I le Pulelaa
O Faaiuga ma Vavega: A O Lenei Ua Ou Iloa
Sa i ai se taimi o lo’u olaga sa faagaeetia ai a’u i le alofa ma le Malamalama o Keriso. Talu mai lena mea, ua suia ai lo’u olaga e faavavau.
Ua ou iloa le tulaga e i ai le ola e aunoa ma le talalelei. E 30 tausaga na ou ola ai faapena. Sa fanau i Rusia i ni matua lelei. … Ina ua ou matua, sa ou faaipoipo ma fanauina se pepe teine aulelei lava. Sa le’i leva ae ou faauu ma le manuia mai le iunivesite ma maua se galuega sa ou fiafia lava i ai. Ae peitai, … sa ou mamao lava ma le fiafia.
… Sa faasolo malie lava ina malepe … la’u faaipoipoga. … Sa seasea mafai ona ou saunia ni meaai faatauvaa mo i ma’ua ma la’u tama teine. Sa ou agasala. Sa ou faia lea filifiliga sese i le uma ai o le isi filifiliga sese. O le fiaai, atuatuvale, ma faaiuga le lelei sa matuai leaga ai lo’u olaga. Sa ou [tuuaia] le leaga o le laki, ma le le iloaina o le tele o itu sa ou mafatia ai i taunuuga masani o a’u agasala. Ae e faapefea ona ou iloa lena mea? E tusa ai ma mea sa aoaoina ai a’u, e le’i i ai le agasala. …
Sa faasaina tapuaiga i Soviet Union ina ua uma le Taua Faakomenisi i le 1917. Sa aoaoina a’u i le aoga faataitai e leai se mea e ta’u o se Atua, ma e na’o le Vaega Faaupufai Faakomenisi ma le Toeaina o Lenin e mafai ona aumaia le fiafia i tagata Rusia. Sa sauaina leaga lava tagata lolotu i lo tatou lotoifale, Sa tutuli ma galuega ia tagata talitonu, sa le faatagaina ona o i aoga, ma sa faaigoaina o “vale.” Sa tatau i tagata uma ona aooga i vasega e le talitonu i le Atua i le iunivesite, lea matou te faamaonia ai e le i ai se Atua. … Ou te le’i mafaufau lava i le Atua. Ae sa ou lagonaina le tiga i lo’u loto e uiga i a’u filifiliga leaga. Mulimuli ane, o le a ou iloa ai o le tiga sa ou lagonaina o le Malamalama lea o Keriso ua tuuina mai ia te au se lagona o le lotofuatiaifo e iloa ai le sa’o mai le sese. …
… O le olaga sa foliga mai ia te a’u o se ana pogisa ma e na’o le tuugamau lava o loo i le iuga. Na ou lagonaina sa ou oti lemu lava. Ou te lei iloa tatalo, o lea sa ou miti ai. … Sa ou miti e i ai se aso o le a ou sola ese ai mai mea leaga uma o lo’u olaga ma toe amata ai mai le amataga—olioli ma le sagisagi fiafia. Sa matuai ou manao lava ia maua e la’u tama teine se olaga lelei atu nai lo le olaga sa ou maua. …
Atapue mai le Getty Images
[Ona] oo mai lea o le Tusi a Mamona i lo’u olaga. Sa ou faitau se mataupu e tasi i taeao uma lava ae ou te le’i alu e faigaluega. O le faitauina o lenei tusi, sa ou aoao ai o loo soifua le Atua, o Iesu o Lona Alo, [o Le] sa afio mai i le lalolagi lenei e fesoasoani i tagata agasala e pei o a’u. O le tele lava o lo’u faitau i lenei tusi, o le tele foi lea o lo’u vaaia o le ava i le va o aoaoga a Keriso ma le ala sa ou ola ai. Sa ou aoaoina ai o le mafuaaga lena sa matuai leaga ai lo’u olaga. …
… Sa ou saunia mo se suiga tele lava. Ou te manatua pea lava le po … lea sa ou tagi ai i le po atoa, i le iloaina sa le lelei lo’u olaga, ma o a’u faaiuga leaga sa tiga ai tagata sa sili ona ou alofa i ai. O le aafiaga aupito tiga lea o lo’u olaga. Sa ou tagimasusu ma augani atu i le po atoa. … Ina ua tuanai le po, sa ou lelava lava ma na le toe i ai ni o’u loimata. Ina ua oso mai le ave muamua o le la susulu, sa oo mai le toafilemu ma le matuuese atu [o se avega] ia te a’u. Sa ou faalogoina upu: “O lo’u lima lenei. O le a ou taitaia ma taiala oe. Ae e tatau ona e tautino mai ia te au o le a e sui.” Ma sa ou faia; sa ou tautino atu. Sa ou manao i lenei taiala ma le fesoasoani e sili atu nai lo se isi lava mea. …
Ou te le’i iloa, i lena po tiga ma le olioli i Rusia, le maoae o folafolaga a Keriso. Ou te le’i iloa i lena taimi e faapea, i sina taimi e leo mamao lava, o le a ou malaga ai i Amerika i le mea o le a ou aoao atili ai e uiga i le talalelei, ma o le a le umi ae ou papatiso ai. … Ou te le’i iloa o le a sau la’u tama teine i Amerika e auai faatasi ma i matou i le fiafia. …
… Na Ia tuuina mai ia te a’u le tele o vavega lea e le’i i ai lava ma sina avanoa itiiti ou te masalosalo ai i Lona aao paia i lo’u olaga. …
Savavali faatasi ma Keriso! Pipii mau i Lona aao! Talisua i Ana afioga. Inu i Lona malamalama i ou puafu uma, ma lou loto atoa. I taimi o faafitauli, o le a le tuua oe i le pogisa o le ana ao le malamalama o Lona alofa faatasi ai ma le malamalama susulu tele e muamua atu ia te oe.