Mensahe sa Unang Kapangulohan

Ang Kinabuhi sa usa ka Disipulo

Ni Presidente Dieter F. Uchtdorf

Ikaduhang Magtatambag sa Unang Kapangulohan

Si Doe Kaku sa panahon sa iyang pagkakabig sa Simbahan.

Si Sister Kaku karon kauban ang iyang bana, si Anthony.

Traynta ka tuig na ang milabay didto sa Ghana, usa ka batan-ong estudyante sa kolehiyo nga ginganlan og Doe misulod sa meetinghouse sa LDS sa unang higayon. Usa ka higala midapit ni Doe sa pag-uban kaniya, ug si Doe nakuryoso nga masayud unsa ang Simbahan.

Ang mga tawo didto mga buotan kaayo ug mainiton nga dili niya kapugngan nga mahibulong, “Unsa man kining matanga sa simbahan?”

Nagustuhan kaayo ni Doe nga nakahukom siya nga magkat-on pa og dugang bahin sa Simbahan ug sa mga tawo niini, kinsa hilabihan kamalipayon. Apan sa iyang pagbuhat sa ingon, ang mga sakop sa iyang pamilya ug mga higala misugod sa pagsupak kaniya sa tanang paagi. Gisulti nila ang mangil-ad nga mga butang bahin sa Simbahan ug gibuhat kutob sa ilang mahimo sa paglukmay kaniya.

Apan si Doe nakadawat og pagpamatuod.

Siya adunay hugot nga pagtuo, ug siya nahigugma sa ebanghelyo, nga maoy nagtagbaw sa iyang kinabuhi uban sa hingpit nga kalipay. Ug mao nga, siya nagpabunyag.

Pagkahuman, subsob ang iyang pagtuon ug pag-ampo. Nagpuasa siya ug nagtinguha sa impluwensya sa Espiritu Santo sa iyang kinabuhi. Isip resulta, ang pagpamatuod ni Doe nagkalig-on ug nagkalawom. Sa katapusan nakahukom siya sa pagserbisyo og full-time nga misyon alang sa Ginoo.

Human sa iyang misyon, siya nakig-date ug nagminyo og returned missionary—sa tawo nga nakabunyag gayud kaniya sa milabayng mga tuig—ug wala madugay sila na-sealed sa templo sa Johannesburg South Africa.

Daghang katuigan ang milabay sukad si Doe Kaku unang nakasinati og kalipay sa ebanghelyo ni Jesukristo. Nianang panahona, ang kinabuhi dili kanunayng maayo alang niya. Giantus niya ang kaguol ug kawalay paglaum, lakip na ang pagkamatay sa iyang duha ka anak—ang dakong pagbangutan niadtong mga kasinatian bug-at lang gihapon kaayo sa iyang kasingkasing.

Apan siya ug ang iyang bana, si Anthony, naningkamot nga mas masuod sa usag usa ug sa ilang minahal nga Langitnong Amahan, kinsa ilang gihigugma sa tibuok nilang kasingkasing.

Karon, 30 ka tuig na human siya nabunyagan, si Sister Kaku bag-ohay lang nakakompleto sa laing full-time nga misyon—niining higayuna kauban na sa iyang bana, kinsa miserbisyo isip presidente sa misyon sa Nigeria.

Kadtong nakaila ni Sister Kaku makaingon nga adunay usa ka butang nga espesyal bahin kaniya. Mosanag siya. Lisud ang maka-uban siya nga dili ninyo bation ang kamalipayon.

Ang iyang pagpamatuod sigurado: “Ako nasayud nga ang Manluluwas nagtan-aw kanako isip Iyang anak nga babaye ug higala (tan-awa sa Mosiah 5:7; Ether 3:14),” miingon siya. “Ug ako mao ang nagkat-on ug naningkamot sa pag-ayo nga mahimo usab nga Iyang higala—dili lamang sa akong gisulti apan pinaagi usab sa unsay akong buhaton.”

