O Katie ma Quincy
E alaala le tusitala i Iuta, ISA.
Sa masani lava ona fesoasoani Quincy ia Katie. Ae o le po lenei, sa manao Katie e fesoasoani ia Quincy!
“E alofa le uo i aso uma lava” (Faataoto 17:17).
E fiafia lava Katie e pese. E fiafia o ia e siva. Ae o le mea sili lava, e fiafia o ia i Aso Sa! O le aso lena e mafai ona vaai ai o ia i lana uo o Quincy.
O Katie e le atoatoa lona mafaufau ma lona malosi. O nisi o taimi i le lotu, e le mautonu ai o ia ma le iloa ai le mea e fai. Ae sa ia iloaina o le a i ai Quincy iina e fesoasoani ia te ia.
E uu e Quincy le lima o Katie ma la savavali atu i le Peraimeri. O nisi taimi e feminoia’i ai Katie i le taimi o le fetufaaiga, ona fusi lea o ia e Quincy. Sa fesoasoani pea o lea e faatoafilemu ia Katie. A uma le taimi o fetufaaiga, ona fesoasoani lea o Quincy ia Katie e su’e lana vasega. E alofa lava Katie ia Quincy.
I se tasi o aso sa iloa ai e Katie na i ai se mea faanoanoa sa tupu i le aiga o Quincy. Ua maliu Cory le tuagane matua o Quincy! Na iloa e Katie o le a faanoanoa tele lana uo. Sa ia iloa foi sa alofa tele Quincy i lona tuagane matua.
Sa ta’u atu e Tina ia Katie o le po nanei o le a o atu ai tagata i le falelotu e faailoa atu i le aiga o Quincy e alofagia i latou. O taeao o le sauniga o le maliu o Cory.
“E te fia sau i le falesa i le po nanei ma ma’ua ma Tama?” Sa fesili atu ai Tina ia Katie.
Sa luelue le ulu o Katie. Sa manao e ta’u atu ia Quincy e alofa ia te ia!
Sa fesoasoani Tina ia Katie e fai lona ofu manaia. Ona latou tietie atu lea i le falesa.
Ina ua latou taunuu atu iina, sa vaaia e Katie le toatele o tagata. Sa ia iloaina nisi o i latou mai le lotu. Sa vaai o ia i lona epikopo. Sa vaai o ia i lona faiaoga o le Peraimeri. Ae sa le’i vaai o ia i lana uo.
“Tina, o fea Quincy?” Sa fesili ai Katie.
Sa le’i iloa e Tina.
“Aisea tatou te le fesili ai i se tagata?” Na fai atu ai Tina.
E masani ona le fiafia Katie e talanoa i le mea e toatele ai tagata. Ae o le po lenei, sa manaomia lona mauaina o Quincy! Sa lagona e Katie le lototele. Sa savali atu o ia i le epikopo.
“Ua faanoanoa Quincy. E tatau ona ou suea Quincy!” sa ia fai atu ai ia te ia.
Na ataata le epikopo ma uu le lima o Katie. “Ia ta o loa e su’e Quincy.”
Sa o faatasi le epikopo, Tina, ma Katie e savavali faataamilo i le falelotu. Mulimuli ane sa latou maua o ia! Sa saofai Quincy i se tulimanu. Sa matuai foliga faanoanoa lava o ia.
Sa savali atu Katie i lana uo ma fusi mai o ia. Sa mafaufau o ia i le misia tele e Quincy o lona tuagane.
“E le afaina, Quincy. O le a tausi e Iesu ia Cory,” o le tala lea a Katie. Sa ia popo ma le faaeteete le lauulu o Quincy, ma le mautinoa ia malu.
Sa amata ona tagi Quincy. Sa atili fusi mau o ia e Katie.
“E le afaina,” sa fai atu ai Katie. “O le a tausi e Iesu ia Cory.”
Na tagi pea lava pea Quincy. Sa faaauau pea ona fusi e Katie lana uo. Ina ua mavae se taimi, sa filemu teisi ifo Quincy. Sa masusu pea o ia, ae sa le toe tagi tele. Sa tilotilo a’e o ia ia Katie.
“Faafetai lava Katie,” o lana tala lea. “E sa’o oe. O le a tausi e Iesu lo’u tuagane.”
Sa fiafia Katie sa mafai ona fesoasoani i lana uo ia lelei ona faalogona. E alofa o ia ia Quincy!
O Uo e I Ai Manaoga Faapitoa
O isi manaoga faapitoa e faafaigata ai ona galue le tino. O nisi manaoga faapitoa e faafaigata ai ona galue le faiai. O isi tagata e i ai se manaoga faapitoa e aafia ai o latou faiai ma o latou tino. E le afaina po o le a, o tamaiti uma lava o se atalii po o se afafine taua ma alofaina o le Atua!
Afai e te fetaui i se tagata e i ai se manaoga faapitoa:
Aua Le …
-
Sioa, tusitusilima, pe femusua’i e uiga ia i latou.
-
ua le amanaiaina i latou.
-
Ula ia i latou.
-
Fai atu ni upu faatiga ia i latou.
Fai …
-
Faatalofa i ai ma ia agalelei.
-
Fesili i ai i se auala faaaloalo.
-
Tu atu mo i latou pe afai e faatiga i ai isi tagata.
-
Ia manatua o i latou o se atalii po o se afafine o le Atua, e pei foi o oe!