Seminary: Dapit nga Makahimo Kita’g mga Koneksyon
Sa daghan kaayong paagi, ang seminary mao ang dapit nga ang tanang butang mahiusa.
Mga paghulagway sa litrato sa mga batan-on sulod sa klasrom, nagmarka sa kasulatan, ug batan-ong lalaki nga nag-ampo pinaagi ni Mason Coberly
Usahay bation ba nimong nag-inusara samtang gipaningkamutan nimo ang pagsabut sa imong kinabuhi, mga pagsulay, ug ang mga kasulatan? Kon mao, ang usa ka paagi sa paglingkawas niini nga pagbati mao ang paghimo og mga koneksyon.
Usa sa pinakamaayong dapit sa paghimo niini mao ang seminary. Ania ang pipila sa mga koneksyon nga imong mahimo didto.
Makaila sa Ubang mga Tawo
Ang seminary usa ka maayo kaayong pahinumdom nga ikaw wala diay mag-inusara. Ug dapit kini nga makakonektar ka sa uban sa usa ka luwas ug matinabangong palibut.
Sa matag adlaw man kamong mag-abut sa klasrom o mohimo niini sa balay o sa online nga pag-eskwela, ang seminary mokonektar kanimo ngadto sa ubang kabatan-onan ug sa mapinanggaong teacher. Kining mga tawhana ang pinakamaayo nimong ikauban. Makasuhid ka sa mga kasulatan, makapangutana, makapangita’g mga tubag, makapaambit og mga hunahuna ug mga pagbati ug mga kasinatian. Makapangatawa kamo, makahilak, ug makapanganta—ug posibling magkadungan sa pagpangaon (makahangyo sa imong teacher; kon ang tubag dili, nan ayaw buhata).
Makigsumpay sa mga Kasulatan
Bisan og dugay na ug sa layong dapit gisulat ang mga kasulatan, ang seminary makatabang nga imong makab-ot ang lat-ang ug panahon aron makonektar gayud niini. Makatabang kini nga imong masabtan ang pagkaparehas ug mga kalainan tali sa nanglabayng panahon ug sa karon. Ug makatabang kini nga imong makita ang padayon nga mensahe sa Dios sa Iyang katawhan ug sa kalibutan. Niining paagiha, ang seminary makatabang nga imong makita sa unsang paagi ang Dios makigsulti kanimo pinaagi sa mga kasulatan ug sa Espiritu sa paghatag og giya nga haum kanimo. Makatabang usab kini nga ang kasulatan mahimong tibuok kinabuhi nga higala—usa ka padayong tinubdan sa kahupayan, tambag, ug tabang.
Sabta ang Relasyon sa Usag-usa nga mga Kasulatan
Unsa may kalabutan sa Alma ngadto sa Mateo? Ang Isaias may komon bang butang sa Doktrina ug mga Pakigsaad? Ang seminary makatabang nga imong makita ang higot nga nagsumpay sa tanang pagtulun-an sa ebanghelyo ngadto sa tanang kasulatan. Kon imong sugdan ang paghimo niining mga koneksyon, ang mga kasulatan magmapuslanon ug makahinam, mapamilyar ka usab ug mahigugma niini. Madagkutan ang imong kaikag sa paghimo og dugang pang koneksyon tali sa mga kasulatan. Ug anaa ra ang seminary nga motabang kanimo sa paghimo niini.
Ikonektar ang Imong Karon ug ang Imong Ugma
Ikaw-Karon posibling makadungog sa Imong-Ugma, apan maayo nga mas magkaila gayud sila. Pinaagi sa seminary makakuha ka og mas maayong ideya kon si kinsa kining tawhana nga Ikaw-Ugma. Sama pananglit, imong makita kon sa unsang paagi ang Imong-Ugma nga Pagka-misyonaryo mogamit sa mga kasulatan sa pagtudlo sa mga tawo sa ebanghelyo, pagsulbad sa ilang mga kabalaka ug pagtabang nga mausab ang ilang kinabuhi. O daklit nimong malantaw sa unsang paagi nga ang Imong-Ugma nga Pagka-ginikanan nagtanom og gugma sa mga kasulatan sa kasingkasing sa mga bata. O magsugod ka sa pagkasabut sa unsang paagi ang pagtutok sa mga kamatuoran gikan sa kasulatan makatabang sa Imong-Ugma nga Pagserbisyo sa Simbahan sa pagserbisyo, pagtudlo, ug pagdasig sa uban. Ug dayag lang, makita nimo sa unsang paagi nga ang Imong-Ugma mosinati og personal nga kalipay, kalinaw, ug inspirasyon gumikan sa kaanad sa inadlawng pagtuon sa kasulatan.
