Ang Pagdesisyon sa Pagkahimong Matinud-anon

Ni Elder Enrique R. Falabella

Sa Seventy

Kining upat ka desisyon makatabang kaayo kaninyo.

Usa sa pinakadakong hagit nga akong giatubang sa nagtubo ko sa Guatemala mao ang kakabus—espiritwal nga kakabus tungod kay wala kami mahibalo sa ebanghelyo ug temporal nga kakabus tungod kay diyutay ra ang among kwarta. Ang akong mama namatay dihang singko anyos pa ko, nga si papa na lang ang nag-atiman sa upat ka gagmayng anak. Tungod kay gusto ni papa nga magkapundok gyud mi, gidelegar niya ang ubang mga responsibilidad sa panimalay kanamong mga anak.

Ako ang kinamagulangan ug gi-assign ko nga tig-andam og paniudto ug panihapon sa pamilya matag adlaw. Sa sinugdanan lisud, apan akong nakat-unan ang pipila ka paagi sa pagpangluto. Matag adlaw ang akong papa magbilin og 25 sentabos nga ipalit og pagkaon. Magpalit ko og usa ka libras nga batong sa kantidad nga 6 sentimos ug usa ka libras nga bugas sa kantidad nga 7 sentimos. Dayon mopalit ko og uling nga 5 sentabos nga gamiton nako sa pagluto sa tanan, 2 sentimos nga panghaling, ug 5 sentimos nga tortilla. Kada adlaw ko kining gibuhat, ug matag adlaw mangaon mi og kan-on ug batong nga may tortilla. Bisan kaniadto pa ang 25 sentimos gamay ra kaayo, apan mao ra kini ang among magamit.

Ang hagit mao kon unsay buhaton aron makalingkawas niining liyok [cycle] sa kakabus. Ug tanan kini nahimo gumikan sa mga desisyon—ang pagpili nga mobuhat og butang nga mas makaayo sa akong kinabuhi. Kita isip mga indibidwal kanunay nga naghimo og mga desisyon sa atong kaugalingon, bisan og wala kita magtuo nga kini atong mahimo. Sama pananglit, mopili kita nga motuo. Usahay bation nato ang kalibug kon mag-atubang kita sa unsay gitudlo sa kalibutan ug sa unsay gitudlo ni Jesukristo. Apan ang pinakamaayong tinubdan nga giya sa atong kinabuhi mao ang doktrina ni Jesukristo. Dihang mihimo ko og mga desisyon base niini nga doktrina, akong gibati ang Ginoo migiya sa akong kinabuhi.

Gusto kong mopaambit kaninyo og upat ka desisyon nga may dakong epekto sa akong kinabuhi. Kon kamo mohimo niining sama nga desisyon ug magmalig-on niini, mahimo usab kining panalangin kaninyo: (1) ang desisyon nga magpabunyag, (2) ang desisyon nga motuo kang Jesukristo ug magpabiling aktibo sa Simbahan, (3) ang desisyon nga mosalig sa mga saad sa Ginoo, ug (4) ang desisyon nga magpabiling matinud-anon ug mosunod sa tambag sa mga propeta.

Ang Desisyon nga Magpabunyag

Sa nag-12 anyos na ko, ang mga misyonaryo nagsugod sa pagtudlo sa akong mga igsoon ug kanako. Sa sinugdanan wala moapil ang akong papa. Maglingkod ra siya sa luyo nga kwarto luyo sa kurtina ug maminaw. Apan nakabasa siya og pamphlet sa Simbahan nga naghulagway sa unsang paagi ang usa ka lalaki ug babaye makasal sa tawo nga may tukmang katungod nga magkauban sa hangtud. Mikuha kini sa iyang pagtagad nga bisan og patay na ang iyang asawa, iya gihapon siyang ikauban pag-usab. Dihang nakat-unan niya kini, mihukom siyang magpabunyag. Ug nagpabunyag kaming tibuok pamilya.

Ang bag-ong nakaplagan nga panglantaw nga nahatag sa ebanghelyo nakatabang nga akong maamguhan nga posibli diayng makab-ot ang mas maayong mga butang kon kini akong gamiton ug magmasulundon. Mihimo ko og personal nga desisyon nga mobuhat ko bisan unsay gikinahanglan para magpabiling masubay sa dalan sa Ginoo.

