O le Meaalofa a le Faaola o le Filemu
Saunia e Elder L. Whitney Clayton
O Le Au Peresitene o Fitugafulu
Mai le saunoaga o le Faigalotu o le Kerisimasi a le Au Peresitene Sili, “Aua le Fefe,” na tuuina mai i le aso 6 Tesema, 2015, i le Nofoaga Autu o Konafesi.
E oo lava i se lalolagi lea e foliga mai o loo mamao ese lava le filemu, o le meaalofa a le Faaola, o le filemu e mafai ona nofo i o tatou loto e tusa lava po o a o tatou tulaga.
Nativity in Copper and Umber, saunia e J. Kirk Richards
E i ai ea se isi mea e sili atu nai lo o musika ma pesepesega matagofie o le Kerisimasi, faatasiga a aiga ma uo i le Kerisimasi, foliga ataata, ma le miomio fiafia o tamaiti? E i ai i le Kerisimasi se gafatia paia lea e aumaia faatasi ai i tatou o ni aiga, uo, ma ni afioaga. Tatou te tulimatai atu i le faafesuiaiga o meaalofa ma olioli i se taumafataga o o aso fiafia.
I le A Christmas Carol (Pese Kerisimasi), sa tusia e se tusitala Peretania o Charles Dickens, na maua lelei ai e le tama a le uso o Ebenezer Scrooges le mataina o lenei taimi paia o le tausaga. Sa ia tomanatu, “Sa ou mafaufau e le aunoa i le vaitau o le Kerisimasi, pe a oo mai … o se vaitaimi matagofie; o se vaitaimi manaia, o le agalelei, faafemagaloai, alofa le faatuaoia; na o le pau lea o le vaitaimi ou te iloa, i le kalena umi o le tausaga, e pei ai alii ma tamaitai ua malilie tasi e tatala … saoloto o latou loto, ma ia mafaufau i [isi] tagata. …Ma o lea … , e ui e le’i tuuina ai lava sina fasi auro poo se siliva i la’u taga, ae ou te talitonu ua faia ai se mea lelei mo a’u, ma o le a faia ai se mea lelei mo a’u; ma ou te faapea atu, ia faamanuia e le Atua!”1
I le avea ai ma se matua, ma o le taimi nei o se matua matua, na faamanatuina mai ai ia te au le matagofie o le Kerisimasi a o ou vaavaai atu i la’u fanau, ma o le taimi nei, o a latou fanau, o faamanatu le soifua mai o le Faaola ma olioli i le mafutaga a le tasi ma le isi, a o faapotopoto faatasi lo matou aiga. Ou te mautinoa sa e maitauina, e pei ona ou faia, le olioli ma le mama e tulimatai atu ai le fanau i le, ma fiafia i lenei aso fiafia faapitoa. O le vaaia o lo latou olioli e faamanatu mai ai ia i tatou taitoatasi ia Kerisimasi fiafia ua mavae. O Dickens lava foi lea na fai mai, “E lelei le avea faapei o ni tamaiti i nisi o taimi, ma e leai se isi taimi e sili atu ona lelei nai lo o le Kerisimasi, o le taimi lea sa avea ai le Faavae silisiliese o se tamaitiiti.”2
Sa ou ola a’e e latalata i Los Angeles, Kalefonia, ISA, lea sa siomia ai lo matou fale i ni toga moli. I se afiafi se tasi o Kerisimasi uma lava, na valaaulia ai e o’u matua ia aiga, uo ma tuaoi e o mai i le matou fale e usu ai pese o le Kerisimasi ma fiafia ai i ni taumafataga mama. Sa o se aga masani matagofie mo i matou uma lava, ma sa foliga mai e umi lava o pesepese. O i matou o tamaiti matou te pepese i se umi matou te mananao ai, ona matou sosola atu ai lea i le toga moli e taaalo ai.