Palamboa ug Dawata kon si Kinsa gayud Ikaw
Ang tinuod nimong pagka-ikaw usa ka bahin kanimo nga nakaila unsa nga binuhat ikaw, diin ka gikan, ug si kinsa ang Langitnon nimong mga Ginikanan. Ikaw gayud mismo nakaila sa tinuod nimong potensyal, unsang matanga sa gahum ang anaa na kanimo, ug sa dakong gahum nga mahimo nimong maangkon kon husto ang imong mga pagpili.
Samtang i-master nimo ang mga doktrina diha sa mga kasulatan pinaagi sa seminary ug mobati sa Balaang Espiritu nga mokumpirmar sa kamatuoran niini sa imong kasingkasing, imong mapalambo kini nga kahibalo. Bation usab nimo nga aghaton ka sa Espiritu sa paglihok—sa paghinulsol, pagserbisyo, pag-ampo, pagkat-on, ug pagbuhat kutob sa imong mahimo aron mapalambo ang imong tinuod nga pagkaikaw nga nahibaloan sa imong Langitnong Amahan ug ni Jesukristo nga imong maabut.
Konektado sa Langitnong Amahan
Malig-on ang imong koneksyon sa Langitnong Amahan samtang mag-ampo ka Kaniya, magkat-on Kaniya ug sa Manluluwas, ug magpakabuhi sama sa unsay gusto Nila nga imong himoon. Sa seminary makat-unan nimo sa unsang paagi ang Langitnong Amahan makigsulti kanimo pinaagi sa mga kasulatan ug sa Espiritu Santo, nga moabut kanimo kon matinguhaon kang magtuon sa mga kasulatan. Maghatag usab kanimo ang seminary og kanunayng oportunidad sa pag-ampo, pagpamalandong, pagpamatuod, ug sa paghimo og uban pang mga koneksyon sa Langitnong Amahan.
Tan-awa kon sa unsang paagi kining mga batan-on mihimo og mga koneksyon.
Sa matag higayon nga naa ko sa seminary, akong mahibaloan nga gihigugma ko ug gipangga ko sa Langitnong Amahan! Ang pagtambong og seminary mipanalangin kanako og mas tin-awng panabut kon si kinsa ako ug nganong nia ko dinhi. Ang mga baruganan ug doktrina nga akong nakat-unan sa seminary nakatabang kanako sa paghimo og mga desisyon nga tarung. Hugot na karon ang akong desisyon nga magserbisyo og full-time nga misyon ug naghinam-hinam kong mopaambit sa ebanghelyo ngadto sa uban.
Marlou T., edad 20, Sorsogon, Philippines
Nagtubo ako nga dili kaayo aktibo sa Simbahan. Wala koy lig-on nga pagpamatuod. Apan dihang mitambong ko og seminary matag adlaw, akong nakat-unan nga makahimo ko sa pag-ampo ug makakuha og kahupayan ug mga tubag. Makasabut na ko sa mga istorya sa kasulatan. Sa wala pa ko mag-seminary wala gyud ko magtuo nga makabasa ko og usa ka chapter nga ako ra. Akong nakat-unan ang unang mga baruganan sa ebanghelyo tungod kay nag-enrol ko sa seminary. Kanunay kong makakaplag og kalinaw sa seminary. Ang seminary giniyahan gayud sa Ginoo.
Brynn W., age 17, Idaho, USA
Sa akong katuigan sa seminary, nakakat-on kog daghan kon diin ko gikan, nganong nia ko dinhi, ug unsay akong buhaton. Ang seminary nagtudlo kanako unsaon nako sa pagpangutana ug pagpangita og mga tubag. Sa una, lisud ang pag-apply sa kasulatan sa akong kaugalingon. Apan sa matag leksyon, among mahisgutan unsaon sa paggamit niini sa among kinabuhi, mao nga wala lang ko makakat-on sa mga istorya sa kasulatan apan nakaamgo nga ang akong kinabuhi kalabut pud diay niana nga sugilanon ug nga ang mga propeta nagbilin og mga direksyon para kanako. Tungod niana, mas sayon na alang kanako ang pagpangita sa eksaktong paagi ug paghimo sa eksaktong mga desisyon.
