Ang Milagro ni Sister Sheldon
Si Sister Sheldon mao ang pinakamaayong presidente sa Primary sukad! Abtik ug kataw-anan siya. Kon mobarug siya aron sa pagbuhat sa panahon sa pagpakigbahin, kaming tanan manganta og, “Panahon na sa pagpakigbahin ni Sheldon” samtang magwara-wara sa among mga kamot ug magpahiyom. Ganahan siya niini!
Sa sayong bahin sa 2015 nadiskubrihan ni Sister Sheldon nga aduna na usab siyay kanser, sa ika-limang higayon! Gipasabut niya namong tanan kon unsa ang kanser ug unsay mabuhat niini. Misulti siya namo nga tingali dili siya makasimba og pipila ka higayon ug tingali mawala ang iyang mga buhok. Mihangyo siya kanamo nga magpuasa ug mag-ampo aron makatabang nga mawala ang kanser.
Atol ning panahona, ang among Primary mibuhat sa matinabangong mga kamot nga hagit, diin migunting kami og mga papel nga kamot ug misulat niini og usa ka buhat sa pagserbisyo nga among nabuhat. Si Sister Ashby, sa kapangulohan sa Primary, nakahunahuna nga mohimo og matinabangong mga kamot nga habol alang ni Sister Sheldon. Gusto namong tanan nga masayud siya nga gihigugma namo siya, mao nga ang tibuok Primary midrowing og mga kamot ug mga kasingkasing, ug ang mga babaye sa adlaw sa kalihokan migamit niini sa paghimo og habol. Nanahi mi, namalantsa, ug mibu-bu sa tanan namong gugma ngadto niini. Ang pipila kanamo mibugkos pa gani og hilo sa among mga tudlo sa paghinumdom ni Sister Sheldon.
Among gihatag ang habol ngadto ni Sister Sheldon. Gidala-dala niya kini sa iyang mga sesyon sa chemotherapy ug mibati sa among gugma.
Ang pinakanindot nga bahin mao ang higayon nga si Sister Sheldon mihatag sa iyang pagpamatuod ngadto sa tibuok Primary. Misulti siya kanamo kon unsa kami ka espesyal ngadto kaniya ug nga siya nahigugma kanamo. Nasayud siya nga dako kami nga bahin kon nganong nakalahutay siya sa chemo pag-usab. Bisan og nahadlok ko nga basin dili siya makalahutay, nasayud gyud ko nga makahimo ra siya. Karon si Sister Sheldon wala nay kanser!