Faasaoina mai le Palapala

Saunia e Elder Adilson de Paula Parrella

O le Fitugafulu

“Le alofa o lo’u Fa’aola ou te fa’ailoa atu. O lo’u auauna atu ou te manuia ai.” (Tusipese a Tamaiti, 42).

E nonofo lo’u aiga i São Paulo, Pasila. I le isi itu o le matou auala, sa i ai se toga togo. O toga togo e i ai vaitafe e tatafe atu i lalo o laau. O le eleele e ese le palapala.

O le toatele o tagata e fau o latou fale i luga o lena eleele palapala. Latou te tuuina ni ogalaau lapopoa i totonu o le palapala. Ona fau ai lea i luga o o latou fale. Ae a timuga, e papa vai. E sao le vai i totonu o o latou fale. Ona leai lea o se mea e momoe ai tagata i le po.

A tupu lena mea, ona valaaulia lea e lo’u tama i latou uma e o mai i totonu o le matou fale. O nisi taimi sa oo i le 15 le toatele o tagata! Na te aumaia i latou i totonu o le matou potu malolo ma avatu ia i latou ni palanikeke. E fai e Tina se meaai mo i latou. Ona latou momoe lea i le matou fale seia oo i le aso e sosoo ai.

E le itiiti ifo i le faatolu pe faafa ona tupu lenei mea. Ou te manatua lo’u mafaufau e faapea, “E le toatele ni tagata latou te taliaina ni tagata ese.” Sa faataga e lo’u tama ia tagata sa matou tau le iloaina e momoe i lo matou fale! Ona ou toe mafaufau ai lea, “E leai se isi mea e mafai ona latou o i ai.”

Sa fai e o’u matua i taimi uma ni mea e fesoasoani ai i tagata. Peitai o le la auaunaga ua le na’o le fesoasoani ma le foai atu. Sa faaali atu le alofa i o matou tuaoi, e tusa lava pe o matou tuaoi o se tagata matou te le iloaina lelei.

E tatau ona tatou aapa atu i tagata e le tagolima. E tatau ona tatou fesoasoani ia i latou i mea uma e mafai ona tatou faia. E le tatau ona faatapulaa mea tatou te faia e fesoasoani ai i tagata. E mafai ona tatou tuu atu ni nofoaga ma ni punaoa. E mafai ona faasoa atu o tatou taimi. E mafai ona faasoa atu lo tatou malamalama e uiga i le Tama Faalelagi ma Iesu Keriso, ae maise lava i le vaitau o le Kerisimasi.