Kita Mga Disipulo

Ang istorya bahin ni Sister Kaku susama sa daghang mga tawo. Aduna siyay tinguha nga masayud sa kamatuoran, naningkamot siya aron makaangkon og espirituhanon nga kahayag, gipakita niya ang iyang gugma sa Dios ug sa iyang isig katawo, ug sa pagbuhat sa ingon nasinati niya ang kalisdanan ug kagul-anan.

Apan bisan paman sa katugbang, bisan paman sa kagul-anan, nagpadayon siya sa unahan inubanan sa hugot nga pagtuo. Ug ingon usab ka importante, iyang gipabilin ang iyang pagkamalipayon. Nakaplagan niya ang paagi dili lamang sa paglahutay sa mga kalisdanan sa kinabuhi apan sa paglambo usab bisan pa niini!

Ang iyang istorya susama ra sa inyoha ug sa akoa.

Panagsa ra nga ang atong panaw hapsay o walay pagsulay.

Matag usa kanato adunay mga kaguol, mga kasagmuyo, mga kasub-anan.

Tingali bation nato nga nawad-an kita og kadasig ug may mga higayon nga mabug-atan.

Apan kadtong kinsa nagsunod sa kinabuhi sa usa ka disipulo—kinsa magpabiling matinud-anon ug magpadayon sa unahan uban sa hugot nga pagtuo; kinsa misalig sa Dios ug mituman sa Iyang mga sugo;¹ kinsa nagsunod sa ebanghelyo matag adlaw ug matag oras; kinsa makahatag og Kristohanong pagserbisyo niadtong naglibut kanila, usa ka maayong buhat matag karon ug unya—mao kadtong kansang ginagmay nga mga buhat ang kanunayng makahimo og dakong kalainan.

Kadtong mas mabination, mas mapasayloon, ug mas maloloy-on mao ang makadawat og kalooy.² Kadtong mohimo niining kalibutan nga usa ka mas maayong dapit, usa ka pag-amuma ug buhat sa paghigugma sa matag karon ug unya, ug maningkamot sa pagpakabuhi sa kinabuhi sa usa ka disipulo ni Jesukristo nga mapanalanginan, naay katagbawan ug kamalinawon mao kadtong makakita og hingpit nga kalipay sa katapusan.

Sila nasayud nga “ang gugma sa Dios, nga makatag sa tibuok kalibutan diha sa mga kasingkasing sa mga anak sa mga katawhan … kini ang labing madanihon sa tanan nga mga butang … ug ang labing hingpit nga kalipay ngadto sa kalag.”³

Mubo nga mga Sulat

1. Tan-awa sa Mosiah 4:6.

2. Tan-awa sa Mateo 5:7.

3. 1 Nephi 11:22–23.

Pagtudlo niini nga Mensahe

Si Presidente Uchtdorf nagtudlo kanato nga ang dalan sa pagkadisipulo lisud apan kadtong kinsa nagsunod sa “malinawon nga kinabuhi sa usa ka disipulo ni Jesukristo mao kadtong kinsa sa katapusan makakita og hingpit nga kalipay.” Sama nga si Presidente Uchtdorf nagsulti sa istorya ni Doe aron mapakita kon unsaon sa usa ka tinuod nga disipulo ni Jesukristo nga makakaplag og kalinaw ug kalipay bisan sa mga pagsulay sa kinabuhi, mahimo nimong ikonsiderar ang pagpakigbahin og usa ka istorya gikan sa imong kaugalingong kinabuhi kon ngano nga kamo mopili sa pagsunod ni Kristo ug sa unsang paagi Siya nakapalig-on kaninyo. Kon kamo giyahan pinaagi sa Espiritu, pagpakigbahin og personal nga mga istorya nga makapalig-on niadtong inyong gitudloan.

• Hingpit nga Kalipay isip usa ka Disipulo ni Jesukristo.

• Ang Maayo ug Dili Maayong Panahon sa Kinabuhi