sa São Paulo alang sa pipila ka eksaminasyon. Didto nahibaloan niya nga nagkinahanglan siya og laing operasyon. Atol sa operasyon, giataki sa kasingkasing si Cristina nga mao ang hinungdan sa kadaot sa utok. Mga bulan ang milabay, ug wala siya moarang-arang. Isip usa ka pamilya nagpundok mi aron sa pagpuasa ug pag-ampo alang sa iyang pagkaayo, apan wala siya moarang-arang. Nakahukom mi nga magpuasa pag-usab, niining higayuna nangayo sa tabang nga madawat ang kabubut-on sa atong Langitnong Amahan. Pagkasunod adlaw namatay si Cristina.
Dili kini mao ang among gilauman, apan nakaamgo mi nga kini usa usab ka milagro. Dili na mag-antus si Cristina. Ang ebanghelyo mihatag kanamo og kalipay ug kalinaw, bisan sa panahon sa tumang kaguol. Tungod kay kami nabugkos, nasayud kami nga among ikauban pag-usab si Cristina.