Fesili & Tali
“Ou te le lagonaina le agavaa e alofaina ai e le Faaola. E mafai faapefea ona ou faatoilaloina lenei lagona ma iloaina lo’u taua faaletagata lava ia?”
Tatalo ina ia Lagona Lona Alofa
O i tatou uma o ni atalii ma afafine o lo tatou Tama Faalelagi. E le muta Lona alofa mo i tatou. Afai tatou te lagonaina le pei tatou te le agavaa i Lona alofa, e tatau ona tatou tatalo ia te Ia. Tatalo ina ia lagona Lona alofa. Tatalo ina ia e lagona le agavaa i Lona alofa mo oe, ma ia mafai ona e vaai ia te oe lava e pei ona Ia silasila mai ia te oe. I Lona taimi ma Lana ala, o le a Ia tali mai ai i taimi uma i au tatalo faatasi ai ma se faamautinoaga o Lona alofa atoatoa. Soo se taimi lava ou te lagona ai le faanoanoa po o le tuuatoatasi, o le tatalo mo Lona alofa e siitiaina a’u i luga i taimi uma.
Julia M., 16 tausaga, Virginia, ISA
Faalatalata atili atu i le Faaola
Talu ai nei lava i se vasega sauniuni mo le misiona, sa matou talanoa ai e uiga i auala e pupula ai o matou mata i le alofa o le Atua mo i matou. Sa matou talanoaina ni mea eseese e mafai ona matou faia e lagona ai le faateleina o le taua o le tagata lava ia; o nisi o nei mea o le auauna atu i ou tuaoi, tatalo mo le fesoasoani i mea e taua ia te oe, faitauina o tusitusiga paia, ma le avea ma se faifeautalai. O nei mea uma e faamoemoe e faalatalata atu ai i tatou ia Iesu Keriso ma fesoasoani tatou te iloa ai o tatou gafatia e avea ai faapei o Ia.
Santiago Z., 17 tausaga, Arisona, ISA
Tausi i Poloaiga
O nisi taimi ou te le lagonaina le agavaa ina ia alofaina e le Faaola ona ou te le usitai atoatoa i poloaiga a le Alii. E mafai ona ou faatoilaloina nei lagona e ala i le salamo, o nisi taimi faatasi ai ma le fesoasoani a lo’u epikopo, o le e aoaoina au, e alofa le Alii i Ana fanau uma lava.
Jacques D., 15 tausaga, Abidjan, Ivory Coast
E Taua le Salamo
Tatou te agasala uma lava, ma ona o lena mea, atonu tatou te lagona ai le le agavaa mo le alofa o le Faaola. Ae ua Ia tuuina mai Lona soifua mo i tatou—sa ositaulaga o Ia mo i tatou. O lena faatinoga le manatu faapito sa faia ona o le alofa. E na’o le pau lava le mea e tatau ona tatou faia e lagona ai le agavaa i Lona alofa o le faaaoga o le mana o Lana Togiola e ala i le salamo i a tatou agasala. O le salamo o le ki lea i le iloaina o lo tatou taua faaleagata lava ia ma le alofa o le Faaola
Sister Custan, 23 tausaga, Misiona a Filipaina Cebu
Alofa i Isi
O le tasi o auala e iloa ai lo tatou taua faaletagata lava ia, o le iloa lea o le taua faaletagata lava ia o i latou e siomia i tatou. O le taulai atu i isi e fesoasoani tatou te maua ai lagona lelei e uiga ia i tatou lava aua o loo tatou atiinaeina isi. E manuia ai tagata uma! Ina ua ou tauivi ma le talitonu ia te a’u lava, sa tonu loa o le a ou auauna atu i se tagata sa siomia a’u o le sa manaomia le fesoasoani. O aso uma lava mo se masina, sa ou tuuina atu se upu faamalo i se uo o le sa faia se tauiviga. O le taulai atu i isi sa fesoasoani ou te lagona ai le faatauaina ma le manaomia. A tatou taumafai e alolofa atu i isi mo ituaiga tagata e i ai i latou, e oo ina faigofie ai ona tatou vaai i le tele o le alofa o le Atua mo i tatou, O le fesoasoani i isi ia lagona le agavaa i le alofa o le a fesoasoani tatou te lagona ai e i tatou lava le agavaa mo le alofa.
Jayme W., 15 tausaga, Minesota, ISA