Pag-ugmad og Relasyon sa Bag-ong mga Higala

Si Elder Neil L. Andersen ug ang iyang asawa, si Kathy, mibisita sa Democratic Republic of the Congo sa Africa. Nagpahigayon sila og miting sa Simbahan sa gawas, ilawom sa mga tolda. Sa palibut sa mga tolda adunay dako nga koral. Si Elder Andersen makakita sa mga bata nga nagtan-aw kanila gikan sa gawas sa koral. Si Sister Andersen nangutana kaniya, “Basin ganahan kang modapit sa mga bata nga mosulod?” Si Elder Andersen miduol sa tawo diha sa mikropono. Gihangyo niya ang tawo sa pagdapit sa mga bata nga mosulod ug moapil kanila.

Nagdagan pasulod ang mga bata! Nagpahiyom silang tanan ug naghinam-hinam nga mahimong kabahin sa miting.

Si Elder Andersen misaysay usab og istorya kabahin sa batang lalaki nga ginganlan og Joshua kinsa mitabang sa laing bata diha sa simbahan.

Sa dihang si Joseph, usa ka batang lalaki gikan sa Uganda, miadto sa simbahan sa unang higayon, wala siyay pamilya didto nga motabang kaniya nga masayud kon asa paingon. Dayon ang mga misyonaryo mipaila kaniya kang Joshua.

Si Joshua misulti kang Joseph nga siya mahimong iyang higala. Gihatagan niya si Joseph og songbook sa Primary, ug milingkod siya tupad kaniya. Dayon ang klase sa Primary mikanta sa “Ako Anak sa Dios” ngadto ni Joseph. Ang tanan mihimo kang Joseph nga mobati nga espesyal kaayo, ilabi na ang iyang bag-ong higala, si Joshua. Dihang midako na sila, si Joshua ug Joseph miserbisyo isip managkompanyon nga misyonaryo!

Kini nga mga kasinatian mipahinumdom kang Elder Andersen nga kitang tanan kinahanglang mougmad og relasyon sa mga tawo nga naglibut kanato kinsa tingali mibati nga napasagdan o nag-inusara.