Mga Tanong at mga Sagot

“Matagal ko nang ipinagdarasal ang isang mahalagang bagay, pero hindi ko alam kung nakatanggap na ako ng sagot. Paano ko ito malalaman?”

Ang pagtanggap ng mga sagot sa mga dasal ay inilalarawan bilang isang proseso: una ay pag-aralan ang iyong tanong sa iyong isipan; pagkatapos ay itanong mo sa Diyos kung tama ba ang iyong sagot. Kung tama ang iyong sagot, ang Panginoon ay “[mangungusap] ng kapayapaan sa iyong isipan” (D at T 6:23).

Pero paano kung hindi ka nakaramdam ng nakapupuspos na kapayapaan? O kaya naman ay pakiramdam mo mayroon kang sagot, ngunit hindi ka sigurado kung sa iyo galing iyon o sa Espiritu Santo?

Ayon kay Elder David A. Bednar ng Korum ng Labindalawang Apostol: “Ang paghahayag ay dumarating nang paunti-unti at ibinibigay ayon sa ating hangarin, pagkamarapat, at paghahanda.”¹ Hindi ito laging agad na dumarating; kadalasan ito ay dumarating nang “taludtod sa taludtod, ng tuntunin sa tuntunin” (2 Nephi 28:30), at madalas ay kailangan mong humakbang patungo sa isang direksyon bago mo pa man maramdaman na nasa iyo na ang buong kasagutan. Kung minsan ay hindi ka talaga makakatanggap ng sagot—dito mo kailangang kumilos nang may pananampalataya na sasagot ang Diyos kapag dumating ang tamang panahon.

Kung nag-aalala ka kung ang iyong sagot ay nagmula sa iyo o mula sa Espiritu Santo, tandaan mo na ang pinakamainam na sagot ay iyong “nag-aanyaya at nang-aakit [sa iyo] na gumawa ng mabuti, at ibigin ang Diyos, at maglingkod sa kanya” (Moroni 7:13).

Tala

1. David A. Bednar, “Ang Diwa ng Paghahayag,” pangkalahatang kumperensya ng Abril 2011.

Magdesisyon at Maghintay sa Espiritu

Noong isang tag-araw hindi ko naramdaman na sinagot ako ng Panginoon tungkol sa isang mahalagang desisyon. Araw-araw akong nagdasal nang taimtim upang malaman ang Kanyang kalooban para sa akin, at sinabi ko sa Kanya kung ano ang nais kong gawin. Dahil walang malinaw na kasagutan, nagdesisyon na ako. Agad kong naramdaman ang Espiritu na nagpatotoo sa akin na ang desisyong ginawa ko ay makatutulong upang umunlad ako at maging mas katulad ng aking Ama sa Langit. Minsan ay kailangan nating kumilos upang makatanggap ng kasagutan—iginagalang ng Ama sa Langit ang ating kalayaang pumili at ang ating mabubuting hangarin. Kung namumuhay tayo nang karapat-dapat, gagabayan tayo ng Kanyang Espiritu sa ating mga hangarin dahil ang mga ito ay iaayon sa Kanya.

Amanda H., edad 16, Utah, USA

Manalangin na Tulungan Ka

Nagdasal ako at tumanggap ng mga kasagutan sa maraming bagay, ngunit sa lahat ng ito ang pinakamarami ay may kaugnayan sa pag-aaral ko. Bago ang isang pagsusulit, nagdarasal ako na maging kalmado ako at maalaala ang mga impormasyong pinag-aralan ko. Maraming beses akong nakaalala ng mga buong talata ng impormasyon na alam kong hindi ko magagawa kung wala ang Kanyang tulong. Lubusan Niyang pinagpala ang aking buhay, at pinahahalagahan ko ang kapangyarihan ng panalangin at ang Kanyang tulong na nararamdaman ko sa pamamagitan nito.

Emily B., edad 18, Queensland, Australia

Maging Matiyaga at Mapagmasid

Kamakailan lamang, nagtakda ako ng mithiin para sa sarili ko na magdasal upang mabigyan ako ng mga pagkakataong maglingkod. Nag-isip ako ng mga paraan upang matulungan ang ibang tao, ngunit hindi ako nakatanggap ng sagot na pahiwatig para sa akin. Pinanghihinaan na ako ng loob, at ibinahagi sa akin ng aking ina ang Alma 5:40: “Ano mang mabuti ay nagbubuhat sa Diyos.” Natanto ko na ang mga ideyang naisip ko tungkol sa paglilingkod ay ang mismong mga pahiwatig mula sa Espiritu Santo. Alam kong ang ating mga dasal ay laging sinasagot; kailangan lamang nating maging matiyaga, maging mapagmasid, at magtiwala sa Panginoon.

