Mga Tingog sa mga Santos sa Ulahing mga Adlaw
Nanawag na Usab Kanako ang Dios
Paghulagway pinaagi ni Carolyn Vibbert
Human akong nakompleto ang pag-eskwela sa kolehiyo, nahimo kong usa ka research scientist. Nabansay sa siyentipekanhong paagi, gidawat lang nako ang butang nga mabatyagan ug mapamatud-an. Nabuhi ko nga walay impluwensya sa Dios sa akong kinabuhi; sa tinuoray usa ko ka atheist [dili motuo og Dios].
Dayon usa ka buntag nakadawat ko og tawag nga grabe ang pagkaaksidente sa akong anak sa sakyanan. Sa pagpadulong sa ospital, naaghat ko sa paglitok sa pag-ampo sa Ginoo, nga akong nakat-unan sa bata pa ko. Dili na ko kahinumdom niini, apan akong gibati nga kinahanglan gihapon kong mag-ampo.
Bisan og mitawag ang Dios kanako, dihang naibanan na ang kabalaka ug naulian na ang akong anak, padayon gihapon kong nagpakabuhi nga wala Siya sa akong kinabuhi.
Mga tuig sa wala madugay nakig-date ko og usa ka babaye nga ginganlan og Rubí. Miyembro siya sa Ang Simbahan ni Jesukristo sa mga Santos sa Ulahing mga Adlaw, apan dili siya aktibo. Nagkauban kami sulod sa tulo ka tuig dihang nagsugod ang iyang tinguha nga mosimba. Gihangyo ko niya sa pagkuyog, apan kanunay kong mobalibad.
Usa ka adlaw miabut sa among pultahan ang mga misyonaryo. Gihatagan ko nila og Basahon ni Mormon ug gihatagan ko og assignment nga ipabasa. Akong gibasa ang ilang gihangyo apan wala koy gibati. Moadto pud ko sa Simbahan apan kanunay kong magpanuko. Bisan pa, gibati nako nga kinahanglan kong mopadayon og basa sa Basahon ni Mormon. Nanawag na usab kanako ang Dios.
Samtang padayon kong nagbasa, misugod ko sa pagbati nga ang basahon tinuod. Nagkadako ang akong pagtuo. Dihang miabut na ko sa 3 Nephi 13:9–13 ug gibasa ang Pag-ampo sa Ginoo, ang Espiritu miputos kanako. Mibakho ko. Nanawag na usab ang Dios sa ikatulong higayon. Niining higayuna naminaw ko.
Mitubo ang akong pagtuo sa Dios. Gusto kong masayud pa og daghan. Sa mubong panahon, akong nabasa ang tanang mga sumbanang basahon. Nagpadayon ko sa pagsimba, ug human si Rubí ug ako naminyo, nabunyagan ko. Dili gyud ko makalimot sa kalipay nga akong gibati sa dihang gikumpirmahan ko isip miyembro sa Simbahan.
Karon usa gihapon ko ka research scientist. Apan karon akong nakita ang kamot sa Dios sa tanang mga butang. Mouyon ko sa giingon ni Alma nga, “Ang tanan nga mga butang nagpakita nga adunay Dios; oo, bisan ang yuta, ug ang tanan nga mga butang nga anaa sa ibabaw niini, oo, ug ang paglihok niini, oo, ug usab ang tanan nga mga planeta diin naglihok sa ilang naandan nga paagi nagsaksi nga adunay Makagagahum nga Tiglalang” (Alma 30:44).