O le Faia o Lou Olaga o se Malaga Faaosofia Loto o le Tuputupu A’e Patino
Saunia e Elder Jeffrey R. Holland
O Le Korama a Aposetolo e Toasefululua
O le aoaoina, ola ai ma le aoaoina atu o le talalelei o loo i le totonugalemu o le ola agai atu i lo tatou gafatia faalelagi.
Ata mai le Getty Images
O se taimi fiafia tele lenei e avea ai o se tagata o Le Ekalesia a Iesu Keriso o le Au Paia o Aso e Gata Ai! Pe a ou mafaufau i atiinaega lata mai nei i le malo o le Alii, ua pei e manino lava le aveina e le Atua o i tatou i se malaga faaosofia loto i atumauga ma vanu ma vaaiga e ese le mataina e tau le mafai ona tatou vaai faalemafaufau i ai seiloga tatou te feaei maualuga teisi atu ma vaaia ai i latou i o tatou luma.
I le tausaga lava lea na te’a nei, sa tatou faamavae atu ai i se perofeta peleina ma lagolagoina ma le alofa se perofeta fou. Ua tatou faia se faiga fou i sauniga a le Aualofa ma le korama a le Perisitua Mekisateko, ma se faamamafaga tele atu i le fefautuaai faatasi ina ia ausia ai le galuega a le Alii. I lena lava agaga, ua tatou vaaia ai le aumaia faatasi e le Alii o faitaulaga sili ma le au toeaina i se korama e tasi ma molimauina ai se suiga tele i le ala e auauna atu ai le au perisitua ma tuafafine i fanau a le Atua. Afai ua le lava lena e te maofa ai, mafaufau i le faasilasilaga talu ai nei a le Au Peresitene Sili e uiga i punaoa fou e lagolagoina ai suesuega a le tagata lava ia ma le aiga o tusitusiga paia, faapea ma suiga talafeagai i anomea a le Peraimeri ma le Aoga Sa—ae le’i ta’ua ai le siitia faifaipea i eria o le galuega faafaifeautalai, suesuega o talafaasolopito o aiga, ma galuega faalemalumalu.
Ma e mautinoa lava e tele isi mea o le a oo mai. Ua tautino mai la tatou mataupu faavae o le faatuatua lona iva, “Matou te talitonu i mea uma ua faaalia mai e le Atua”—e masani lava o le vaega faigofie lena. E manaomia se ituaiga faatuatua faapitoa e “talitonu ai o le a Ia faaali mai le tele o mea silisili ma le taua tau i le Malo,” ona sauni lea e talia ia mea e tusa lava po o a. Afai tatou te mananao i ai, o le a taitai atu i tatou e le Atua i nofoaga tatou te le’i moemiti e mafai ona tatou o i ai—e pei lava le maualuga o le mea ua oo i ai a tatou miti. O Ona manatu ma Ona ala e mautinoa lava e sili atu le maualuluga nai lo o tatou [manatu ma ala] (tagai Isaia 55:8–9). I se isi itu, ou te manatu ua le pei i tatou o i latou i Katelani o e sa saunoa atu i ai le Perofeta o Iosefa Samita, “Ua le sili atu ni mea ua outou iloa e uiga i faamoemoega o lenei Ekalesia ma le malo nai lo o se pepe o i luga o vae o lona tina.”1
E Finagalo o Ia ia Suia o Tatou Loto
E ui lava i lea, a tatou toe tepa i tua i le mea sa tatou i ai, ou te faamoemoe e mafai ona tatou vaaia ai ni mea e tele atu nai lo na’o aiaiga faavae na suia, polokalama fou, ma tusi lesona faafou. O le galuega a le Alii o taimi uma lava e faatatau i tagata, ae le o polokalama. O a lava suiga Na te faatonuina mai i se faalapotopotoga po o se faatulagaga po o se mataupu aoaoina, o le mea o loo finagalo moni o Ia ia suia o oe ma a’u. E finagalo o Ia ia suia o tatou loto ma faaleleia o tatou lumanai.