Lybee B., edad 16, Oregon, USA

Magtiwala sa Espiritu

Kapag natutuhan mong magtiwala sa Espiritu Santo at nagkaroon ka ng kakayahang malaman ang paraan kung paano ka sinasagot ng Ama sa Langit, makikita mo na madali mong madama ang Espiritu. Napakarahan tayong hinihikayat ng Kanyang tinig na kung tayo ay abala sa mga bagay ng mundo ay hindi natin mapapansin ang banayad na bulong at damdamin na nagmumula sa itaas. Ngunit, kung tayo ay namumuhay nang ayon sa nararapat, matutupad sa atin sa tuwina ang pangako na mababatid natin sa ating puso ang sinasabi ng Espiritu bilang tugon sa ating mga pagsamo.

Sister Ribeiro, edad 24, Brazil Porto Alegre South Mission

Subukan at nang Makita!

Kung minsan ay iniuutos ng Panginoon sa atin na kailangan nating kumilos nang may pananampalataya bago natin matanggap ang kumpletong kasagutan. Nais mo bang malaman kung ang Word of Wisdom ay talagang kautusan mula sa Diyos? Kung gayon ay sundin mo ito! Nais mo bang malaman kung totoo ang Aklat ni Mormon? Kung gayon ay basahin mo ito! Magtiwala sa pangako na nasa Juan 7:17: “Kung ang sinomang tao ay nagiibig gumawa ng kaniyang kalooban, ay makikilala niya ang turo, kung ito’y sa Dios, o kung ako’y nagsasalita na mula sa aking sarili.”

Preston O., edad 19, Utah, USA

Sa Pamamagitan ng Kapangyarihan ni Jesucristo

Nanonood ako noon ng palabas na Face to Face broadcast kasama sina Elder Rasband at Sister Oscarson nang isang kabataan ang nagtanong ng ganito ring bagay tungkol sa pagtanggap ng mga kasagutan. Binanggit ni Sister Oscarson ang nakasaad sa Moroni 7:16, “Sa pamamagitan ng kapangyarihan at kaloob ni Cristo … malalaman ninyo nang may ganap na kaalaman na iyon ay sa Diyos.” Ipinapakita ng banal na kasulatan na maaari nating malaman ang kalooban ng Diyos para sa atin nang may ganap na kaalaman. Damhin mo ang Espiritu at malalaman mo ang kasagutan.

Sara S., edad 17, Santa Catarina, Brazil

Ang mga sagot ay nilayong makatulong at magbigay ng pananaw, hindi bilang mga opisyal na pahayag ng doktrina ng Simbahan.

Ang Inspirasyon ay Paunti-unting Dumarating

“Kapag humihingi tayo ng inspirasyon na tutulong sa ating magdesisyon, binibigyan tayo ng Panginoon ng mga banayad na pahiwatig. Kinakailangan dito ang mag-isip, manampalataya, magsikap, magpunyagi kung minsan, at kumilos. Bihirang dumating kaagad ang buong sagot sa isang napakahalagang bagay o mahirap na problema. Mas madalas, dumarating ito nang paunti-unti, nang hindi pa nakikita ang mangyayari sa huli.”

Elder Richard G. Scott (1928–2015) ng Korum ng Labindalawang Apostol, “Learning to Recognize Answers to Prayer,” pangkalahatang kumprensya ng Okt. 1989.

Susunod na Tanong

“Kung minsan pakiramdam ko ay hindi ako nararapat mahalin ng Tagapagligtas. Paano ko mapaglalabanan ang pakiramdam na ito at makita ang kahalagahan ng aking sarili?”

Ipadala ang iyong sagot at, kung nais mo, isang high-resolution na larawan bago sumapit ang Enero 15, 2018, sa liahona.lds.org (i-klik ang “Submit an Article”).

Ang mga sagot ay maaaring i-edit ayon sa haba o para malinaw.