Mga Tingog sa mga Santos sa Ulahing mga Adlaw
“Nasayud Ko Nga ang Dios Buhi”
Paghulagway pinaagi ni Allen Garns
Gikan ko sa Nigeria, Iningles ang sinultihan, mao nga sa dihang gitawag ko nga moserbisyo og misyon sa Benin Cotonou Mission ug nakaamgo nga ako mogamit og French nga sinultihan, gikulbaan ko. Unsaon man nako sa pagtudlo sa ebanghelyo? Sumala sa gipaabut, naglisud ko sa pagkat-on og French didto sa missionary training center sa Ghana. Daghang mga higayon gibati nako nga hapit wala nay paglaum.
Dayon, sa una nakong area, gihangyo ko sa pagpakigbahin sa akong pagpamatuod ngadto sa branch sa sinultihan nga French! Nahilom ang tanan samtang hinay kong naglakaw ngadto sa pulpito. Gikuot nako sa akong bulsa ang mubo nga pagpamatuod nga akong gisulat. Apan wala nako kini makit-i! Diha-diha gibati nako ang tumang kahadlok!
Sa dihang nagtan-aw ko sa nindot nga mga nawong sa akong atubangan, ang akong mga mata napuno sa luha. Duna koy daghan kaayo nga gusto nga ipakigbahin, apan wala ko kahibalo unsaon sa pagsulti niini. Gisulti nako ang bugtong butang nga akong nahibaloan sa sinultihan nga French: “Nasayud Ko nga ang Dios Buhi.”
Mibalik ko sa paglingkod ug kinasingkasing kong nag-ampo sa nahibilin nga mga oras sa miting. Gisultihan nako ang Langitnong Amahan nga gusto gyud kong makasulti og French, ug nga kon Siya motabang kanako, moalagad ako Kaniya sa tibuok nakong kasingkasing.
Tulo ka bulan ang milabay usa ka bag-ong magtiayon nga misyonaryo gikan sa Estados Unidos mibisita sa branch. Sila usab gihangyo sa paghatag og pagpamatuod. Ang sister milakaw padulong sa pulpito, misulti og pipila ka mga pulong sa French, ug dayon mihunong. Mga luha nangatagak sa iyang nawong. Hilom ang chapel. Miduol ko niya ug nangutana kon pwede ba ko nga mo-interpret para niya.
“Ah, nindot na, Elder,” miingon siya. Gibati nako ang Espiritu samtang siya nagsulti og Iningles, ug akong gihubad ang iyang pagpamatuod, sa pulong, nga French.
Human sa miting ang asawa sa presidente sa branch miingon nako, “nahinumdom ko nga dugay kaayo ka nakasulti sa, ‘Ako nasayud nga ang Dios buhi’ sa imong unang pag-abut dinhi. Oo, ang Dios gayud buhi ug Siya mitabang nga makat-on ka og French.”
Ako nasayud nga ang Dios nakasabut sa matag pinulongan ug sa matag problema nga atong giatubang. Anaa siya aron sa pagtabang kanato kon atong ibutang ang atong pagsalig diha Kaniya, ug Siya mopanalangin sa atong mga paningkamot kon kita mosulay. Tungod kay Iyang gitubag ang akong pag-ampo, nakahimo ko sa pagtudlo sa ebanghelyo sa sinultihan nga French, ug ang akong kinabuhi napanalanginan.