Leai, e le mafai lava ona tatou vaai i na mea maoae ma taua o loo iai i le lumanai. Ae ua i ai ia i tatou ni nai manatu e uiga i le taunuuga mulimuli.
“A e le’i faaalia mai nei le uiga o i tatou a amulī; a ua tatou iloa, pe a faaali mai o ia, ona foliga ai lea o i tatou ia te ia, auā tatou te iloa tino ai lava o Ia” (1 Ioane 3:2).
“O a ituaiga o tagata [alii ma tamaitai] e tatau ona iai outou? E moni ou te fai atu ia te outou, e pei lava o a’u nei” (3 Nifae 27:27).
“O le a outou maua lona atoatoaga, ma faamamaluina ia te aʼu e pei o aʼu i le Tamā; o lea, Ou te fai atu ia te outou, o le a outou maua le alofa tunoa mo le alofa tunoa” (MF&F 93:20).
Ou te le iloa ia te outou, ae ia te a’u ia, e foliga mai lena mea o se malaga umi—ae manaia tele! Se sini ina a paia, e ui ina maoae, ae o le pogai tonu lena e matagofie ma musuia ai le talalelei toefuataiina. O loo i le ta’ele o o tatou loto ia se siuleo—o se manatua—e ta’u mai ai ia i tatou o le pogai lena na tatou o mai ai i le lalolagi. Sa tatou taliaina muamua ma taua le fuafuaga a lo tatou Tama oi le Lagi, ona sa tatou mananao ia avea e pei o Ia. Sa tatou iloaina o se sini faigata tele o le a le faigofie lava ona ausia. Ae sa le mafai ona faamalieina i tatou i se isi lava mea e itiiti ifo [lona taua]. Sa foafoaina o tatou agaga ina ia tuputupu ae, ma sa faaosofia i tatou i lena taimi ma le taimi nei e faia le malaga.
Aoao ma le Avea Ai
O le aoao atu, aoaoina, ma le ola ai i le talalelei o mataupu faavae taua ia o loo i le totonugalemu o le ola agai atu i lo tatou gafatia faalelagi ma le avea e pei o o tatou Matua Faalelagi. O nisi taimi tatou te ta’ua ai lenei faagasologa o le alualu i luma e faavavau. O nisi taimi tatou te ta’ua ai o le liua. O nisi taimi tatou te faaigoaina ai o le salamo. Ae po o le a lava le mea tatou te tauina ai, e aofia ai le aoaoina. Na saunoa le Perofeta o Iosefa Samita, “E tatau ona outou aoao i auala e avea ai outou lava ma atua, ma ia avea ma tupu ma faitaulaga i le Atua, … e ala i le alu mai le tasi tikeri itiiti i le isi, ma e mai se agavaa itiiti i se agavaa maoae. …
“Pe a e a’e i se apefai, e tatau ona e amata atu i le pito i lalo, ma agai atu i luga mai lea sitepu i lea sitepu, seia e taunuu i le tumutumu; ma e faapena i mataupu faavae o le talalelei—e tatau ona e amata i le muamua, ma faasolo atu ai seia e aoao i mataupu faavae uma o le faaeaga.”2
Ia sei tatou talanoa e uiga i le aoaoina. Ona ou te fiafia e faiaoga, ou te fiafia i le upu ma le manatu, e ui ou te manatu e tatau ona tatou faauigaina lelei teisi atu nai lo le mea e masani ona tatou faia ai. Mo faamoemoega o le talalelei, ou te le o faapea atu e na’o le faaputuina o le malamalama, e ui o se vaega lena. E le o le uiga foi o la’u tala le tau ina faalogologo i se tautalaga po o le taulotoina o mea moni. O le uiga o la’u tala i le aoaoina i se agaga o le tuputupu a’e ma le suia, o malamalamaaga loloto e tau atu i le faaleleia atili, o le iloaina o le upumoni, ia e faapea ona taitai atu ai i tatou e latalata atili atu i le Atua o upumoni uma.
