Unsaon sa Pagtubag uban sa Kristohanong Kaisug

Ni Elder Robert D. Hales

Sa Korum sa Napulog Duha ka mga Apostoles

Gikan sa usa ka pakigpulong sa Oktubre 2008 nga kinatibuk-ang komperensya.

Usa sa dakong mga pagsulay sa mortalidad moabut kon ang atong mga gituohan gikwestiyon o gisaway. Niana nga mga higayon, gusto natong motubag sa agresibong mga paagi—sa “pagbutang sa atong mga depensa.” Apan kon kita motubag sa mga tig-akusar kanato sama sa gihimo sa Manluluwas, dili lamang kita mahimong mas sama ni Kristo, maingon man nagdapit kita sa uban nga bation ang Iyang gugma ug mosunod usab Kaniya.

Isip tinuod nga mga disipulo, ang una natong hunahunaon mao gayud ang kaayohan sa uban, dili personal nga kaayohan. Ang mga pangutana ug mga pagsaway naghatag kanato og oportunidad sa pagtabang ngadto sa uban ug mopakita nga sila importante sa atong Langitnong Amahan ug kanato. Ang atong tumong mao nga tabangan sila nga makasabut sa kamatuoran, dili ang pagdepensa sa atong kahusto sa usa ka debate sa teyolohiya. Ang atong kinasingkasing nga pagpamatuod mao ang pinakagamhanan nga tubag nga atong mahatag sa mga tig-akusar kanato. Ug kana nga pagpamatuod matawo lamang diha sa gugma ug kaaghup. Kinahanglan mahisama kita ni Edward Partridge, diin ang Ginoo miingon, “Ang iyang kasingkasing putli diha sa akong atubangan, kay siya sama ni Nathanael sa karaan, kinsa walay pagpanglimbong” (D&P 41:11). Ang pagkawalay pagpanglimbong mao ang pagbaton og pagkainosente sama sa bata, nga dili daling masilo ug dali nga makapasaylo.

Sa tanan nga nagtinguha nga masayud unsaon nato sa pagtubag ang mga tig-akusar kanato, akong tubag, kita mohigugma kanila. Bisan unsa ang ilang kaliwat, tinuohan, relihiyon, o politikanhong pagtuo, kon mosunod kita kang Kristo ug ipakita ang Iyang kaisug, kinahanglan higugmaon nato sila. Wala kita magpatuo nga mas maayo kita kay kanila. Hinoon, nagtinguha kita uban sa atong gugma nga mopakita kanila og mas maayo nga dalan—ang dalan ni Jesukristo. Ang Iyang dalan mopaingon ngadto sa ganghaan sa pagbunyag, ang higpit ug pig-ot nga agianan sa matarung nga pagpuyo, ug ang templo sa Dios. Siya mao “ang dalan, ang kamatuoran, ug ang kinabuhi” (Juan 14:6). Pinaagi lamang Kaniya kita ug tanan natong mga kaigsoonan makapanunod sa labing dakong gasa nga atong madawat—kinabuhing dayon ug walay katapusang kalipay. Ang pagtabang kanila, nga mahimong ehemplo alang kanila, dili alang sa mga huyang. Alang kini sa mga lig-on. Alang kini kaninyo ug kanako, ang mga Santos sa Ulahing mga Adlaw kinsa nagbayad sa bugti sa pagkadisipulo pinaagi sa pagtubag sa mga tig-akusar kanato uban sa Kristohanong kaisug.