O Auala e7 e Maua Ai le Agagao le Kerisimasi
O le soona fai ma mea faafiafia e malie, ae o auaunaga [e faia ma le] fiafia o le mea taua lea e maua ai le agaga o le Kerisimasi.
Ata na tusia e Michael Mullan
“E pei lava e le o se Kerisimasi.”
Pe i ai se taimi na e mafaufau ai faapena? Atonu o lou lagona lena i le taimi nei: E tusa lava po o le a le leotele e taina ai pese o le Kerisimasi, po o le fia foi o kuki o le Kerisimasi ua e aia, ae e te le o lagonaina ai lava le agaga o le Kerisimasi.
Afai ua pei oe o lena, pe o loo e tau suea ia lagonaina lena fiafia atili o le Kerisimasi i lenei tausaga, ia faaauau pea ona faitau!
Sa saunoa mai Peresitene David O. McKay (1873–1970) i se faaupuga faigofie: “O le agaga o le Kerisimasi o le agaga lea o Keriso, lea e susulu atu ai o tatou loto i le alofa faaleuso ma le faauo ma uunaia ai i tatou e faia galuega agalelei o le auauna atu.”1 Ua ioeina foi e Bonnie L. Oscarson, o le sa avea ma Peresitene Aoao o Tamaitai Talavou: “O le auala e faateleina ai le agaga o le Kerisimasi o le aapa atu lea ma le agalelei ia i latou o siomia i tatou ma tuu atu i ai i tatou lava.”2
O le teuteuina o laau ma le tuuina atu o meaalofa o auala ia e faamanatu ai le Kerisimasi, ae o le mea taua e lagona ai le agaga o le Kerisimasi o le auauna atu lea i isi. (Siaki le tusiga na muamua atu, “Auauna Atu e pei ona Sa Faia e le Faaola,” e aoao atili ai e uiga i auaunaga.)
Ma o le tala fiafia! E tele auala matagofie e auauna atu ai i isi i le vaitaimi o le Kerisimasi. Faataitai nisi o mea nei, ma e le umi ae e lagonaina le mafanafana o le Agaga ma lagona le latalata atili atu i le Faaola—o le agaga moni o le Kerisimasi!
1. Asiasi i e tuuatoatasi.
Mafaufau ia i latou e te iloa atonu e le o i ai ni aiga ma ni uo e faatasi i ai i aso fiafia. Mafaufau e asiasi i se tagata matua po o se tasi faatoa siitia atu i le tou pitonuu. O le aapa atu i le na’o se tagata tuuatoatasi e tasi e mafai ona mamana. Sa faailoa mai e Elder David A. Bednar o le Korama a Aposetolo e Toasefululua, “sa auauna atu [Keriso] i le ‘tasi,’” e ala i le fesoasoani i tagata taitoatasi.3 E mafai ona tatou faia faapea.
2. O e usuusu pese [o le Kerisimasi].
Na e iloa e ese le fiafia o le tatou perofeta i pesepesega o le Kerisimasi? A le o le feei i “pese valea faigofie e uiga i le Tama o le Kerisimasi” po o le usuina ma le migao o au viiga e sili ona fiafia i ai e uiga i le Faaola, e talitonu Peresitene Russell M. Nelson, o le faasoaina atu o musika i isi o se auala matagofie lea e “lagona moni ai le agaga tonu o le Kerisimasi.”4
3. Vaavaai solo ae e te le’i vaavaai i lau telefoni.
E te le tau tuua lau telefoni i lau taga i le aso atoa, ae o le i ai ma le taulai atu ia i latou o loo siomia oe, o se auala sili lea e toe lagona ai le agaga o le Kerisimasi.
Fai mai Sister Oscarson, “Nai lo le avae i luga o lau telefoni e vaai po o a mea a au uo o fai, taofi, vaavaai solo, ma fesili ia te oe lava, ‘O ai o manaomia au i le aso?’” “Atonu o oe o le ki lea i le aapa atu ma pai atu i le olaga o se paaga pe tuuina atu se faamalosiauga i se uo o loo tauivi le leoa.”5
4. Fai ni galuega faaopoopo.
Pe mafai moni e le tapenaina o le fale, ofo atu e tausitama, po o le faia o soo se galuega faaopoopo i le fale, ona fesoasoani e te lagona ai le agaga o le Kerisimasi? Afai e te faia ma le agaga sa’o, e mautinoa lava o le a e lagonaina! A o e fufuluina pe tapenaina, mafaufau i le tagata o loo e auauna atu i ai. Mafaufau i le matuai fiafia o lou aiga po o uo i le meaalofa o lou galue malosi!
5. Ave atu ni meaai suamalie o le Kerisimasi!
E faatatau i na kuki o le Kerisimasi lea na ta’ua muamua sa e aia, aisea e le tope ai le faiga o ni meaai suamalie e sili ona e fiafia i ai o le Kerisimasi? Atonu e te tofoina e oe lava ni nai mea (pe sili atu foi), ae o le ki i le lagonaina o le agaga o le Kerisimasi o le foai atu lea.
6. Faasoa atu se vitio o le Kerisimasi.
Faasoa atu se savali o le Kerisimasi i luga o faasalalauga faaagafesootai. Siaki i Savali FaaMamona o le Kerisimasi mo nisi o manatu. Atonu foi e te faafiafiaina le aso o se tagata i le na’o le faasoa atu o le vitio o le Kerisimasi a le Ekalesia o loo i luga o le Mormon.org. E mafai ona e auina atu i se uo pe faasoa i luga o lau lava itulau.
7. Ia e faia faaliloliloina.
O le a se tele o ni auaunaga faalilolilo e mafai ona e faia e aunoa ma le iloaina o oe? E mafai ona e tuua ni faatauga po o ni meaalofa i luga o le fasitepu a se tagata, momono se faamatalaga puupuu agalelei i totonu o le taga o se peleue, sua le kiona, pe salu laulaau—ae ia mautinoa e leai se tasi e iloaina o oe [sa faia]! Manatua: ia fai faalilolilo au meaalofa (tagai Mataio 6:4).
Auaunaga i le Kerisimasi
O teuga feemoemoa’i ma faaaliga faalauaitele o fiafiaga e mafai ona aumaia ai le maofa ma le malie i ou aso fiafia, ae a oo loa i le lagonaina o le agaga moni o le Kerisimasi, o auaunaga fiafia o le mea taua lea.
“Ina ia faamamaluina moni lava le afio mai [o le Alii] i le lalolagi, e tatau ona tatou faia e pei ona sa Ia faia ma aapa atu i le agaalofa ma le alofa mutimutivale i o tatou uso a tagata,” o le saunoaga lea a Elder Dieter F. Uchtdorf o le Korama a Aposetolo e Toasefululua. “E mafai ona tatou faia lenei mea i aso taitasi, e ala i upu ma galuega. “Ia avea lenei mea ma a tatou tumasani o le Kerisimasi, po o fea lava o tatou i ai—ina ia agalelei teisi atili, ia faamagalo atu atili, faaitiitia le faamasino atu, ia lotofaafetai atili, ma ia agaalofa atili i le faasoaina atu o a tatou mea ua maua ia i latou o e le tagolima.”6