Sa tuu faatasi e Peresitene Russell M. Nelson le aoaoina ma lenei suiga liua o le loto ina ua ia aoao mai e faapea, “e atiina ae le molimau pe a tuuina atu e le Agaga Paia le talitonuga i le tagata e saili faamaoni i le upumoni,” e uunaia ai le faatuatua, lea e “siitia ai le salamo ma le usiusitai i poloaiga a le Atua.” O vaega taua nei o le liua tatou te liliu ese ai “mai ala o le lalolagi i ala o le Alii,” lea e “aumaia ai se suiga tele o le loto.”3
O le mea lenei e le faatatau i le iloaina o igoa o ituaiga e sefululua o Isaraelu po o le tusiga o le ata o le faataoto i laau olive, e tusa lava po o le a le aoga o na faatinoga, O lenei ituaiga o aoaoina e faatatau i le suia o i tatou lava, e faatatau i le ese (lelei atu) ona ua tele atu mea ua tatou iloa e uiga i mea ua silafia e le Atua.
E mafai ona outou silasila i le ituaiga aoaoina o loo o’u talanoa atu ai, e matuai tele lava e le ofi i totonu o se potuaoga pe aoaoina foi i se lesona e 45-minute. O tusituisga paia, perofeta, matua, susulu o le la, aso timuga, uunaiga faaleagaga, ma mataupu aoaoina i aso taitasi o le olaga lava ia, o ia mea uma e tuuina mai ai avanoa mo i tatou e aoao ai e uiga i le Atua, ma Lana fuafuaga aua e moni lava “ua molimau mea uma” ia te Ia (Mose 6:63). Mulimuli ane, ua tatou iloaina uma e finagalo o Ia e aoao i tatou e le gata i le lotu ae i soo se mea ma soo se taimi—i taimi e le aloaia faatasi ma a tatou fanau ma a tatou uo, o o tatou tuaoi ma a tatou uo faigaluega, le alii po o le tamaitai tatou te vaai i ai i luga o le pasi po o le tagata faigaluega e fesoasoani ia i tatou i le maketi—po o fea lava ma soo se taimi lava tatou te mananao ai e aoao.
Ae o nei upumoni uma o loo taumafai le Atua e aoao ai i tatou i aso taitasi ua na’o se tele o ni fatu ua totoina i palapala gaoa po o totonu o vaotuitui ia e susunuina pe fetinaiina seiiloga tatou te faaaogaina le fautuaga a Alema e tausi i latou e ala i le faataitai i le upu, po o le, e pei ona fai mai Iakopo, ia fai ma e anaana i le upu ae aua le na ona faalogologo i ai (tagai Mareko 4:1–20; Iakopo 1:22; Alema 32:27–43). A tatou aoaoina upumoni ma filifili e faatinoina, e faapea ona tuputupu ae ai a tatou molimau (tagai Ioane 7:17). Ma, a tatou avea le upumoni o se vaega o i tatou e ala i le taumafai e ola ai pea e tusa lava pe [tatou te] fetaiai ma luitau, e faapea ona suia ai i tatou ma tatou avea atili ai e pei o le Tama o le upumoni.4
O le Aoaoina o le Talalelei E Totonugalemu i totonu o le Aiga
O le mea lena tatou te fai atu ai o le aoaoina atu, aoaoina, ma le ola ai i le talalelei e tatau ona “totonugalemu i le aiga ma lagolagoina e le Ekalesia.”5 Muamua, o le aiga o le mea lea e tele ina faaalu ai o tatou taimi—e mautinoa lava e tele atu le taimi nai lo le taimi tatou te faaalu i le lotu (e le aofia ai epikopo e ova galulue). Tatou te le faamoemoe e ola umi o tatou tino faaletino i se ‘aiga e tasi i le vaiaso—e tusa lava pe o se ‘aiga lelei lava. E faapena foi, afai o se vasega e tasi le itula i le Lotu, e tusa lava po o se vasega lelei lava o le Lotu, o le nofoaga autu lea mo lo tatou “taumamafa fiafia i le afioga a Keriso” (2 Nifae 31:20), o lona uiga ua tatou i ai i le tulaga matautia o le molemanava faaleagaga.