Anastasia V., edad 18, Moscow, Russia
Ang akong gugma sa sumbanang mga basahon milambo og dako sa matag tuig sa seminary. Kini nga gugma nakatabang nga mobati ko og mas dakong tinguha sa pagtuman sa unsay gusto sa Langitnong Amahan nga akong buhaton. Mitabang siya kanako nga mobati og sinserong gugma alang sa akong silingan. May oportunidad ko sa pagpaambit sa ebanghelyo ngadto sa matag tawo nga naglibut kanako. Pinaagi sa seminary nga programang dinasig sa Dios, nakalingkawas ko sa mga kalisdanan nga gitanyag kanako sa kalibutan. Ang Langitnong Amahan mitabang aron akong mahibaloan unsa nga matang sa anak ang iyang gusto nga akong maabut, unsang mga butanga ang akong tutukan, ug unsaon nako sa paglihok.
Mirian C., edad 18, Guatemala, Guatemala
Sa milabayng duha ka tuig, nanlimbasug ko sa clinical depresyon ug kabalaka. Sa miaging tuig mas ngil-ad ang akong gibati kay sa tanang nangagi. Nagkaubos ang akong pagpamatuod, ug ang seminary na lang ang daw nagbira kanako. Nakahimamat ko og pipila ka mga babaye nga diha dayon akong nasuod nga higala. Ang mga kasulatan makahuluganon na kanako. Ug ang among teacher mitudlo sa paagi nga ang mga istorya sa Bag-ong Tugon bahin ni Jesukristo nga dugay na kaayong panahon nahimong tukma kaayo sa among batan-ong kinabuhi. Nagkaanam ko og kaila sa akong Manluluwas ug sa akong Langitnong Amahan. Sa hinay-hinay ang akong pagpamatuod wala lamang manumbalik apan nagkalig-on pa gayud kini. Ang akong pakigbugno sa kondisyon sa akong panghunahuna wala mobiya kanako, apan tungod sa seminary, ang paglaum nga nawala sa makausa karon hayag na kaayo. May pagpamatuod ko kang Jesukristo; nasayud kong buhi Siya, nahigugma Siya kanato, ug mahimo Niyang pas-anon ang atong mga palas-anon kon moduol kita Kaniya. Kon wala ang seminary dili unta nako madawat kana nga panalangin.
Jalee D., edad 16, Colorado, USA
Sa wala pa ko mag-first year sa seminary, wala pa ko kasabut nganong kinahanglan kitang magtuon sa kasulatan. Nagtuo ko nga mga sugilanon lang kini nga makapuol. Apan salamat sa seminary, akong nakat-unan nga ang matag istorya naglangkob og bililhong leksyon ug magamit kini karon dayon sa akong kinabuhi. May tinguha na kong magpadayon sa pagkat-on sa mga kasulatan.
Oscar B., edad 15, Limón, Costa Rica
Nabunyagan ko niadtong Mayo 2016. Ang first year nako sa seminary nagsugod wala madugay nianang tuiga. Nagpanuko ko sa sinugdanan, ug dili ko andam nga mobangon og sayo, apan giaghat ko sa pag-adto. Dili pa gihapon ko sigurado mahitungod sa pag-ila sa tingog sa Espiritu, apan ang pagtambong og seminary nakatabang nga akong mailhan kana nga tingog. Pinaagi sa Espiritu, akong nahibaloan nga ang mga kasulatan tinuod. Nasayud ko nga ang Espiritu miaghat kanako sa pag-highlight sa mga kasulatan uban sa kahulugan ug aduna kini hinungdan sa kanunay. Ang mga kasulatan mogiya kanako kon ako mawala, ug nagtudlo kini kanako. Sa matag higayon nga bati ang akong adlaw, makaabli ra ko niini ug mas momaayo ang akong adlaw.
Shelby L., edad 16, Montana, USA