Sa ma tausia foi ma lo’u toalua o Kathy lo ma aiga i Kalefonia i Saute, e latalata lava i le gataifale. O le Kerisimasi iina sa iloagofie lava i niu e lue solo i le savili. O tausaga uma lava, e tulimatai atu ai le ma fanau e o atu i le uafu e matamata i le solo o vaa teuteuina o le Kerisimasi. E fia selau vaafaila mananaia, e feemoemo mai i moli felanulanuai, e faaopeopea faataamilo i le uafu a o matou matamata ai ma le maofa.
O lenei la ua matou nonofo i le Aai o Sate Leki, Iuta, ISA, ua ma faia ai ma Kathy se aga masani o le ave atu o le ma fanau ma fanau a le ma fanau i se faafiafiaga i le lotoifale o le talafaatino o le A Christmas Carol (O se Pese o le Kerisimasi). O tausaga uma lava a o matou matamata atu ia Scrooge o faia lenei suiga faavavega mai se tagata nofotoatasi le alofa i se tuaoi fiafia na faatumulia i le olioli o le Kerisimasi, matou te lagonaina ai le uunaiga e tuuese le Scrooge o loo i totonu o i matou. Matou te lagona le uunaia e fai se lelei teisi atu e mulimuli ai i le faataitaiga a le Faaola o le alofa atu i tagata uma.
O Le Mana Faaola o Iesu Keriso
O le agaga suia o le vaitau o le Kerisimasi ua faavaeina i le mana faaola o Iesu Keriso ia sui ai o tatou olaga mo le lelei atu. O loo tusia i le tusi a Luka le tala faapelepele o le soifua mai o le Alo o le Atua i le silia ma le 2,000 tausaga ua mavae i Peteleema.
“O aso lava ia na oo mai ai le poloaiga a Kaisara Aokuso ia tusia uma ai le lalolagi. …
“Ua o uma atu foi i latou ia tusia, e taitasi i lona lava aai.
“Ua alu ae foi Iosefa mai Kalilaia, mai le aai o Nasareta, i Iutaia, mai le aai o Tavita, ua igoa ia Peteleema; . …
“Ia tusia faatasi ma Maria lana ava sa faufautane ia te ia, ua to o ia,
“Sa i ai i laua, ona oo lea i ona po e fanau ai o ia.
“Ua fanau e ia lana tama ulumatua, ua ia aui ia te ia i le ie, ma faataoto ia te ia i le falepovi; aua latou te le ofi i le fale e tali ai malo.
“Sa i le vao o lea nuu leoleo mamoe sa nonofo ai ma leoleo po i lo latou lafu mamoe.
“Faauta foi, ua tu mai ia i latou le agelu a le Alii, ua pupula faataaliolio mai foi ia te i latou le pupula o le Alii: ua matua fefefe ai lava i latou.
“Ona fai mai lea o le agelu ia te i latou, Aua tou te matatau: aua faauta, ou te au mai ia te outou le tala lelei, e olioli tele ai le nuu uma.
“Aua o le aso nei ua fanau ai i le aai o Tavita, lo outou Faaola, o le Alii ia o Keriso.
O le faailoga lenei ia te outou, e iloa e outou le tama meamea ua aui i le ie, o loo taoto i le fale povi.
“Ona faafuasei lea ona faatasi mai ma le agelu o au mai le lagi e toatele ua vivii i le Atua ua faapea ane,
“O le viiga i le Atua i mea aupitoaluga, ma le manuia i le lalolagi, o le finagalo alofa i tagata” (Luka 2:1, 3–14).
Aua Tou Te Matatau
The Sherperds Made Known Abroad, saunia e J. Kirk Richards
Sa iloa e le agelu le fefefe o leoleo mamoe ina ua ia faaali atu ia i latou, ma fai atu i ai “aua tou te matatau.” O le ofoofogia o le mamalu o le Atua lea sa susulu mai le avefeau na faafuseia mai le lagi, e moni lava sa oo ai le fefe i o latou loto. Peitai o le tala fou sa sau le agelu e faasoa mai, sa leai se mea e fefefe ai. Sa sau e fofoga mai se vavega, e aumai le tala sili ona manaia, e ta’u mai ia i latou ua amatalia moni lava le togiolaina o le tagata. E leai se isi avefeau sa aumaia muamua pe na toe aumaia talu mai lena taimi ni tala e sili atu ona fiafia ai.
