O Se Mafuaaga e Faamanatuina Ai
Mo le Au Paia o Aso e Gata Ai o e sa o ni tagata matutua i lena taimi, o le faaaliga i le 1978 e uiga i le perisitua o mea sa tutupu ua faapea ona manatuaina i le mafaufau.
I.
Sa oo mai le talafou ia te a’u i se telefoni lea sa seasea ona tatagi. Sa matou galulue ma o’u atalii e toalua i le fanua o se matou fale i luga o le mauga, sa matou fauina o se nofoaga e mapu i ai mai i o’u tiutetauave mamafa o le avea ma se peresitene o le Iunivesite o Polika Iaga. O le tagata sa valaau mai o Elder Boyd K. Packer. Sa ia faamatala mai ia te a’u e uiga i le faaaliga i le perisitua, lea na faatoa uma lava ona fofogaina mai. Sa ma fefaasoaai i lagona o le olioli, ma sa ou toe savali atu i la’u galuega. Sa ou saofai ifo i luga o le faaputuga palapala sa matou asuina ma talo atu i o’u atalii [e o mai]. A o ou ta’u atu ia i laua ua mafai nei e alii agavaa uma o le Ekalesia ona faauuina i le perisitua, sa ou tagi i le fiafia.
Aisea lava na avea ai le faaaliga e uiga i le perisitua o se mea e olioli tele ai? A o avea ai ma se alii talavou sa aoga ma faigaluega i le matata faaletulafono, e 17 tausaga sa ou nofo ai i eria o Sisifotutotonu ma Sasae o le Iunaite Setete. Sa ou maitauina ma lagona le tiga ma le le fiafia sa oo ia i latou o e sa pagatia i nei faatapulaaga ma i latou sa maitauina i latou, faitioina i latou, ma saili mo ni mafuaaga [o faatapulaaga]. Sa ou suesue i mafuaaga na tuuina mai i lena vaitaimi, ma sa le mafai ona lagona ai le faamautinoaga e faatatau i le moni o soo se tasi o ia [mafuaaga]. O se vaega o la’u suesuega ma le agaga tatalo, na ou iloaina ai, i se tulaga lautele, e seasea tuu mai e le Alii ni mafuaaga mo poloaiga ma faatonuga Na te tuuina mai i Ana auauna. Sa ou naunau e faamaoni i o tatou taitai faaperofeta ma ia tatalo—e pei ona folafolaina mai mai le amataga o nei faatapulaaga—e faapea o le a oo mai le aso o le a olioli ai tagata uma i faamanuiaga o le perisitua ma le malumalu. Ae o lenei, i le aso 8 o Iuni, 1978, na oo mai lena aso, ma sa ou tagi i le fiafia.
II.
Pe a tatou mafaufau i le mea na tupu ma o loo tupu i le Ekalesia a Iesu Keriso o le Au Paia o Aso e Gata Ai ma i olaga o ona tagata talu mai le 1978, ua tofu maua e i tatou uma le mafuaaga e faamanatu ai.
E faatatau i le faagaoioiga o le Ekalesia, sa vave lava le tali atu o le Ekalesia i le faaaliga e uiga i le perisitua. O faaeega ma pepa faataga o le malumalu sa oo mai i le taimi lava lea. O mafuaaga sa tuuina mai e taumafai ai e faamalamalama ai ia tapulaa sa i ai muamua i le au paia o tupuaga mai Aferika—e oo lava foi i tulaga sa faaleoina muamua e taitai faaaloalogia o le Ekalesia—sa vave ma faalauaitele ona le toe faamaoniaina. Na fetalai mai le Alii e ala mai i Lana perofeta, ma sa usitai i ai Lana Ekalesia.
O lona eseesega, sa le’i vave ma aoao suiga i loto ma faiga a tagata taitoatasi o le au paia. Sa taliaina e nisi ia aafiaga o le faaaliga i le taimi lava lea ma le faatamalii, o nisi sa faifailemu le taliaina, ae o nisi, i o latou lava olaga patino, sa faaauauina ai uiga faaalia o le faailoga lanu lea sa avea ma mea tiga i le toatele i le lalolagi atoa, e aofia ai le 40 tausaga ua mavae. O nisi ua mananao e toe tepa i tua, e taulai atu le manatu i le toe iloiloina o taimi ua tuanai, e aofia ai le sailia o mafuaaga mo faatapulaaga ia ua le toe faaaogaina nei. Ae o le toatele lava i totonu o le Ekalesia, e aofia ai ona taitai sinia, ua taulai atu i avanoa mo le lumanai ae le o le le fiafia o le taimi ua tuanai. O le toatele ua faatuatuaina le atamai ma le taimi a le Alii ma taliaina ai faatonuga a Lana perofeta. I le faia o lea mea, ua tatou iloa ai le taua e faavavau o Lana aoaoga faaperofeta e faapea, “ua tutusa le pele o le tasi tagata i lana silafaga e pei o le isi” (Iakopo 2:21). I le faia foi o lea mea, ua tatou maua ai uunaiga fou e faataunuu ai le poloaiga a le Alii o Iesu Keriso, e tatau ona tatou aoao atu le talalelei e faavavau i tagata uma—i “atunuu uma, ituaiga, gagana, ma nuu” (MF&F 42:58).
III.
