Sa Taufai Faamanuiaina Uma i Ma’ua
Anna Fingerle
Hesse, Siamani
Ata na tusia e Carolyn Vibbert
Ina ua so’a a’u e se taavale ma ou pau ese ai mai la’u uila, sa faapea ona tauaso ai le afa o la’u vaaiga. O le sili laitiiti atu ma le fa tausaga mulimuli ane, i le vaitaimi o le Kerisimasi i le 2011, sa ou lagonaina ai le uunaiga e fai atu i se uso sa ou iloaina i se uarota sa ou i ai muamua mo se faamanuiaga faaleperisitua. Sa ou vaai i lea uso mai lea taimi i lea taimi, o lea sa ou le malamalama ai pe aisea e tatau ai ona ou fai atu ia te ia. Sa ou iloaina sa i ai isi alii agavaa sa umia le perisitua e mafai ona ou fai atu i ai.
I vaiaso na sosoo mai ai, sa atili malosi mai ai le lagona e manaomia so’u faamanuiaga faaleperisitua. Sa ou auauna atu o se tagata faigaluega i le Malumalu o Frankfurt Siamani, o lea na tonu ai ia te au e fai atu i se uso iina mo se faamanuiaga.
Ina ua uma ona ou faia lenei faaiuga, ae ulufale mai loa i le malumalu le uso sa uunaia au e fai i ai. O le taimi lava lea sa ou iloa ai, o lenei mea sa le faafuasei—sa finagalo le Tama Faalelagi ou te fai atu i lenei uso faapitoa. Sa oo ina ou maua le lototele ma talosagaina ma te fia talanoa pe a uma lana sauniga. Sa ioe mai o ia.
Mulimuli ane, sa ou faamatala atu i ai, ou te le’i iloa pe aisea, ae na ou lagonaina sa ou manaomia se faamanuiaga mai ia te ia. Na fai mai o ia o le a fiafia o ia e fesoasoani mai. Sa ia valaauliaina se isi uso i totonu o le potu ona amata lea ona tuuina mai se faamanuiaga ia te a’u. Ina ua mae’a, sa ou le mautonu. Sa manaia le faamanuiaga, ae sa leai se mea na faapitoa le taua e uiga i ai.
Ona pupula lea o o’u mata.
Ina ua pupula a’e o’u mata, sa toeitiiti lava a manino atoa le potu i la’u vaai. Sa ou le talitonu i ai! Sa ou fesili atu i le uso pe na ia iloaina le mafuaaga na avea ai o ia ma tagata sa manaomia ona tuuina mai lenei faamanuiaga ia te a’u. O lana tali sa faalotomaualaloina ai a’u.
“Ou te iloa o lenei faamanuiaga sa le mo na’o oe,” o lana tala lea. “Sa mo a’u foi. O taeao ou te tuuina atu ai se faamanuiaga i si ou tei teine ona o le a papatisoina o ia. E le malolosi lo’u aiga i le Ekalesia, ma o ia o le tagata muamua lea o le aiga o le a papatisoina i le toeitiiti 20 tausaga. E toatele lo matou aiga o le a auai i le papatisoga, ma sa ou le mautinoa pe sa lava le malosi o lo’u faatuatua e tuuina atu ai le faamanuiaga. O lenei la ua ou iloa, e mafai ona ou faia.”
I aso na sosoo mai ai, sa lava ai le faaleleia atili o la’u vaai o lea sa ou le toe manaomia ai lo’u tootoo lanupa’epa’e. Sa ou afifiina ma tuuina atu o se meaalofa o le Kerisimasi i lenei uso faatasi ai ma se tusi. “Ou te iloa e le o le tootoo lenei o Mose,” sa ou tusi ai, “ae ou te faamoemoe e faamanatu atu ai ia te oe le mana o le perisitua o loo e umiaina.”
E alofa le Tama Faalelagi ia i tatou ma e fiafia e faamanuia mai i tatou. O lenei faamanuiaga i le Kerisimasi e le gata ina toefuatai mai ai la’u vaai, ae na tuuina atu ai foi i se alii lotomaualalo e umia le perisitua le talitonu i lana auaunaga faaleperisitua.