Ua amatalia e le Alo e Toatasi na Fanaua o le Tama Lana malaga i le olaga nei: “Aua o le aso nei ua fanau ai i le aai o Tavita, lo outou Faaola, o le Alii ia o Keriso.” O tala fiafia moni nei e olioli tele ai.
Tatou te fetaiai uma lava ma taimi i o tatou olaga lea e foliga e le manino ma mamao ai le olioli tele lea na folafola mai e le agelu. Tatou te feagai uma lava ma vaivaiga ma faafatiatama’i o le olaga—ma’i, toilalo, faafitauli, faanoanoaga, ma mulimuli ai, o le oti. E ui ua faamanuiaina le toatele o tagata i le ola saogalemu faaletino, ae o nisi i aso nei e leai. E toatele o loo feagai ma le faigata tele o le faafetaiaia o manaoga o le olaga faapea ma aafiaga faaletino ma faalelagona lea e mafai ona aumaia e na manaoga.
Ae peitai, e ui lava i faafatiatama’i o le olaga, o le savali a le Alii ia i tatou taitoatasi ua tutusa lava i le aso e pei foi ona sa i ai i leoleo mamoe sa leoleo i le 2,000 tausaga ua mavae: “Aua tou te matatau.” Atonu o le tala a le agelu e aua le matatau, ua i ai se taua sili atu ia i tatou i aso nei nai lo le faatoafilemuina o le matatau o leoleo mamoe i lena po o le uluai Kerisimasi. Pe le o le uiga foi o lana tala, ia tatou malamalama ona o le Faaola, o le a le mafai ai lava ona manumalo le fefe? Pe le’i manao e faamamafa mai le mea moni e faapea, o le mata’u tele e le tauamiotonuina lava, ma e leai se faafitauli faaleolaga nei e tatau ona tumau, ma e leai se tasi o i tatou e le mafai ona togiolaina?
O le meaalofa aupito matagofie e tuuina atu i le Kerisimasi o le a le aunoa lava o le meaalofa na tuuina mai e le Faaola lava Ia ia i tatou: O Lona filemu atoatoa. Na fetalai o Ia: “Ou te tuuina atu ia te outou le manuia, o lou manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).
E oo lava i se lalolagi lea e foliga mai o loo mamao ese lava le filemu, o le meaalofa a le Faaola, o le filemu e mafai ona nofo i o tatou loto e tusa lava po o a o tatou tulaga. A tatou talia le valaaulia a le Faaola e mulimuli atu ia te Ia, o le a faavavau lava ona tafiesea ai le mata’u tumau. Ua saogalemu lo tatou lumanai. O “tala lelei [nei] e olioli tele ai le nuu uma.”
“Aua e te fefe,” na faamanatu mai ai e le perofeta o Isaia ia i tatou, “aua ou te ia te oe: aua le atuatuvale; aua o au lou Atua: ou te faamalosi oe; e moni ou te fesoasoani ia te oe; e moni ou te taofia oe i le lima taumatau o lau amiotonu” (Isaia 41:10).
Faamoemoe i le Faaola
Ona o le Faaola, sa soifua mai i le 2,000 tausaga ua mavae i Peteleema, ua i ai le faamoemoe—ma le anoano o isi mau mea. Ua i ai le togiola, mapuitiga, manumalo, ma le olioli. “O le a toilalo le sese, ae manumalo le mea tonu.”3
E leitioa a faaali faafuasei mai se aufaipese o agelu a o faasino atu se folafolaga faalelagi i le folafolaga e le agelu o le soifua mai o le Faaola, “O le Viiga i le Atua i mea aupitoaluga, ma le manuia i le lalolagi, o le finagalo alofa i tagata.” E leai lava se savali e mafai ona sili atu ona faamautinoaiina. E leai lava se savali sa sili atu ona faatumulia i le fiafia tele i tagata.
Talosia lenei vaitau ia o se vaitau o le filemu ma le olioli mo i tatou uma, “aua o le aso [lena] [sa] fanau ai i le aai o Tavita, lo [tatou] Faaola, o le Alii ia o Keriso.”