O le faapopole o i tatou lava i mea e le’i faaalia mai pe o faamatalaga ua tuanai sa faia e i latou o e sa galulue ma se malamalamaaga faatapulaa, e na’o le taumatemate [o mafuaaga] ma le le fiafia e iu i ai. Ia i latou uma o e o i ai ni atugaluga faapea, matou te faailoa atu lo matou alolofa ma lenei valaaulia faapitoa. Ia tatou tepataulai uma atu i luma i le autasi o lo tatou faatuatua ma faalagolago i le folafolaga a le Alii, “ua ia valaauina i latou uma ia o mai ia te ia ma taumamafa i lona agalelei; ma e le teena e ia se tasi e sau ia te ia, e uliuli pe pa’epa’e, e pologa pe saoloto, o tane ma fafine” (2 Nifae 26:33).
A o tatou vaavaai atu i le lumanai, o le tasi o taunuuga aupito taua o le faaaliga i le perisitua, o lana valaau faalelagi lea e lafoai ese uiga o le faailoga tagata e faasaga i soo se vaega o fanau a le Atua. O le faailoga lanu atonu o le punavai aupito taatele lea o le faailoga tagata i aso nei, ma ua valaauina i tatou uma ia salamo i lena mea. Peitai mai lava i le talafaasolopito, e toatele vaega o le fanau a le Atua o loo, pe sa sauaina pe sa oo i tulaga le lelei o le faailoga tagata, e pei o mea e faavae i faaletagatanuu pe faaleaganuu, po o le atunuu pe faaleaoaoga po o tulaga faaletamaoaiga.
I le avea ai ma auauna a le Atua o e ua i ai le ma tiutetauave o Lana fuafuaga sili o le faaolataga, e tatau ona faanatinati lo tatou sauniaina o o tatou uiga faaalia ma a tatou amioga—i le faagaoioiga o le [Ekalesia] aoao ma faaleatagata lava ia—e faataatia ese uma ai faailoga tagata patino. E pei ona saunoa mai Peresitene Russell M. Nelson i le vaega lenei i le matou fonotaga talu ai nei ma taitai faalemalo o le National Association for the Advancement of Colored People: “Matou te valaaulia faatasi ia tagata uma, faalapotopotoga, ma malo ia galulue ma le migao faateleina, e aveese ai le faailoga tagata o ituaiga uma.”1
E tusa lava pe tatou aufaatasi e tafi ese uiga faaalia ma faiga o le faailoga tagata, e tatau ona tatou manatua, e le o se faailoga tagata o le Ekalesia le tausisi i nisi o tulafono mo le faamoemoega o le tulaga manaomia a le Alii ma le agavaa e ulu ai i se malumalu. Ua folafola mai e le Alii, o le usiusitai i feagaiga ma poloaiga o se tulaga manaomia taua lea e olioli ai i faamanuiaga paia. Soo se taumafaiga lava e titinaese ai tulaga manaomia paia mo le ola e faavavau ma aiga e faavavau, o le a pei lea o le taumafai e faavae le fuafuaga a Satani e faapea, “o le a faasaoina tagata uma.” O i tatou o tagata faitino ua uma ona tatou teenaina le fuafuaga a Satani i o tatou muai olaga. Sa tatou filifilia le fuafuaga a lo tatou Tama Faalelagi, lea ua tuuina mai ai le saolotoga e filifili ma tausia ai feagaiga e faavavau ma poloaiga ia e tutusa ona faatatau i tagata uma lava. O le tutusa a le Atua e le o le tutusa lea o taunuuga mo tagata uma, ae o le tutusa o avanoa mo tagata uma.
IV.
O lo tatou naunautai i le faamanatuga o lenei polokalama o le patipatia lea o le 40 tausaga o le faaaliga i le perisitua e ala i le vaai agai i luma. A o tatou faia o lea mea, ua tatou faailoa atu ai le talisapaia faapitoa mo o tatou au paia ofoofogia e i ai tupuaga Aferika, aemaise lava i o tatou au paia Aferika-Amerika, o e o loo faaauau pea i le faatuatua ma le faamaoni e ala i se vaitaimi o suiga faigata o le faateamalieina o le faailoga tagata. O lenei ia tatou auai faatasi i le taulai atu o o tatou mafaufau i taunuuga matagofie mulimuli mai o le 1978 i lena faaaliga i le faamanuiaina o fanau a le Atua i le lalolagi atoa. E pei ona folafola mai e o tatou taitai faaperofeta i lena taimi.
“Ua faailoa mai nei e le Alii lona finagalo mo le faamanuiaina o ana fanau uma i le lalolagi atoa o e e faalogo i le leo o ana auauna tofia, ma saunia i latou lava e maua faamanuiaga uma o le talalelei.”2
O le taimi nei ua fauina ai malumalu i le tele o atunuu mo le faamanuiaina o fanau a le Atua i itu uma o le veli. Tatou te olioli faatasi i luga o le fogaeleele, ma i le lagi. O le vaega lenei o le tatou sauniuniga mo le Afio Mai Faalua o Ia o le na folafolaina mai e ala i se perofeta o le Tusi a Mamona, e faapea, “ua le poloaia ai e ia se tasi ia latou le faatasi ai i lana faaolataga” (2 Nifae 26:24) ma o le na folafola mai e ala i se perofeta i onaponei e faapea, “afai e le tasi outou, e le a a’u outou” (MF&F 38:27).