Lona lua, o le aiga o se potuaoga ma se potusu’esu’e, lea e matuai maopoopo ai le tuufaatasiga o le aoaoina ma le ola i le talalelei, lea e toetoe lava a tau le iloa [se eseesega]. O lenei aafiaga ola o le potusu’esu’e e le mafai lava ona toe fatuina i le na’o le potuaoga.
Atonu o le mea aupito taua, o le aiga o se—pe e mafai ona avea—o se siuleo o le lagi, o se faamanatu o le sini e faavavau lea na tatou o mai iinei e tuliloaina. E pei ona ta’ua ai e Peresitene Henry B. Eyring, Fesoasoani Lua i le Au Peresitene Sili: “E ui o aiga faalelalolagi e matua mamao lava mai le atoatoa, ae latou te avatu i fanau a le Atua le avanoa silisili e talileleia ai i latou i le lalolagi i le alofa e tasi i le lalolagi lea e latalata atu i le mea na tatou lagonaina i le lagi—o le alofa faamatua. O aiga o le auala sili foi lea e faasaoina ma tuufaasolo ai amioga mama ma mataupu faavae moni ia o le a sili ona taitai atu ai i tatou e toe foi atu i le afioaga o le Atua.”6
Pe ua ou faamata’uina outou matua? Ou te faamoemoe e leai. O lenei faamamafa i le aoaoina atu, aoaoina, ma le ola ai i le aiga e le i fuafuaina e avea o se avega faaopoopo mo tagata taitoatasi ma aiga. O le mea moni, o lona faafeagai—matou te faamoemoe o le faailoaina atu ma le lagolagoina o a outou taumafaiga i le aiga, e mafai ai i nisi o auala ona faamamaina le avega o loo outou tauaveina iina. Ia, pe sili atu foi, atonu e mafai ai ona matou faamalosia outou e “tauave [ai] ma le faigofie” (Mosaea 24:15).
Lagolagoina o le Aoaoina o le Talalelei i le Lotu
O lenei vaaiga lautele o le opogiina o le talalelei i fafo atu o le potuaoga e le faapea ai e le taua le potuaoga. O le mea moni lava, matou te faamoemoe ia tupu pea lena aoaoina anoa i le lotu. O le mea moni, o le matafaioi lagolago o vasega a le Ekalesia e taua tele i le faaogatotonuina o le aoaoina i le aiga. Ae ina ia mafai ona fesoasoani e suia olaga, e le mafai ona tutoatasi le aoaoina i le lotu mai mea o loo tutupu i na olaga. E tatau ona talafeagai ma, ma ia utuvai mai i aafiaga a faiaoga ma tagata aoao.
Ua manino a la, o le taulai atu i se tusi lesona po o se laupapa sioka po o le faatulagaga o nofoa, pe tusa foi po o ni fesili sili ona lelei e talanoa ai, atonu e le o le taulaiga sa’o lea. O le atalii/afafine e taitoatasi o le Atua ma lona alualu i luma e faavavau, e tatau ona avea ma faamoemoega o le tatou taumafaiga ma le alofa. O loo tatou taumafai e pa’i atu i olaga, ma e na’o nofoa po o sioka po o masini otoviso tatou te pa’i i ai pe afai e fesoasoani lena tatou te pa’i atu ai i se olaga. I le toe faaupuina o le fetalaiga a le Faaola, o le a se aoga i se faiaoga po o se vasega pe afai na te lagolagoina le tautalaga faaleaoaoga faavae aupito maoae i le lalolagi ae leai se mea o lena aoaoga faavae e iloagofie i le olaga ma le alofa, i le manatu ma lagona o le tagata e taitoatasi o le au paia, le tagata lea e matuai finagalo le Atua e laveai ma faaea?
