Auaunaga i le Ekalesia
Tuputupu A’e mai Auaunaga
E alaala tusitala i Iuta, ISA.
Sa ma lagonaina se uunaiga e faapea, e tatau ona vave tuu atu i tagata o le matou paranesi fou ni valaauga ina ia mafai ona latou tuputupu a’e e ala i auaunaga.
O le Paranesi a Kaohsiung Fitu i le Malumalu o Taipei Taiuani ia Tesema 2001.
I le 2000 sa valaauina ai i ma’ua e tautua o se peresitene o le paranesi ma peresitene o le Peraimeri o le iunite aupito toalaiti o le Siteki a Kaohsiung Taiuani. Pe a ma le 20 tagata sa auai i le sauniga faamanatuga, e aofia ai le matou aiga laiti, ma ni toeaiina malolosi [i le Ekalesia] e toafa, ma faifeautalai. Mulimuli ane sa matou auina atu ni toeaiina se toalua i le misiona, ma le faatuatua o le a faatoatele e le Alii le matou paranesi.
A o matou galulue ma le matou paranesi, sa matou manatuaina le fautuaga a Peresitene Gordon B. Hinckley e faapea, e manaomia e tagata uma e liliu mai: “se uo, se tiutetauave, ma le faafaileleina i le ‘afioga lelei a le Atua.’”1 Sa ma lagonaina se uunaiga e faapea, e tatau ona vave tuu atu i tagata o le matou paranesi fou ni valaauga ina ia mafai ona latou tuputupu a’e e ala i auaunaga. Sa faailoa atu e faifeautalai i maua i tagata sailiili taitoatasi, ma i totonu o le lua vaiaso o o latou papatisoga taitasi, na latou mauaina ai se valaauga. Sa latou atiinaeina ni faauoga a o latou auauna faatasi ma isi tagata o le au paia.
I totonu o se masina, ua maua e uso uma lava na faatoa papatisoina le Perisitua Arona, ma sa taitasi ona latou faamanuiaina ma tufaina atu le faamanatuga. Sa matou saunia foi i latou ia maua le Perisitua Mekisateko i le konafesi na sosoo ai a le siteki.
Sa aoaoina ia toeaiina fou i le auala e faatino ai sauniga, ona aoao lea e nei toeaiina ia toeaiina fou. Sa matou talitonu i le aoaoina e ala i le faataunuuina ma i le taofimauina o le aoaoga e ala i le aoao atu. Sa nafa tagata o le paranesi ma le faataitaia ma le fautuaina, aoao ma faamasani, ma lagolago ma fesoasoani le tasi i le isi.
Sa matou faaaogaina faiaoga o aiga ma faiaoga asiasi, afiafi faaleaiga, gaoioiga a le uarota, ma taumafataga e aumai e aiga ma taumamafa faatasi ai e faaaumea ai tagata fou liliu mai. Sa faafaileleina i latou i le afioga a le Atua e ala i aoaoga faalelotu i Aso Sa ma aso o le vaiaso. Sa tuputupu a’e le inisitituti mai tagata aoga e toa 2 i le 25. Ina ia faafaileleina atili le matou paranesi laitiiti, sa matou auai ma auauna atu ai i le Malumalu o Taipei Taiuani i masina uma lava—o se malaga e 10-itula i le alu ma le foi mai i le pasi. O le mea masani lava, e tauivi le matou siteki ma le tau faatumuina o se pasi lona lua. A o tuputupu a’e le matou paranesi ma saunia aiga mo faamanuiaga o le malumalu, sa matou faatuina se sini ia faatumu sa matou lava pasi. E faalua i lena tausaga, a o faatumu e isi tagata uma o le siteki le pasi e tasi o le malumalu, sa faatumuina ai e le matou paranesi laitiiti se pasi lona lua. E lei umi atu, ae fai atu le siteki i uarota taitasi e faatumu se pasi e tasi ia le itiiti ma le tasi i le tausaga.
E oo ane i le tausaga lona lua ua faateleina le faatumauina o o matou tagata liliu mai mai le 30 pasene i le silia ma le 90 pasene, ma sa tuputupu a’e a matou sauniga faamanatuga i le tusa ma le 100 tagata, e aofia ai ni toeaiina toaaga e 25. Sa oo ina avea le matou paranesi o se uarota, ma sa toe faafouina le matou fale tuai i se falelotu fou.
O le paranesi aupito toalaiti na avea ma uarota aupito malosi i le siteki ona sa faamanuiaina tagata liliu mai uma i ni uo, valaauga, ma le fafagaina i le afioga a le Atua.