Ang Desisyon nga Motuo kang Kristo ug Magpabiling Aktibo sa Simbahan

Sa piho akong nahinumduman nga mihimo niining saad usa ka adlaw dihang naglingkod ko sa chapel nga naghulat nga sugdan ang serbisyo sa pagbunyag. Samtang naglingkod ko nga namalandong kang Kristo, nagsugod ko sa pagbati og labihang kalipay nag-ingon kanako nga ang tanan nga akong nakat-unan sa mga misyonaryo tinuod. Nianang higayuna hilum kong mipasalig sa Dios nga kanunay kong mosalig Kaniya ug magpabilin kong aktibo sa Iyang Simbahan sa tibuok nakong kinabuhi kon nagpasabut man kini nga padayon kong makabaton og kalipay nga gikan sa Espiritu Santo. Para nako kini nga saad wala lang maglakip sa pagsimba matag semana apan sa pagsalig usab sa doktrina sa Ginoo, sa mga kasulatan, sa buhing mga propeta, ug ilabi na sa akong Manluluwas nga si Jesukristo.

Ang Desisyon sa Pagsalig sa mga Saad sa Ginoo

Bata pa kaayo ko nga mihimo niining importante nga desisyon nga mosalig sa mga saad sa Ginoo. Sukad niadto napamatud-an nga ang akong desisyon nakaayo kaayo kanako. Sa matag higayon nga dunay pagduha-duha, mahunahuna nako og balik ang pasalig nga akong gihimo ug kanunay nakong gibase ang mga desisyon sa akong kinabuhi niana nga pasalig. Ang sayo nga pagdesisyon sa mga sumbanan nga imong puy-an makatabang nga makahimo ka og eksaktong mga pagpili kon ugaling moabut man ang mga pagduha-duha o problema.

Duna koy halandumong kasinatian niini nga baruganan sa estudyante pa ko. Naningkamot gyud ko sa pag-eskwela sa pagkat-on ug pag-andam sa umaabut. Nahibalo ko nga aron makalingkawas sa kakabus, kinahanglan kong makatrabaho nga mag-abli og bag-ong mga oportunidad sa kinabuhi. Nasayud sab ko nga aron maangkon kining matang sa trabaho, kinahanglang tutukan nako ang akong edukasyon.

Kay importante man kaayo ang edukasyon para nako, mihimo ko’g personal nga desisyon nga dili ko magtuon inig ka Dominggo. Isip miyembro sa Simbahan nasayud ko nga ang Ginoo miingon nga ang Adlawng Igpapahulay Iya nga adlaw, dili atoa. Naningkamot ko nga mohimo og mapuslanong mga desisyon kon unsay akong buhaton niining espesyal nga adlaw. Hinoon, bisan human sa akong paghimo niini nga desisyon, usahay matintal ko nga supakon ang kaugalingon nakong balaod, ilabi na kon magsingabut ang eksamin. Mohunahuna ko, “Dili kini dautan; nagtuon ra bitaw ko. Mahimo ra kong mosimba inigka-buntag ug magtuon inig kahapon ug sa gabii.”

Apan kon mahinumduman nako ang saad nga akong gihimo nga magpabilin gyud kong aktibo ug matinud-anon sa tambag sa mga propeta sa Ginoo, mas sayon ang pagsunod sa akong desisyon nga dili magtuon inigka-Dominggo apan gamiton hinoon ang adlaw sa Ginoo sa pagserbisyo ug pagsimba. Nakahukom na ko nga magpabiling matinud-anon, mao nga para nako gikinahanglan lang ang pagsabut sa unsay giingon sa Ginoo mahitungod sa Igpapahulay ug paggamit sa Iyang tambag kutob sa akong mahimo sa akong kinabuhi.

Misangput nga ako ang nanghawod sa akong pagtuon ug pag-angkon og maayong trabaho nga nakatabang nga makasangkap ko sa akong pamilya. Nahibalo ko nga tungod kay gituman nako ang akong saad sa Ginoo, Iya kong gipanalanginan nga makamugna og mas maayong kinabuhi.

Ang Desisyon nga Magpabiling Matinud-anon ug Mosunod sa Tambag sa mga Propeta

Para sa matag usa kanato, ang pagpabiling matinud-anon sa Ginoo usa ka pag-establisar sa butang nga personal natong gituohan nga si Jesus mao ang Kristo, nga kadtong misulat sa mga kasulatan dinasig sa Dios, ug ang Unang Kapangulohan ug ang Korum sa Napulog Duha ka mga Apostoles tinuod nga mga suluguon sa Dios. Ang pagkahibalo nga adunay pagpadayag sa atong panahon ug nga ang mga propeta tinawag sa Dios makapasayon sa pagpabilin nga matinud-anon sa ebanghelyo kon makasugat ka og mga siwatsyon nga lisud.

Kon makapalambo ka og ingon niining matang sa pagsalig, niana dili ka gayud magproblema sa mga pangutana mahitungod sa dili angayang mga kinaiya o kalihokan. Tanan kini nga kabalaka matubag kon magtinguha ka sa tubag pinaagi sa hugot nga pagtuo pinaagi sa mga kasulatan, sa Espiritu, ug sa mga propeta—ang piniling mga sulugoon sa Dios.