O le fuafaatatau moni o le faamanuiaina e le o le, po o le a le sologa lelei sa alu ai le lesona, po o le a le lelei sa tatou faaaogaina ai le taimi, po o le a le tele o faamalo e maua e le faiaoga pe a uma, ae pe toafia foi tagata o le vasega sa auai [i faasoaga]. O le faamanuiaina e faalagolago lea i le mea e tupu i le olaga o le tagata aoao. Pe sa maua e Uso Herrero se mea i tusitusiga paia i le vaiaso ua te’a na fesoasoani ia te ia e taulima ai luitau sa feagai ma ia? Ia pe sili atu foi, pe na i ai se mea na tupu i le vasega sa faaleleia atili ai lona tomai e maua ai i le faagasologa o le vaiaso tali sa ia manaomia? Ina ua ia faasoa mai lena aafiaga i le vaiaso lenei, pe sa maua ai e Sister Schmidt le faamoemoe ma le faatuatua sa ia manaomia e talitonu ai o le a fesoasoani foi le Atua ia te ia? (Tagai “E Le Malosi Lou Tino e ala i Lou Matamata i Isi.”)
Atonu o le uiga o nei mea uma o le, afai o oe o se faiaoga, o le mea e te vaaia i se tasi o a tatou punaoa fou faaleaoaoga, atonu o le a fai si ese mai le mea ua masani ona e vaai i ai i a tatou tusi lesona tuai. Atonu e te tau i ni faatonuga e tau le fitoitonu e uiga i mea e fai ma le auala e fai ai. O le faiga lena sa fuafua ai, e uunai ai oe e tatalo mo, vaavaai mo, ma utuvai mai i a oe lava aafiaga ma a oe lava musumusuga, faapea foi ma aafiaga ma musumusuga a tagata e te aoaoina. (Tagai “O E Pese Toatasi po o E Taitaia le Aufaipese?”)
Ia faapea la o le kosi aoaoina o le Feagaiga Fou ma o a’u o le faiaoga o le Aoga Sa, e le tatau ona ou sau i le vasega ma se anoanoai o faamatalaga e leai se taua e uiga i le nofoaga na tupu ai le Mataio 5, upusii musuia mai tagata atamamai e faatatau i le Lauga i luga o le Mauga, ma gaoioiga fatufatuai e uiga i le auala e avea ai ma se tagata faatupu filemu, ua faatulagaina uma ma taimi lelei ia alu uma ai le taimi seia oo i le toe lima minute tuua. Nai lo o lena, ou te suesue ma ola i mataupu faavae o loo i le Mataio 5 e pei lava foi ona ou faamoemoe ia faia ai e tagata aoao. Na pau lava le eseesega o le, atonu ou te faia ma le manatunatu ma le tatalo atili e uiga i tagata taitoatasi o la’u vasega ma pe mafai faapefea ona anoa nei mataupu faavae ia i latou. Ma, i totonu o le vasega, i lalo o le uunaiga a le Agaga, ou te uunaia ai i latou e faamalamalama ma lagolago le tasi i le isi i a latou taumafaiga e suesue ma ola e ala i le Mataio 5. Ou te fesoasoani ia latou vaai i le sootaga i le va o o latou olaga ma aoaoga faavae taua o i totonu o tusitusiga paia. Ma le mea aupito taua, ou te tatalo mo musumusuga i le taimi lea ia liliu ai se mea moni i le faatuatua, ia liliu ai se fesili i se sailiga.
E mautinoa lava, i le Peraimeri e tau ese laitiiti ai la’u matafaioi. Ae o la’u sini ia faafiafiaina peafanau laiti mo le 45 minute pe faafilemu i latou ina ia mafai ona fai atu mea ou te manao e fai atu e aunoa ma le faalavelaveina. O lo’u faamoemoega o le atiina ae o i latou o ni tagata aoao tutoatasi, ia fesoasoani ia latou iloa auala o loo faaoaina ai o latou olaga e upumoni o le talalelei, ma ia lagolago i o latou matua—o o latou faiaoga aupito taua o le talalelei.
