O Se Matauila Lanumumu e Tasi

Saunia e Lori Ries

E alala le tusitala i Oregon, ISA.

O se meateuteu faigofie o le laau Kerisimasi na faamanatuina mai ia te a’u le uiga moni o le Kerisimasi.

O le Kerisimasi sa le o se Kerisimasi. E ui ina sa ou taumafai ia fiafia e ala i le tataina o pese o le Kerisimasi i tua atu, sa ou tosoina mai i fafo ia pusa sa teuina ai [teuga o le kerisimasi] ma se loto faanoanoa. O le fagu tuu kuki i le faatusa o se tamaloaaisa, sa na ona faamanatu mai ai ia te a’u, e leai o tasi ma te tao kuki faatasi. O le faatusa o le Tama o le Kerisimasi sa foliga e fai mai, e itiiti lava le mafuaaga e tautau ai totini o le Kerisimasi, ae o le pepa afifi tosi lanumeamata ma pa’epa’e, sa faamanatu mai ia te au e faapea, o lena taeao o le a le aumaia ai ni leo o ni tamaiti sagisagi fiafia.

O le tausaga lenei, sa alu ese atu ai le matou uii mo le kolisi, ma na lagona i le matou fale le taaligoligoa ma le filemu. Sa ou filifilia na’o ituaiga teuteu e le o ni Tama o le Kerisimasi, ae toe tuu isi mea uma i totonu o o latou pusa.

O le toesea ai o lo’u toalua i le isi taulaga, sa ou teuteuina toatasi ai le laau. Sa tuu i luga o le initoneti e le toalua o la’u tama tama ia ata o le [la] fanau o tautau ia teuga i luga o le latou laau, ma sa moomoo lava lo’u loto mo aso ua mavae. Sa ou mafaufau i le vave o le alu o le taimi. Na faapefea ona vave matutua la’u fanau? O le taula’i ai i o’u mafaufauga, sa ou tepa ifo ai i le matauila sa i lo’u lima. Sa na o se matauila lanumumu e tasi.

Sa ou iloiloina le lanu, o se lanumumu paauli. ‘Ula’ula. Sa ou fetilofa’i solo i le faatauvaa o le mea sa totoe o teuga: o ni nai faatusa o le fanau mai o [Iesu], o se moegavaovao sa fauina i fasilaau o aisapopa, ma se teuga sa sipelaina ai le upu NOEA i mataitusi auro. Sa maligi o’u loimata. O le matauila sa lanumumu—e mumu e pei o le toto togiola o le Faaola.

Sa ou mafaufau i le ala sa masani ona ou faatusatusa i ai teuga, o tipiga o kuki, ma le fiafia o tamaiti i le taeao o le Kerisimasi ma le mea sa faafiafiaina ai a’u i le vaitau o le Kerisimasi. Ona ou mafaufau lea i la’u fanau ma o latou auaiga e faavavau. Sa ou mafaufau i le olioli uma lava sa ou maua i totonu o lo’u aiga ma le oiloli na latou maua i o latou lava auaiga. Sa ou mafaufau loloto i le auala na mafai ai ona tupu lena mea ona o le pepe na taoto i le moega vaovao. Sa mapuna a’e se lagona mafanafana manaia i lo’u loto a’o ou mafaufau loloto i le meaalofa o le Faaola—e le mo na’o au, ae ua mo tagata uma.

“Ona fai mai lea o le agelu ia te i latou, Aua tou te matatau: aua faauta, ou te aumai ia te outou le tala lelei, e olioli tele i le nuu uma” (Luka 2:10; ua faaopoopo le faamamafa).

A o faaauau ona ou teuina le laau, sa ou manatunatu loloto i le maualalo o le soifua mai ma le soifuaga o Iesu Keriso. Sa afio mai o ia e fonofono i e malepelepe, atiina ae i e ua solipalaina, faamafanafana i e tuuatoatasi, aumai le filemu i e le atoatoa, ma tuuina mai le agaalofa mo e puapuagatia. Sa soifua mai ma maliu o Ia ina ia mafai ona tatou toe nonofo faatasi ma Ia i le malo o lo tatou Tama. Sa afio mai o Ia ina ia mafai ona iloa e le tagata le fiafia moni. Sa faatumulia lo’u loto ma ou maua ai le olioli ia Keriso aua o Keriso o le Kerisimasi.