O lenei la, o le faate’ia ai o matua, atonu ua ou faamata’uina ai faiaoga. Afai o lea, sei ou faamautinoa atu outou i ni manatu se lua: (1) O loo outou aoaoina tagata, ae le o lesona, ma ua outou silafia lelei tagata nai lo le mea e mafaia e soo se tusi lesona ona fai. (2) O au taumafaiga patino e aoao ma ola i le talalelei o tapenapenaga aupito sili ona lelei ia e mafai na aoao atu ai le talalelei i isi. Ia manatua o le auala sili ona lelei e valaaulia ai le Agaga i totonu o o tatou olaga—ma i totonu o a tatou aoaoga—o le aoao ma ola ai i tatou lava i le talalelei. O le Agaga o le faiaoga silisili lea i lenei Ekalesia, ma o le mea e lelei ai, e leai se tapulaa i lena faatosinaga.
Sa Ia Faataatia Ala ma Taitai le Auala
O le matou faanaunauga sili lava, ia siitia i tatou e le Alii i ni tulaga maualuluga fou o le tuputupu a’e faaleagaga e ala i auala fou o le aoaoina ma le ola ai i le talalelei. Faatasi ai ma Lana fesoasoani, o le a tatou faasoa atu ai le talalelei i a tatou uo, e le ona ua tatou lagona o se tiute ae ona o le talalelei o se vaega o o tatou olaga i aso taitasi, ma e le mafai ona matala o tatou gutu e aunoa ma le pauu mai ai i fafo o nisi o upumoni o le talalelei! O le mea e lelei ai, o le a vaaia e a tatou uo o isi tapuaiga le malamalama faateleina i o tatou olaga ma o le a [latou] sueina faifeautalai—a o le’i maua i latou e faifeautalai—e aumai mo o latou lava aiga nisi o mea ua latou vaaia. O faaipoipoga i le malumalu, galuega o talafaasolopito o aiga, mana ma sauniga o le perisitua, amio mama, tausia o e matitiva—o na mea uma o le a avea ma taunuuga faamanuiaina o soo liua loloto o Keriso ua aoao ma ola i le talalelei i aso uma lava, faatasi ai ma le lagolago atoa, talafeagai, ma faifai pea mai vasega o le Aoga Sa. O le mea lena o loo taitai agai i ai i tatou e le Alii, ma e moni o se malaga faaosofia loto!
Tatou te faaaogaina le fuaitau, “Aoao Atu i le Auala a le Faaola,” ae ou te faamoemoe e le oo ina avea ma se upusii masani po o se anaga. O le mea moni, o le uiga atoa o lenei mea e faapea e tatau ona tatou faapei o Keriso, i le avea ai o ni faiaoga ma ni tagata aoao, ia taumafai e faasoa atu le talalelei i le ala sa Ia faia ai. O se avanoa lenei e auai ai i le au soo, ia o atu i auala maualuluga ma magaala faatasi ma Iesu, ma saili mo le tasi atonu ua leiloa. O se avanoa lenei e fe’aei ai i le Mauga o Faaamuia faatasi ma le motu o tagata ma saofafai i matafaga o Kalilaia faatasi ma le anoanoai o tagata. O se avanoa lenei mo i tatou uma e pai atu ai i le tuupao o le laei o le Matai ma ia faamaloloina ai.
E ese lo’u fiafia i upu nei o le solo sa tusia e Eliza R. Snow mo se tasi o viiga aupito faagaeetia i le Ekalesia:
Uso e ma tuafafine, ou te fiafia lava e savavali faatasi ma outou agai atu i le lumanai mamalu ua faapolopolo e lo tatou Tama oi le Lagi mo i tatou. Ou te iloa o outou loto. Ou te iloa tou te alolofa i le Alii ma mananao e fai Lona finagalo. E tuuina atu la’u molimau, a o tatou aoao i Lona finagalo, a o tatou faapotopoto mai le malamalama ma le upumoni ma fai o se vaega o i tatou i aso uma, o lena malamalama o le a ola i totonu o i tatou, e “tupu susulu malamalama tele pea lava pea seia oo i le aso e atoatoa ai” (MF&F 50:24; ua faaopoopo le faamamafa) i le taimi e mafai ona tatou faatasi ai ma Ia aua o le a tatou faapei o Ia.